2 Milandu 31:1-21
31 Lino yamazile sile ukuzevya umutebeto, Aina Izlaeli yonsi aalipo yaile umu misumba ya mu mpanga ya Yuda, nupya yatamozile ivipilala vya kupepa nu kuputola incesi zya kupepa,* yononyile ni ncende zya kupepelapo na maulambo umu misumba yonsi yakwe Yuda na yakwe Benjamini, nu mu misumba yakwe Efulemu na yakwe Manase kufikila yonona vyonsi, lyene pa cisila Aina Izlaeli yonsi yaswilile uku misumba yao, cila muntu waswilile ukwakwe.
2 Lyene Hezekiya wisile ya simapepo na Ina Levi umu maumba, cila yano wayapeezile umulimo, yapeelanga malambo ya koca na malambo ya mutende, nupya yaombanga umulimo wakwe Leza, kumutaizya nu kumulumbanyizizya pa mpongolo zya kwingilila umu misolo ya pa ng’anda yakwe Yeova.
3 Vintu vimwi vya mwene vyapeezilwe nga malambo ya koca kumwi ni vya upe vya katondo ni vya upe vya manguzi, alino na malambo ya koca aa pa Masabata, pa mwezi upya, na pa mitebeto ukulingana ni vyalemvilwe umu Masunde Yakwe Yeova.
4 Nupya wanenyile antu aikalanga umu Yelusalemu kuti yapeele ya simapepo na Ina Levi vintu vino yalinzile ukupeelwa, pakuti yaikisya mano uku masunde yakwe Yeova.
5 Lino walanzile sile vivyo, Aina Izlaeli yapeezile ivintu ivingi kufuma pa vyakulya vya nkoleelo, waini umupya, mafuta nu uci, nu kufuma pa vilimwa vyonsi vya mu vyalo; yapeezile icikumi pa vintu vyonsi.
6 Nupya antu amu mpanga ya Izlaeli nu mu mpanga ya Yuda aikalanga umu misumba yakwe Yuda nayo yaleesile icikumi ukufuma pa ng’ombe, pa mfwele, na pa vintu vya muzilo ivyapeezilwe kuli Yeova Leza wao. Fwandi yakolonganike ivya upe ivingi.
7 Mu mwezi wakwe citatu yatandike ukukolonganika ivya upe nupya umu mwezi uwalenga 7 yamazile ukukolonganika.
8 Lino Hezekiya na ya cilolo yaweni ivintu vino yakolonganike, yalumbanyizye Yeova nu kupaala antu yakwe Aina Izlaeli.
9 Hezekiya uzizye ya simapepo na Ina Levi pa vya upe vino antu yapeezile,
10 nupya Azaliya simapepo mukalamba uwa mu ng’anda yakwe Zadoki wamunenyile ati: “Kufuma pano antu yaatandikile ukuleta ivya upe uku ng’anda yakwe Yeova, yakalya nu kwikuta nupya kucili ivyakulya ivingi ivisiileko, pano Yeova wapaala antu yakwe, nupya ivintu vii vili pa vintu vingi ivisiileko.”
11 Lyene Hezekiya wayanenyile ukuti yapekanye imiputule iya kusungilamo ivyakulya umu ng’anda yakwe Yeova, nayo yacisile vivyo kwene.
12 Yatwalilile ukuleta imisangulo, ivikumi, ni vintu vya muzilo; Konani Umwina Levi u wangalilanga ivintu vivyo, nupya Syimei umwinakwe uwali inkonkanyi yakwe.
13 Kulingana na vino Umwene Hezekiya walanzile, Yehiyeli, Azaziya, Nahati, Asaeli, Yelimoti, Yozabadi, Eliyeli, Isimakiya, Mahati, na Benaya, yazwilizyanga Konani na Syimei umwinakwe nupya Azaliya wangalilanga ing’anda yakwe Leza wa cumi.
14 Nupya Kole mwana Imuna Umwina Levi uwaombelanga pa mpongolo ya ku ufumondaka, wangalilanga imisangulo ya kuitemelwa yakwe Leza wa cumi, watolanga ni misangulo ino antu yapeelanga kuli Yeova ni vintu vya muzilo sana nu kupeela yano yaombelanga api tempele.
15 Wangalilanga Edeni, Miniyamini, Yesyua, Syemaya, Amaliya na Syekaniya umu misumba yakwe ya simapepo muno yaombelanga ala yakupeela aina yao ivya upe, ukutandikila pa mukalamba ukufika pa munono.
16 Yapeelwanga ivyakulya ukufumyako yano yalemvilwe ukulingana na muno yakonkaniile, aayanga umu kuomba pa ng’anda yakwe Yeova cila wanda ukulingana na maumba yao, pali yano yalemvilwe pali aonsi ukutandikila pa ya myaka itatu ukuya papela.
17 Ya simapepo na Ina Levi aali ni myaka 20 ukuya papela yalemvilwe ukulingana ni ndupwa zyao nu kulingana ni milimo ino yapeezilwe.
18 Pali yano yalemvilwe pali aci yao, ana yao aonsi na anaci, na Ina Levi ni ndupwa zyao zyonsi, pano yatwalilile ukuisangulula ala yakuomba imilimo ya muzilo ino yapeezilwe
19 kumwi na amu lupwa lwakwe Aloni, ya simapepo aikalanga umu ncende ya kucemelamo iviteekwa iyazingulwike imisumba yao. Mu misumba yonsi, yasonsilemo aonsi aakupeela imisangulo kuli ya simapepo na kuli yonsi aalemvilwe amu ndupwa zya Ina Levi.
20 Hezekiya wacisile vikwene umu mpanga yonsi iya Yuda, nupya watwalilile ukucita ivisuma nu kuya uwa cumi kuli Yeova Leza wakwe.
21 Nupya umulimo onsi uno waomvile uwakumile ukulonda Leza wakwe, uye uwa pa ng’anda yakwe Leza wa cumi nanti uwa kulondela Masunde yakwe, wauomvile nu mwenzo onsi nupya watungulwike.
Mafutunoti
^ Lolini Ulondolozi wa Mazwi.
