2 Milandu 6:1-42
6 Pa nsita iiya Solomoni watiile: “Yeova wewe walanzile ukuti ulikala umu mfinzi.
2 Inkukuulila ing’anda ikalamba, incende apakuti uwaikala manda pe.”
3 Lyene umwene wapiliwike nu kutandika ukupaala uluko lwa Ina Izlaeli lonsi ala Aina Izlaeli yonsi iimilila.
4 Walanzile ati: “Si Yeova Leza wa Ina Izlaeli alumbanyiziwe, uwalavile ulayo kuli Devedi tata ukuomvya kanwa kakwe nupya uwatafikilizya ukuomvya makasa yakwe, uwalanzile ati,
5 ‘Kufuma pa wanda uno nafumizye antu yane umu mpanga ya Ijipti, ntaatala nasoolola umusumba umu mitundu ya Ina Izlaeli yonsi umwa kukuulila ing’anda apa kucindikila izina lyane nanti ukusoolola umuntu uwakuti aatungulula antu yane Aina Izlaeli.
6 Nomba lyene insoolola umusumba wa Yelusalemu kuti amuno izina lyane lyacindikilwa, nupya nasoolola Devedi ukulatungulula antu yane Aina Izlaeli.’
7 Nupya Devedi tata walondesyanga ukukuula ing’anda apa kucindikila izina lyakwe Yeova Leza wa Ina Izlaeli.
8 Lelo Yeova wanenyile Devedi tata ati, ‘Walondesyanga ukukuula ing’anda apa kucindikila izina lyane, nupya wacisile ningo pa kulondesya ukucita vivyo.
9 Lelo, asi wewe ulankuulila ing’anda, umwanako wino ulakwata aalakuula ing’anda apa kucindikila izina lyane.’
10 Yeova wafikilizya vino walavile, pano napyana Devedi tata nu kwikala pa cilimba ca wene umu Izlaeli, wakwe viivi kwene vino Yeova walavile. Nupya inkuula ing’anda apa kucindikila izina lyakwe Yeova Leza wa Ina Izlaeli,
11 nupya amuno niika Imbokosi umwaya mawe ya upangano uno Yeova wapangine na Ina Izlaeli.”
12 Lyene wimilile umupiipi nu ulambo wakwe Yeova pa nkoleelo ya Ina Izlaeli yonsi, nupya wakatwisye makasa umupela.
13 (Pano wapanzile ica kwimililapo icitumpuke ukuomvya koopa nu kuciika pakasi ka musolo. Cali ukucila mamita yaili umu utali, mamita yaili umu wipi, nu kucila mita wenga ukuya umupela; nupya apano wimiliile.) Lyene wafukime pa nkoleelo ya Ina Izlaeli yonsi nu kukatusya makasa umupela,
14 nu kulanda ati: “We Yeova Leza wa Ina Izlaeli, kutaaya Leza uwaya wakwe wewe umwi yulu na pano nsi, wemuno ukasunga upangano nupya wemuno waya nu kutemwa kwa cumi uku yaomvi yako aakakuombela ni myenzo yao yonsi.
15 Wasunga ulayo uno walavile Devedi umuomvi wako nupya tata. Walavile ulayo kuomvya kanwa kako, nupya ilelo watuufikilizya ukuomvya ikasa lyako.
16 Acino we Yeova Leza wa Ina Izlaeli fikilizya ulayo uno walavile Devedi umuomvi wako nupya tata lino walanzile uti: ‘Lyonsi umu lupwa lwako mulaaya uwa kwikala pa cilimba ca wene umu Izlaeli ndi cakuti ana yako yali ni miyele isuma wakwe vino waya.’
17 Fwandi napaapata, we Yeova Leza wa Ina Izlaeli si fikilizya ulayo uno walavile Devedi umuomvi wako nupya tata.
18 “Uzye Leza angikala na antu pano nsi? Ndi cakuti iyulu ilitanga likukumane, uzye ing’anda ino inkuula iingakukumana?
19 Fwandi we Yeova Leza wane, uvwa ipepo lya muomvi wako na kuli vino akupaapata, nupya uvwa kuli vino akulila ukuti umwazwe nu kwi pepo lino umuomvi wako akupepa.
20 Si uwalola ing’anda yii usiku nu musanya, incende ino walanzile ukuti a palaya izina lyako, uwauvwa ni pepo lino umuomvi wako wapepa ala watalozya pa ncende yii.
21 Uwauvwa kuli vino umuomvi wako akupaapata na kuli vino antu yako Aina Izlaeli yakupepa ala iyalozya pa ncende yii nupya uwauvwa ukufuma ukwi yulu kuno ukaikala, uwauvwa nu kwelela.
22 “Ndi cakuti umwi wayembukila umuze nupya yamulapiisya,* lyene lino iyamulapiisya wiza kuli wewe pa nkoleelo ya ulambo wako umu ng’anda yii,
23 uce uwauvwa ukufuma ukwi yulu nu kupingula aomvi yako, kuli kuti kupingula uwa mulandu nu kumufulula alino nu kuleka uwa kaele nu kumulambula pali ukaele wakwe.
