2 Milandu 34:1-33
34 Yosiya wali ni myaka 8 lino watandike ukuteeka, nupya wateesile imyaka 31 umu Yelusalemu.
2 Wazanzyanga Yeova nupya wacitanga ivisuma vyonsi vino Devedi icikolwe cakwe wacisile, ataatazile ate ukucita ivisuma.
3 Mu mwaka uwalenga 8 uwa kuteeka kwakwe, ala acili umulumendo, watandike ukulonda Leza wakwe Devedi icikolwe cakwe, nupya umu mwaka uwalenga 12, watandike ukonona incende zino yalolanga ukuti izya muzilo, kuputola incesi zya kupepa,* nu kutamoola ivilubi mu mpanga ya Yuda nu mu Yelusalemu.
4 Nupya wanenyile antu ukuti yonone maulambo yakwe Baali nu konoona ivya kocelapo ivinunkile ivyali papela. Waputozile incesi zya kupepa* atamola ni vilubi nu kuvivungola iviya ulukungu, nupya watozile ulukungu lulo nu kulusansila pa malindi ya yantu aviomvyanga uku kupeelelapo malambo.
5 Nupya ociile mafupa yakwe ya simapepo pa maulambo yao. Vikwene avino wasangulwile impanga ya Yuda nu musumba wa Yelusalemu.
6 Nupya umu misumba yakwe Manase, misumba yakwe Efulemu, kufika nu ku misumba yakwe Nafutali, nu mu ncende umwasyazile matongwa,
7 watamozile maulambo nu kuvungola incesi zya kupepa ni vilubi mpaka ivisyala sile ulukungu; ononyile ni vya kocelapo ivinunkile mu mpanga yonsi ya Ina Izlaeli, nupya pa cisila waswilile uku Yelusalemu.
8 Umu mwaka uwalenga 18 uwa kuteeka kwakwe, pa cisila ca kusangulula itempele, watumile Syafani mwana Azaliya, Maaseya umukalamba wa musumba, na Yowa mwana Yoazi uwasunganga ivyalembwa kuti yakazifye ing’anda yakwe Yeova Leza wakwe.
9 Yaile kuli Hilikiya simapepo mukalamba nu kumupeela impiya zino antu yaletanga umu ng’anda yakwe Leza, zino Aina Levi aombelanga pa milyango yakolonganike ukufuma umu mutundu wakwe Manase, mu mutundu wakwe Efulemu, nu ku Ina Izlaeli asyala, alino nu kufuma mu mutundu wakwe Yuda, mutundu wakwe Benjamini nu ku yantu ya mu Yelusalemu.
10 Nupya yapeezile impiya zizyo kuli yano yasonsilwe ukuomba umulimo wa pa ng’anda yakwe Yeova. Aombanga umulimo pa ng’anda yakwe Yeova nayo yaziomvizye uku kuzifizyako ing’anda.
11 Yapeezile impiya zizyo kuli yano yamanyile ivya kupangapanga na ya kakuula pakuti yakalile mawe aputule, ni mbao zya kutungilila icikuulwa nu kwika ya mutali yauze uku mang’anda yano ya mwene ya mu mpanga ya Yuda yalesile kuti yononeke.
12 Antu yaa yaomvile umulimo na ucisinka. Yayasontiile Aina Levi aakuyangalila, kuli kuti Yaati na Obadiya Aina Melali, na Zekaliya na Mesyulamu Aina Koati, nupya Aina Levi yonsi aamanyikisye ukulizya inyimbo
13 aliyo yangalilanga asendanga iviya na yonsi aombanga imilimo ipusanepusane; nupya Aina Levi yamwi yaali aa kalemba, intunguluzi na alinzi ya pa mpongolo.
14 Lino yasendanga impiya umu ng’anda yakwe Yeova, Hilikiya simapepo wazanyile ibuku lya masunde yano Yeova wapeezile Mose.
15 Lyene Hilikiya wanenyile Syafani kalemba ati: “Inzana ibuku lya Masunde umu ng’anda yakwe Yeova.” Fwandi Hilikiya wapeezile Syafani ibuku lilyo.
16 Lyene Syafani watwazile ibuku ku mwene nu kumunena ati: “Aomvi yako yakuomba imilimo yonsi ino yapeelwa.
17 Iyafukumula impiya zyonsi izyali umu ng’anda yakwe Yeova nupya iyazipeela uku yonsi aakwangalila imilimo na kuli ya kaomba.”
