2 Milandu 29:1-36
29 Hezekiya wali ni myaka 25 lino watandike ukuteeka, nupya wateesile imyaka 29 umu Yelusalemu. Nyina wali a Abiya mwana Zekaliya.
2 Wazanzyanga Yeova wakwe vino Devedi icikolwe cakwe wacisile.
3 Mu mwaka wa kutandikilako uwa kuteeka kwakwe, mu mwezi wa kutandikilako, wayuzile ivisaasa vya ku ng’anda yakwe Yeova nu kuvizifya.
4 Lyene wasenzile ya simapepo na Ina Levi nu kuyakolonganika umu musolo wa ku ufumondaka.
5 Wayanenyile ati: “Uvwini kuno mwe Ina Levi. Isangululini nu kusangulula ing’anda yakwe Yeova Leza wa vikolwe vinu, mufumye ni vikowele umu ncende ya muzilo.
6 Pano ivikolwe vitu vyapondoka nupya vyasosya Yeova Leza witu. Yasya Yeova iyata nu kucindika icikuulwa cakwe ica muzilo, nupya yamukana.
7 Yayazile ni visaasa vya pa muputule wa kwingilila umwi tempele nu kuzimya ya lampi. Yatiile ukoca ivinunkile nu kupeela malambo ya koca kuli Leza wa Ina Izlaeli pa ncende ya muzilo.
8 Fwandi ukali wakwe Yeova wizile pa yantu ya mu Yuda nu mu Yelusalemu nupya wayafulwile, icakuti antu aaweniko nu kuvwa yuvwile intete iyapeziwa mano nupya yatandike ukuyatumfya wakwe vino mukuilolela.
9 Pa mulandu na vino ivikolwe vitu vyacisile, vyakomilwe uku lupanga, nupya ana itu aonsi na akazyana na ya mama itu yasenzilwe umu uzya.
10 Lyene nkulondesya ukupangana upangano na Yeova Leza wa Ina Izlaeli, pakuti ukali wakwe ufume pali sweswe.
11 Yanane, yii asi insita ya kuwayawaya, pano Yeova wamusoolola kuti mwaimilila pa nkoleelo yakwe, ukumuombela nu kumupeela malambo ya koca.”
12 Lino Aina Levi yuvwile vivyo, yakatwike, kuli kuti Mahati mwana Amasai na Yoweli mwana Azaliya aa mu Ina Koati; mu Ina Melali namo mwafumile Kisyi mwana Abidi na Azaliya mwana Yealeleli; mu Ina Gesyoni namo mwafumile Yowa mwana Zima na Edeni mwana Yowa;
13 muli ya mwana Elizafani namo mwafumile Syimuli na Yewele; muli ya mwana Asafu namo mwafumile Zekaliya na Mataniya;
14 muli ya mwana Hemani namo mwafumile Yehiyeli na Syimei; muli ya mwana Yedutuni namo mwafumile Syemaya na Uzieli.
15 Lyene yakolonganike aina yao nu kuisangulula, nupya yaile umu kusangulula ing’anda yakwe Yeova wakwe vino Yeova wanenyile umwene.
16 Lyene ya simapepo iingile umu ng’anda yakwe Yeova nu kuisangulula, nupya yafumizye vyonsi ivikowele vino yazanyile umwi tempele lyakwe Yeova nu kuvitwala umu musolo wa pa ng’anda yakwe Yeova. Aina Levi nayo yavisenzile ukunzi uku Mukonko wa Kiduloni.
17 Fwandi yatandike umulimo wa kusangulula pa wanda wa kutandikilako umu mwezi wa kutandikilako, nupya pa wanda uwalenga 8 yafisile pa muputule wa kwingilila umu ng’anda yakwe Yeova. Yasangulwile ing’anda yakwe Yeova pa manda 8 nupya pa wanda uwalenga 16 yamazile umulimo wa kusangulula.
18 Pa cisila yaile uku Mwene Hezekiya iyaya iyamunena iyati: “Itusangulula ing’anda yakwe Yeova nu ulambo wa kupeelelapo malambo ya koca ni viya vyonsi ivyayapo alino na tebo ya kwikapo umukate wa muzilo ni viya vyonsi ivyayapo.
19 Itupekanya nu kusangulula iviya vyonsi vino Umwene Ahazi wafumizye umwi tempele pa nsita ino wateekanga lino watiile ukuya na ucisinka, nupya vili pa nkoleelo ya ulambo wakwe Yeova.”
