2 Milandu 35:1-27
35 Yosiya wazevizye Ucilo kuli Yeova umu Yelusalemu, nupya yakomile inyama zya kupeela malambo pa wanda wa Ucilo, pa wanda uwalenga 14 umu mwezi wa kutandikilako.
2 Waswilizye ya simapepo mu milimo yao nupya wayakomelizye ukulaomba imilimo yao iya pa ng’anda yakwe Yeova.
3 Lyene wanenyile Aina Levi aasambilizyanga Aina Izlaeli yonsi aali amu muzilo kuli Yeova ati: “Ikini Mbokosi ya Upangano iya muzilo umu ng’anda ino Solomoni mwana Devedi umwene wa ku Izlaeli wakuuzile; mute ukusenda Imbokosi ya Upangano pa viye. Mwaombela Yeova Leza winu na Ina Izlaeli antu yakwe.
4 Nupya ipekanyini ukulaomba imilimo ukulingana ni ndupwa zya vikolwe vinu na maumba inu, wakwe viivi kwene vino Umwene Devedi uwa ku Izlaeli na Solomoni umwanakwe yalemvile.
5 Yangini pa ncende ya muzilo mukimilile umu maumba inu pakuti mwaombela antu nu kuomba umulimo uno Aina Levi amu ndupwa zya vikolwe vinu yapeelwa.
6 Komini inyama ya pa wanda wa Ucilo nupya muisangulule mweineco nu kwazwa aina inu pakuti mucite vino Yeova walanzile ukupitila muli Mose.”
7 Yosiya wapeezile antu imfwele ni mbuzi na tu suuku na tu sawe, utwa kupeela pa wanda wa ucilo kuli yonsi aazanyilweko, zyonsi pamwi zyali 30,000, ni ng’ombe 3,000. Inyama zii zyonsi zyali izyakwe.
8 Ya cilolo yakwe nayo yapeezile upe wa kuitemelwa uku yantu, kuli ya simapepo nu ku Ina Levi. Hilikiya, Zekaliya, na Yehiyeli, kuli kuti intunguluzi zya pa ng’anda yakwe Leza wa cumi, yapeezile ya simapepo inyama 2,600 izya kupeela pa wanda wa Ucilo ni ng’ombe 300.
9 Konani na ina yakwe, kuli kuti Syemaya na Netaneli pamwi na Hasyabiya, Yeiyeli, na Yozabadi, intunguluzi zya Ina Levi, yapeezile Aina Levi inyama 5,000 zya kupeela pa wanda wa Ucilo ni ng’ombe 500.
10 Yapekinye ukuzevya Ucilo, nupya ya simapepo iimilile pa ncende zyao na Ina Levi yaali umu maumba yao wakwe vino umwene walanzile.
11 Yakomile inyama zya kupeela pa wanda wa Ucilo, nupya ya simapepo yatozile uwazi uno yayapeezile nu kuusansila pa ulambo ala Aina Levi yakufundula inyama.
12 Lyene yapekinye malambo ya koca pakuti yayapeele uku yantu yonsi aali umu maumba ukulingana ni ndupwa zyao, na pakuti yapeele malambo yayo kuli Yeova ukulingana na vino calemvilwe umwi buku lyakwe Mose; nupya yacisile vivyo kwene nu ku ng’ombe.
13 Yeliike inyama zya kupeela pa wanda wa ucilo ukulingana na vino yacitanga; nupya yelekiile malambo ya muzilo umu mpoto, ntendo zya cela izikulu na muli ya pani, lyene yatwazile ivintu vivyo uku yantu yonsi zuwa zuwa.
14 Yaipekanyizizye icakulya ca Ucilo iyapekanyizizya na ya simapepo, pano ya simapepo amu lupwa lwakwe Aloni yapeelanga malambo ya koca na mafuta ukufika usiku, fwandi Aina Levi yaipekanyizizye icakulya ca Ucilo iyapekanyizizya na ya simapepo amu lupwa lwakwe Aloni.
