2 Milandu 26:1-23
26 Lyene antu yonsi amu Yuda yatozile Uziya uwali ni myaka 16 nu kumwika pa wene kumupyanika pali Amaziya isi.
2 Wapokolwile umusumba wa Eloti uno mpiti wali uwakwe Yuda nu kuukuula cipya cipya pa cisila icakuti isi wafwa nu kuziikwa ukwalaala ivikolwe vyakwe.
3 Uziya wali ni myaka 16 lino watandike ukuteeka, nupya wateesile pa myaka 52 umu Yelusalemu. Nyina wali a Yekoliya uwa ku Yelusalemu.
4 Wazanzyanga Yeova wakwe vino Amaziya isi wacitanga.
5 Watwalilile ukuombela Leza umu manda yakwe Zekaliya uwamusambilizye ukutiina Leza wa cumi. Mu manda yano waombelanga Yeova, wamupaalanga.
6 Waile alwisya Aina Filisti nu kucimvya umusumba wa Gati, musumba wa Yabine nu musumba wa Asyidodi. Lyene wakuuzile imisumba yuze umupiipi nu musumba wa Asyidodi nu mu ncende ya Ina Filisti.
7 Leza wa cumi watwalilile ukumwazwa ukulwisya Aina Filisti, Aina Alabya aikalanga umu Gulibaali, nu kulwisya Aina Meuni.
8 Aina Amoni yatandike ukulipila umusonko kuli Uziya. Wizile amanyikwa sana ukufika nu ku Ijipti, pano wakweti sana amaka.
9 Nupya wakuuzile ivikuulwa ivitali umu Yelusalemu umupiipi ni Mpongolo ya pa Koona, mupiipi ni Mpongolo ya Mukonko, nu mupiipi ni viumba ivyatungilile ilinga nupya wavikomizye.
10 Wakuuzile ni vikuulwa ivitali umu lwanga nu kwimba ivifula ivingi (pano wakweti sana iviteekwa); nupya wacisile na vivyo kwene umu Syefela nu mu ncende itambalale. Wakweti ya kalima na akuomba umu vyalo vya myangazi umu myamba nu mu Kalimeli, pano watemilwe ukulima.
11 Nupya Uziya wizile akwata asilika amanyile ukulwa. Yayanga umu kulwa ala yali umu maumba. Nupya Yeiyeli kalemba na Maaseya uwali intunguluzi yayapenzile nu kuyalemba ukulingana na vino Hananiya uwali pali ya cilolo ya mwene walanzile.
12 Akalamba ya mitundu yonsi aatungululanga asilika aamaka yaali 2,600.
13 Yatungululanga asilika aali ni vyanzo nupya aipekinye ukulwa aali 307,500, yaali asilika amaka aatungililanga umwene nu kulwisya alwani yakwe.
14 Uziya wapeezile asilika yonsi ivisyangu, masumo, visote, vya kucinga ivisao, maulapwa ni vya kuvwintilako amawe.
15 Mu Yelusalemu namo walenzile kuti aamanya ivya kupangapanga yapange ivya kuvwintilako inceto na mawe akalamba, nupya yaviisile pa mpungu na pa makoona ya malinga. Walumbwike sana pano antu yamwavwanga sana nupya wizile akwata amaka.
16 Lelo lino wizile akwata sile amaka, wizile aya ni cilumba icamuletelile, wayembukile Yeova Leza wakwe nu kwingila umwi tempele lyakwe Yeova ku koca ivinunkile pa ulambo.
17 Lilyo kwene sile Azaliya na ya simapepo yauze 80 yakwe Yeova asipe yamukonsile umwi tempele.
18 Yaakalipile Umwene Uziya nu kumunena iyati: “Utalinzile ukocela Yeova ivinunkile! Ya simapepo sile aalinzile ukoca ivinunkile pano aali ya mu lupwa lwakwe Aloni asoololwe. Fuma muno, pano watuyembuka nupya ukwene ali mulandu uno Yeova Leza atalakucindamikila.”
19 Lelo Uziya wasosile sana ala watalema ica kocelapo ivinunkile; nupya lino acili watasoka, walwile tembwe pa cipuma ala na ya simapepo yacili umu ng’anda yakwe Yeova umupiipi nu ulambo wa kocelapo ivinunkile.
20 Lino Azaliya simapepo mukalamba na ya simapepo yauze yamulolekisye, yaweni ukuti ali na tembwe pa cipuma. Fwandi yamufumizye panzi zuwa zuwa, nawe kwene wafumilemo zuwa pano Yeova wamulwalike.
21 Umwene Uziya watwalilile ukuya na tembwe wiyo mpaka imfwa yakwe, nupya wikalanga umu ng’anda yuze pano ataazumiliziwe ukuya uku ng’anda yakwe Yeova. Yotamu umwanakwe u wangalilanga isano ala akupingula antu ya mu mpanga iiya.
22 Ilyasi lyonsi ilyasyala ilikalanda pali Uziya, kufuma pa kutandika ukufika uku mpela, lyalemvilwe na kasesema Ezaya mwana Amozi.
23 Lyene Uziya wafwile nu kuziikwa ukwalaala ivikolwe vyakwe, lelo yamuziisile umu ncende yuze yakwe ya mwene, pano yalanzile iyati: “Walwala tembwe.” Nupya Yotamu umwanakwe wamupyanyile pa wene.
