2 Milandu 33:1-25
33 Manase wali ni myaka 12 lino watandike ukuteeka, nupya wateesile imyaka 55 umu Yelusalemu.
2 Wasosyanga Yeova pano wacitanga ivya winyi vino inko zino Yeova wazingiile Aina Izlaeli zyacitanga.
3 Wakuuzile cipya cipya incende zino Hezekiya isi ononyile, nupya wakuulile ya Baali maulambo nu kwimika incesi zya kupepa,* wafukamilanga ni ntanda zyonsi izya mwi yulu nu kuziombela.
4 Nupya wakuuzile na maulambo yakwe ya leza ya ufi umu ng’anda yakwe Yeova, ing’anda ino Yeova walanzilepo ukuti: “Mu Yelusalemu u mulaya izina lyane manda pe.”
5 Nupya wakuulile ni ntanda zyonsi zya mwi yulu maulambo umu misolo iili ya pa ng’anda yakwe Yeova.
6 Ociile na anakwe mu Mukonko Wakwe Mwana Hinomu; wacitanga ivya maleele nu kusapoola, nupya wasonsile na ya sing’anga na ya kasapoola. Wacisile ivintu iviipe sana ivya kusosya Yeova.
7 Wapanzile icilubi aciika umu ng’anda yakwe Leza wa cumi, ing’anda ino Leza wanenyile Devedi na Solomoni umwanakwe ukuti: “Ndika izina lyane umu ng’anda kwene yii mu Yelusalemu, kuli kuti musumba uno nasoolola mu mitundu yonsi ya Ina Izlaeli.
8 Ntalaleka nupya Aina Izlaeli yafume umu mpanga ino napeezile ivikolwe vyao ndi cakuti yakulondela masunde yano nayapeezile, kuli kuti masunde yonsi yano napeezile Mose umuomvi wane.”
9 Manase watwalilile ukuponzya antu ya mu Yuda nu mu Yelusalemu nu kuleka ukuti yacita ivintu iviipisye ukucila vino inko zino Yeova wayazingiile zyacitanga.
10 Yeova watwalilile ukucelula Manase na antu yakwe, nomba yatikangako mano.
11 Fwandi Yeova wayatumiile akalamba ya yasilika aa mwene wa ku Asilya, nayo yalemile Manase iyamunyepa na maceni yakwe koopa iyamutunga na maswelo nu kumusenda uku Babiloni.
12 Lino wacuzile sana, wapaapasile kuli Yeova Leza wakwe kuti amuvwile uluse, nupya watwalilile ukuicefya sana pa nkoleelo yakwe Leza wa vikolwe vyakwe.
13 Watwalilile ukupepa kuli aliwe, Leza nawe uvwile vino wapaapasile na vino walenzile, nupya wamuswilizye pa wene wakwe uku Yelusalemu. Lyene Manase wizile amanya ukuti Yeova ali Leza wa cumi.
14 Pa cisila wakuuzile ilinga lya kunzi ya Musumba Wakwe Devedi uku uwondaka wa Gihoni mu mukonko kufika nu ku Mpongolo ya Nswi, watwalilile ukukuula ukuzinguluka ukufika nu ku Ofeli, nupya walitalimfizye sana. Wasonsile na akalamba ya yasilika umu misumba ya malinga yonsi iya mu Yuda.
15 Lyene wafumizye ya leza ya ufi ni vilubi mu ng’anda yakwe Yeova nu konona maulambo yano wakuuzile pa mwamba wa pa ng’anda yakwe Yeova nu mu Yelusalemu, nupya walesile kuti yavisumbile ukunzi ya musumba.
16 Wakuuzile nu ulambo wakwe Yeova nu kutandika ukupeelelapo malambo ya mutende na malambo ya kutaizya, nupya wanenyile antu ya mu mpanga ya Yuda ukulaombela Yeova Leza wa Ina Izlaeli.
17 Lelo antu yatwalilile ukupeelela malambo pa ncende zino yalolanga ukuti izya muzilo, nanti icakuti akuli Yeova Leza wao sile akuno yapeelanga.
18 Ilyasi lyonsi ilyasyala ilikalanda pali Manase, pi pepo lino wapefile kuli Leza wakwe na pa mazwi yakwe ya kalola ya vilolwa alandanga nawe umwi zina lyakwe Yeova Leza wa Ina Izlaeli, lyalembwa umu vyalembwa vya mpiti ivikalanda pali ya mwene ya mu Izlaeli.
19 Nupya ipepo lyakwe, vino Leza wamuyeliile uluse, imembu zyonsi zino wacisile na vino ataali ni cisinka, incende zino wapangilepo ivifulo vya kupepelapo nu kwimikapo incesi zya kupepa* alino ni vilubi vino wapanzile lino atatala waicefya, vyalembwa umu mazwi yakwe yano yamulolelanga ivilolwa.
20 Lyene Manase wafwile nu kuziikwa ukwalaala ivikolwe vyakwe, nupya yamuziisile mupiipi ni ng’anda yakwe; Amoni umwanakwe u wamupyanyile pa wene.
21 Amoni wali ni myaka 22 lino watandike ukuteeka, nupya wateesile imyaka iili umu Yelusalemu.
22 Wasosyanga Yeova wakwe viivi kwene vino Manase isi wacisile. Nupya wapeelanga malambo ku vilubi vyonsi vino Manase wapanzile alino nu kuviombela.
23 Lelo wene ataicefizye kuli Yeova wakwe vino Manase wacisile; wene wacizilemo ukucita iviipe.
24 Mu kuya kwa nsita, aomvi yakwe yamupangiile nupya yamukomiile umu ng’anda yakwe.
25 Lelo antu ya mu mpanga iiya yakomile yonsi apangiile Umwene Amoni, nupya iisile Yosiya umwanakwe pa wene.