18 Nupya Syafani wanenyile umwene ati: “Kuli ni buku lino Hilikiya simapepo watampeela.” Lyene watandike ukubelengela umwene.
19 Lino umwene uvwile sile amazwi aali umwi buku lya masunde, walepwile ivyakuzwala vyakwe.
20 Lyene umwene wanenyile Hilikiya, Ahikamu mwana Syafani, Abadoni mwana Mikaya, Syafani kalemba na Asaiya umuomvi wa mwene ati:
21 “Yangini mukanguzizye kuli Yeova nu kuzizya antu ya mu mpanga yii aasyala umu Izlaeli nu mu mpanga ya Yuda ukulozya uku mazwi ali umwi buku lii ilyatilizanwa; pano ukali wakwe Yeova uuliza pali sweswe uukalamba, pa mulandu wakuti ivikolwe vitu vitaalondile amazwi yakwe Yeova ukupitila mu kulondela vyonsi ivyalembwa umwi buku lii.”
22 Fwandi Hilikiya pamwi na yano umwene watumile yaile kuli Hulida kasesema mwanaci. Hulida wali a muka Syalumu mwana Tikiva mwana Haliasi uwasakamalanga umwa kusungila ivyakuzwala, nupya wikalanga umu citungu cakwe ciili ica musumba wa Yelusalemu; nupya yaile iyalanda nawe kuuku kwene.
23 Hulida wayanenyile ati: “Yeova Leza wa Ina Izlaeli walanda wati, ‘Munene umuntu uwatamutuma kuli nene muti:
24 “Yeova watalanda ati, ‘Ndaleta uwononesi pa ncende yii na pa yantu aakaikalamo, nupya ivitiipu vyonsi ivili umwi buku lino iyabelengela umwene wa ku Yuda vilacitika.
25 Pa mulandu wakuti yampondokela nupya yakupeela malambo ya koca kuli ya leza pakuti yansosye muli vyonsi vino yakucita, ndaleta ukali wane pa ncende yii nupya kusi alaulesya.’”
26 Lelo umwene wa ku Yuda uwatamutuma ukuti mwize muzye kuli Yeova mukamunene muti, “Yeova Leza wa Ina Izlaeli watalanda ati: ‘Kulozya uku mazwi yano watuuvwa,
27 pa mulandu wakuti watonsizye umwenzo nu kuicefya pa nkoleelo yane lino uvwile mazwi yano nalanzile pa ncende yii na pa yantu aakaikalamo, nupya waicefizye nu kulepula ivyakuzwala vyako nu kuloosya pa nkoleelo yane, ne Yeova inuvwa ipepo lyako.
28 Ali mulandu kwene uno ndaleka ukuti uziikwe umwi lindi lyako umu mutende ukwalaala ivikolwe vyako, nupya utalalola ucuzi onsi uno ndaleta pa ncende yii na pa yantu aakaikalamo.’”’”
Lyene yaile iyanena umwene vino Leza walanzile.
29 Lyene umwene watumile akuyaama akalamba ya mu Yuda nu mu Yelusalemu, nayo yacisile vivyo kwene.
30 Pa cisila umwene waile uku ng’anda yakwe Yeova pamwi na antu yonsi amu Yuda, antu ya mu Yelusalemu, ya simapepo na ya kasesema, kuli kuti antu yonsi ukufuma pa mukalamba ukufika pa munono. Wayabelengiile vyonsi ivyali umwi buku lya upangano lino yazanyile umu ng’anda yakwe Yeova.
31 Umwene wimilile pa nkoleelo yao nu kupangana upangano na Yeova uwakuti wali nu kulauvwila Yeova nu kukonka masunde yakwe nu mwenzo wakwe onsi nu umi wakwe onsi ukupitila umu kucita ivyalemvilwe umwi buku liili.
32 Nupya walesile antu yonsi amu Yelusalemu na amu mutundu wakwe Benjamini ukuzumilizyako. Antu ya mu Yelusalemu yacisile ukulingana ni vyali umu upangano wakwe Leza wa vikolwe vyao.
33 Lyene Yosiya wafumizye ivintu vya winyi vyonsi umu mpanga yonsi ya Ina Izlaeli, nupya wazwile Aina Izlaeli yonsi ukulaombela Yeova Leza wao. Mu manda yonsi yano Yosiya wali nu umi Aina Izlaeli yalondelanga Yeova Leza wa vikolwe vyao.
