2 Milandu 5:1-14
5 Lyene Solomoni wamazile ukuomba imilimo yonsi iya pa ng’anda yakwe Yeova. Nupya wisilemo ivintu vino Devedi isi wapaatwile ukuti viye ivya muzilo, wisile na siuva na goldi ni vintu vyuze vyonsi umu miputule imwi iya mu ng’anda yakwe Leza wa cumi.
2 Pa nsita iiya Solomoni wakolonganike akalamba ya Ina Izlaeli, intunguluzi zya mitundu, ni ntunguluzi zyuze. Yatwazile Imbokosi ya Upangano yakwe Yeova uku Yelusalemu kufuma uku Musumba Wakwe Devedi, kuli kuti uku Zioni.
3 Aonsi yonsi Aina Izlaeli yakolongine uku mwene pa wanda wa mutebeto* umu mwezi uwalenga 7.
4 Fwandi akalamba yonsi amu Izlaeli izile, nupya Aina Levi yanyemwile Imbokosi ya Upangano.
5 Yaleesile Imbokosi ya Upangano, itenti lya kupepelapo, ni viya vyonsi ivya muzilo ivyali umwi tenti. Ya simapepo na Ina Levi aliyo yavileesile.
6 Umwene Solomoni na Ina Izlaeli yonsi yano wamile yaali pa nkoleelo ya Mbokosi ya Upangano. Fwandi imfwele izingi ni ng’ombe zyapeelwanga ukuya malambo icakuti zitaapenzilwe nu kupendwa.
7 Lyene ya simapepo yatwazile imbokosi ya upangano yakwe Yeova muno yaalinzile ukuya, mu muputule wa mukasi sana, kuli kuti mu Muputule wa Muzilo Sana, yaisile umwisika lya maapa yakwe ya kelubi.
8 Fwandi maapa yakwe ya kelubi yavimvile incende apaali Imbokosi ya Upangano, icakuti yacinzile Imbokosi ya Upangano kufuma papela kumwi nu twa kuinyemwilako.
9 Twa kunyemwilako Imbokosi ya Upangano twali ututali sana icakuti insongo zya tumiti tuto zyalolekanga nga umwi ali umu muputule wa muzilo uwali pa nkoleelo ya muputule wa muzilo sana, lelo zitalolekanga apanzi. Nupya akuno twaya ukufika na ndakai.
10 Mu Mbokosi ya Upangano mwali sile mawe yaili apapatane yano Mose wisilemo uku Holebu, lino Yeova wapangine upangano na Ina Izlaeli ala ya kufuma umu Ijipti.
11 Lino ya simapepo yafumile umu ncende ya muzilo (pano walanga ya simapepo yonsi aali pa ncende iiya iyaisangulula asi mulandu ni iumba lino yaalimo),
12 Aina Levi yonsi ya kimba aatungululwanga na Asafu, Hemani, Yedutuni, na ana yao na ina yao, yazwite ivyakuzwala ivya nsalu isuma ala iyalema utungoma, ya banjo na mazeeze; yaaimi uku ufumondaka wa ulambo nupya pali aliyo paali na ya simapepo 120 aalizyanga mapenga.
13 Lino ya kalizya ya mapenga na ya kimba yalumbanyanga nu kutaizya Yeova, nupya lino kuvwisile iciunda ca mapenga, ica tungoma ni vya kulizizyako inyimbo vyuze ala ya kulumbanya Yeova, “pano u musuma nupya ukutemwa kwakwe ukwa cumi kukaikalilila manda pe,” ikumbi lyazuuzile umu ng’anda yakwe Yeova.
14 Ya simapepo yafizilwe ukutwalilila ukuombela umu ng’anda yakwe Leza wa cumi, pano mwaziile ululumbi lwakwe Yeova.
Mafutunoti
^ Kuli kuti Mutebeto wa Nsakwe.
