2 Milandu 36:1-23
36 Lyene antu ya mu mpanga iiya yatozile Yeowazi mwana Yosiya nu kumwika pa wene umu Yelusalemu ukupyana pali isi.
2 Yeowazi wali ni myaka 23 lino watandike ukuteeka nupya wateesile imyezi itatu umu Yelusalemu.
3 Lelo umwene wa ku Ijipti wamufumizye umu Yelusalemu nu kulanda ukuti umu Yelusalemu mwafuma umusonko wa matalanti* yakwe siuva 100 ni talanti lyakwe goldi.
4 Nupya umwene wa ku Ijipti walesile ukuti Eliyakimu umwina wakwe Yeowazi aye umwene umu mpanga ya Yuda nu mu Yelusalemu, amupeela ni zina lyuze ilyakuti Yeoyakimu; lelo Neko wasenzile Yeowazi umwina wakwe uku Ijipti.
5 Yeoyakimu wali ni myaka 25 lino watandike ukuteeka, nupya wateesile imyaka 11 umu Yelusalemu. Lelo wasosyanga Yeova Leza wakwe.
6 Umwene Nebukadineza uwa ku Babiloni waile kuli aliwe umu kumunyepa ukuomvya maceni yaili yakwe koopa nu kumusenda uku Babiloni.
7 Nupya Nebukadineza wasenzile iviya vimwi vya mu ng’anda yakwe Yeova uku Babiloni aya aviika umwi sano lyakwe.
8 Ilyasi lyonsi ilyasyala ilikalanda pali Yeoyakimu na pa vintu vya winyi ni viipe vyonsi vino wacisile, lyalembwa umwi buku ilikalanda pali ya mwene ya mu Izlaeli nu mu Yuda; nupya Yeoyakini umwanakwe wamupyanyile pa wene.
9 Yeoyakini wali ni myaka 18 lino watandike ukuteeka, wateesile imyezi itatu na manda 10 umu Yelusalemu; nupya wasosyanga Yeova.
10 Uku kutandika kwa mwaka, Umwene Nebukadineza watumile aakuyamusenda ukumutwala uku Babiloni pamwi ni viya ivicindame ivya mu ng’anda yakwe Yeova. Nupya wisile Zedekiya umwina wakwe isi pa wene kuti ateeka umu Yuda nu mu Yelusalemu.
11 Zedekiya wali ni myaka 21 lino watandike ukuteeka, nupya wateesile imyaka 11 umu Yelusalemu.
12 Wasosyanga Yeova Leza wakwe. Ataicefizye pa nkoleelo yakwe kasesema Yelemiya uwalandilangako Yeova.
13 Wapondokiile nu Mwene Nebukadineza uwamulenzile ukulapa umwi zina lyakwe Leza, nupya watwalilile ukuya ni cilumba nu kukomya umwenzo akana nu kuswilila kuli Yeova Leza wa Ina Izlaeli.
14 Ya simapepo akalamba yonsi kumwi na antu yataali ni cisinka, yacitanga ivya winyi vyonsi vino inko zyuze zyacitanga, nupya yakowizye ing’anda yakwe Yeova ino wasangulwile umu Yelusalemu.
15 Yeova Leza watwalilile ukutuma antu aakuyacelula pa miku iingi, pa mulandu wakuti wali ni cikuuku uku yantu yakwe nupya atalondanga ukuti itempele lyakwe lyononwe.
16 Lelo yatwalilile ukusaalula yano Leza wa cumi watumanga nu kusuula izwi lyakwe alino nu kutumfya ya kasesema yakwe mpaka ukali wakwe Yeova iwiza pa yantu yakwe icakuti kusi ali wensi aangayapususya.
17 Fwandi wayatumiile umwene wa Ina Kalideya uwakomile ana yao aonsi uku lupanga umu ncende ya muzilo; atuvwilile uluse alumendo nanti ya nacisungu, akote nanti alemale. Leza wapeezile ivintu vyonsi umu minwe yakwe.
18 Iviya vyonsi ivya mu ng’anda yakwe Leza wa cumi ivinono ni vikalamba kumwi ni vyuma vya mu ng’anda yakwe Yeova ni vya mwene alino na vyakwe ya cilolo wavisenzile uku Babiloni.
19 Osile ing’anda yakwe Leza wa cumi, awisya ni linga lya musumba wa Yelusalemu, aoca ni misumba ya malinga yonsi nu konona ivintu vyonsi ivicindame.
20 Antu aapuswike uku lupanga, wayasenzile umu uzya uku Babiloni, nupya izile iyaya aomvi yakwe na aomvi ya yana yakwe ukufika lino uwene wa ku Pesya watandike ukuteeka,
21 pa kufikilizya mazwi yano Yeova walanzile ukupitila muli Yelemiya, kufika lino impanga yapuuzile. Amanda yonsi yano umu mpanga mutaali antu, impanga yapuuzanga pakuti imyaka 70 ikumanile.
22 Mu mwaka wa kutandikilako uwa kuteeka kwa Mwene Sailasi uwa ku Pesya, Yeova wacincizye Umwene Sailasi ukuti aume imbila umu mpanga yonsi ino wateekanga, pakuti amazwi yano Yeova walanzile ukupitila muli kasesema Yelemiya yangafikiliziwa; imbila iiyo mwali mazwi yano walemvile aakuti:
23 “Umwene Sailasi uwa ku Pesya walanda wati, ‘Yeova Leza uwa kwi yulu watampeela mawene yonsi aaya pano nsi nupya watansoolola ukuti imukuulile ing’anda umu Yelusalemu mu mpanga iya Yuda. Si Yeova Leza winu aye namwe mwensi cila muntu nupya cila muntu apite uku Yelusalemu.’”
Mafutunoti
^ Italanti lyonga lyafinanga makilogilamu 34.2. Lolini Ivyeo na Vyuze pa B14