15 Nupya ya kiimba ya mwana Asafu, yaali pa ncende zyao ukulingana na vino Devedi, Asafu, Hemani, na Yedutuni uwalolelanga umwene ivilolwa yalanzile; nupya alinzi yaombelanga pa mpongolo zyuze. Yataatiile ukuomba imilimo yao, pano Aina Levi aina yao yayapekanyizizye icakulya ca Ucilo.
16 Pa wanda kwene uuwa yamazile ukupekanya vyonsi vino Yeova walondanga pakuti yazevye Ucilo nu kupeelela malambo ya koca pa ulambo wakwe Yeova ukulingana na vino Umwene Yosiya walanzile.
17 Aina Izlaeli aalipo yazevizye Ucilo pa nsita kwene iiya nu Mutebeto wa Mukate Uwaula Icitutumusi pa manda 7.
18 Yatatazile iyazevyapo Ucilo wakwe uuwa umu Izlaeli kufuma umu manda yakwe Samweli kasesema; nupya kutatazile kuye ya mwene umu Izlaeli azevizyepo Ucilo wakwe uno Yosiya wazevizye, pamwi na ya simapepo, Aina Levi na antu yonsi amu mpanga ya Yuda nu mu Izlaeli aalipo, na antu ya mu Yelusalemu.
19 Yazevizye Ucilo uu umu mwaka uwalenga 18 uwa kuteeka kakwe Yosiya.
20 Pa cisila cakwe vii vyonsi, ala Yosiya wapekanya itempele, Umwene Neko uwa ku Ijipti wizile umu kulwa uku Kelikemisyi mupiipi nu luzi lwa Yufuleti. Lyene Yosiya waile umu kumulwisya.
21 Fwandi Neko watumile aakuyanena Yosiya iyati: “We mwene wa ku Yuda, u mulandu ci uno cii cakusakamikila? Ntizile umu ku kulwisya, lelo nizile umu kulwisya antu yauze, nupya Leza watanena ukuti incite vivyo zuwa. Pakuti upusuke utaakanya Leza aali nani, pano nga cisi vivyo amakonona.”
22 Lelo Yosiya ataafumile kuli aliwe, wazwazile ivyakuzwala vyuze pakuti atamanyikwa nu kuya umu kumulwisya nupya atuvwile uku mazwi yano Neko walanzile aafumile kuli Leza. Fwandi waile umu kumulwisya umu ncende itambalale iya Megido.
23 Aalwanga ukuomvya maulapwa yalasile Umwene Yosiya, lyene wanenyile aomvi yakwe ati: “Mfumyini kuno, pano iyancisa sana.”
24 Fwandi aomvi yakwe yamufumizye umwi celeta lino walimo nu kumwika umwi celeta lyuze ilya nkondo lyakwe ciili iyamutwala uku Yelusalemu. Wafwile nu kuziikwa umwi lindi lya vikolwe vyakwe, nupya antu yonsi amu mpanga ya Yuda na amu Yelusalemu yamuloosizye.
25 Nupya Yelemiya waloosizye Yosiya umu nyimbo zino wimvile, na aonsi yonsi na anaci ya kiimba yatwalilile ukumwimbila inyimbo zya kuloosya ukufika na ndakai; yapingwile nu kuti iimbe inyimbo zizyo umu Izlaeli, nupya zyalembwa umwi buku umwaya inyimbo zya kuloosya.
26 Ilyasi lyonsi ilyasyala ilikalanda pali Yosiya na pali vino wacisile pa kulanga ukutemwa kwa cumi, lino walondelanga masunde yakwe Yeova,
27 na vino wacisile ukufuma pa kutandika ukufika pa mpela, lyalembwa umwi buku ilikalanda pali ya mwene ya mu Izlaeli nu mu Yuda.