24 “Ndi cakuti antu yako Aina Izlaeli yacimviwa uku yalwani pa mulandu wakuti yakuyembukiile, nupya iiza kuli wewe nu kucindika izina lyako, lyene yapepela umu ng’anda yii nu kupaapata pa nkoleelo yako ukuti uyuvwile uluse,
25 uce uwauvwa ukufuma ukwi yulu nu kwelela antu yako Aina Izlaeli pa membu zino yacisile nupya uce uwayaswilizya uku mpanga ino wayapeezile kumwi ni vikolwe vyao.
26 “Ndi cakuti kwaya icilala pa mulandu wakuti aomvi yako yakuyembukiile nupya yapepa ala iyalozya uku ncende yii nu kucindika izina lyako, yata nu kucita imembu pa mulandu wakuti wayasalapwile,
27 uce uwauvwa ukufuma ukwi yulu nu kwelela aomvi yako Aina Izlaeli pa membu zyao pano ulayasambilizya ivisuma vino yalinzile ukulacita; nupya uce uyaletele imvula mu mpanga yako ino wayapeezile.
28 “Ndi cakuti kwaya icipowe, nanti kwaya icikuko, vilimwa nanti vimelwa vyuma, kwaya makanta; nanti nga alwani yao yayazanza umu musumba uli onsi mu mpanga nanti kwaya icikuko cili consi,
29 nanti antu yako yonsi Aina Izlaeli yapepa ipepo nanti ukupaapata (pano cila muntu wamanya icikamucuzya) ala iyakatusya makasa nu kulozya uku ng’anda yii,
30 lyene uce uuvwe kufuma ukwi yulu kuno wikala nu kuyelela; nupya uce upeele cila muntu icilambu kulingana ni milimo yakwe pano wamanya umwenzo wakwe (wewe sile wenga wamanya ningo imyenzo ya yantu yonsi),
31 pakuti yakutiina ukupitila umu kulondela masunde yako amanda yonsi yano yali nu umi umu mpanga ino wapeezile uku vikolwe vitu.
32 “Nupya ukulozya uku muntu aatafuma umu yantu yako Aina Izlaeli uwafuma uku mpanga ya kutali pa mulandu ni zina lyako ilikalamba na pa ukulu wako na maka yako, uwiza nu kupepa ala watalozya uku ng’anda yii,
33 uce uuvwe ukufuma ukwi yulu kuno ukaikala, nu kucita vyonsi vino alakulenga pakuti antu yonsi umu nsi yace yamanye izina lyako nu ku kutiina wakwe vino Aina Izlaeli antu yako yakacita, na pakuti yamanye ukuti ng’anda yii ino nakukuulila ikacindika izina lyako.
34 “Ndi cakuti watuma antu ukuli konsi ku kulwa na alwani yao, nupya yapepa kuli wewe ala iyalozya uku musumba uu uno wasoolola nu ku ng’anda ino nakuula apa kucindikila izina lyako,
35 uce uuvwe ukufuma ukwi yulu nu kwasuka ipepo lyao na vino yakulenga nu kuyalwilako.
36 “Ndi cakuti yakuyembukila (pano kusi umuntu asiyembuka), nupya wayasokela sana nu kuyapeela uku yalwani yao, nayo yayasenda umu uzya ku mpanga yao, kutali nanti umupiipi,
37 nupya lino yacili uku mpanga kuno yayasenda umu uzya yiluka vino yacisile nu kuwela kuli wewe, nu kukupaapata iyati, ‘Ituyembuka nupya ituluvyanya; itucita iviipe,’
38 nupya yawela kuli wewe ni myenzo yao yonsi lino yali uku mpanga ya yalwani yao kuno yasenzilwe umu uzya, lyene yapepa kuli wewe ala iyalozya uku mpanga yao ino wapeezile ivikolwe vyao nu ku musumba uno wasoolola nu ku ng’anda ino nakuula apa kucindikila izina lyako,
39 uce uuvwe ukufuma ukwi yulu kuno ukaikala nu kwasuka ipepo lyao na vino yakulenga nu kuyalwilako nupya uce uwelele antu yako pali vino yakuyembukila.
40 “Lyene we Leza wane, si uwayula amanso nu kukutikisya uku mapepo aakupepwa pa ncende yii.
41 Nupya we Yeova Leza katuka nu kwizaikala umu ncende yako iya kupuuzilamo pamwi ni Mbokosi yako iya upangano iya maka. We Yeova Leza si leka ya simapepo yalanga ukuti ipusukilo likafuma kuli wewe, nupya leka antu yako aacisinka yasansamukila umu usuma wako.
42 We Yeova Leza utakana umuntu wako wino wasoolola. Uwaiusya ivisuma vino wacitiile Devedi umuomvi wako.”
Mafutunoti
^ Nanti “umuze wamutiipwila.” Kuli kuti umulapo wa citiipu cino wali nu kukwata ndi cakuti walapa ivya ufi nanti wakana ukufikilizya vino walavile.