20 Lyene Umwene Hezekiya wakatwike katondotondo nu kukolonganika ya cilolo ya mu musumba nupya yaile uku ng’anda yakwe Yeova.
21 Yasenzile ya cipambasi 7, ya suuku akalamba 7, ya suuku anono 7 na ya sawe 7 kuti yapeele malambo ya kwelelela imembu zya mwene na amu ng’anda yakwe, kusangulula itempele nu kwelela imembu zya yantu ya mu Yuda. Fwandi wanenyile ya simapepo, kuli kuti amu lupwa lwakwe Aloni ukupeela ivintu vivyo pa ulambo wakwe Yeova.
22 Lyene yakomile ing’ombe, nupya ya simapepo yatozile uwazi nu kusansila pa ulambo; yakonkizyepo ukukoma ya suuku akalamba iyasansila nu wazi pa ulambo, pa cisila yakomile tu suuku utunono iyasansila nu wazi pa ulambo.
23 Lyene yatwazile ya sawe aakuomvya ngu upe wa pa luyembu ku mwene ala ali na antu yonsi, nupya ya simapepo isile makasa pali ya sawe.
24 Lyene yakomile ya sawe nu kuyapeelela pamwi nu wazi pa ulambo ngi lambo lya pa luyembu, pakuti Aina Izlaeli yonsi yelelwe, pano umwene walanzile ati malambo ya koca na malambo ya pa luyembu yalinzile ukuya aa Ina Izlaeli yonsi.
25 Lyene wisile Aina Levi pa ng’anda yakwe Yeova ala yali ni viwaya,* ya banjo na mazeeze kulingana na vino Devedi na Gadi uwalolelanga umwene ivilolwa alino na Natani kasesema yalanzile, pano Yeova u walandiile muli ya kasesema yakwe.
26 Fwandi Aina Levi yaimi ala yalemile ivya kulizizyako inyimbo vino Devedi wapanzile, na ya simapepo ala yalemile mapenga.
27 Lyene Hezekiya walanzile ukuti yapeele ilambo lya koca pa ulambo. Lino yatandike ukupeela ilambo, yatandike ukulizya ulwimbo lwakwe Yeova alino na mapenga, ala yakulondela umu vya kulizizyako inyimbo ivyali ivya Mwene Devedi uwa ku Izlaeli.
28 Nupya antu yonsi yafukime ala yakwimba nu kulizya mapenga; yatwalilile ukucita vikwene ukufikila ilambo lya koca lyasila.
29 Lino yamazile sile ukupeela ilambo, umwene pamwi na antu yonsi yano wali nayo yafukime.
30 Umwene Hezekiya na ya cilolo yanenyile Aina Levi kuti yalumbanye Yeova ukuomvya amazwi yakwe Devedi na yakwe Asafu kalola wa vilolwa. Fwandi yamulumbanyizye ala yali sana ni nsansa, nupya yafukime nu kupepa.
31 Lyene Hezekiya walanzile ati: “Vino mwaya antu yakwe Yeova, izini mupeele malambo ya kutaizya na malambo yauze pa ng’anda yakwe Yeova.” Fwandi antu yatandike ukuleta malambo ya kutaizya na malambo yauze, nupya yonsi aaitemiilwe yapeezile malambo ya koca.
32 Malambo ya koca yano antu yaleesile yaali ing’ombe 70, ya suuku 100 ni mfwele 200; yonsi yaali amalambo ya koca kuli Yeova,
33 nupya pa malambo ya muzilo yauze, paali ing’ombe 600 ni mfwele 3,000.
34 Lelo kutaali ya simapepo aingi aakuomba mulimo wa kufundula inyama zya koca, fwandi aina yao Aina Levi yayazwilizye ukufikila mulimo onsi wasila na ya simapepo yauze yaisangulula, pano Aina Levi iisileko sana mano uku kuisangulula kucila ya simapepo.
35 Nupya kwali malambo ya koca aingi pamwi na mafuta ya nyama aakupeela nga malambo ya mutende nu upe wa vyakumwa uwa kupeelela pamwi na malambo ya koca. Fwandi umulimo wa pa ng’anda yakwe Yeova watandike ukuombwa nupya.
36 Lyene Hezekiya na antu yonsi yasansamwike pali vino Leza wa cumi wayacitiile, pano vii vyonsi vyacitike ukwaula ukwenekela.
Mafutunoti
^ Vyela vino yakapumanya pa kulizya.
