2 Milandu 7:1-22
7 Lino Solomoni wamazile sile ukupepa, umoto wafumile ukwi yulu nu koca malambo ya koca kumwi na malambo yauze, nupya ululumbi lwakwe Yeova lwazuuzile umu ng’anda.
2 Ya simapepo yafizilwe ukwingila umu ng’anda yakwe Yeova pano ululumbi lwakwe Yeova lwazuuzile umu ng’anda yakwe Yeova.
3 Nupya antu amu Izlaeli yonsi yalolangako lino umoto wafumile ukwi yulu na lino ululumbi lwakwe Yeova lwizile pa ng’anda, nupya yafupime pa musolo uwakuuzilwe na mawe nu kutaizya Yeova “pano u musuma nupya ukutemwa kwakwe ukwa cumi kukaikalilila manda pe.”
4 Lyene umwene na antu yonsi yapeezile malambo pa nkoleelo yakwe Yeova.
5 Umwene Solomoni wapeezile ing’ombe 22,000 ni mfwele 120,000 ukuya malambo. Fwandi umwene na antu yonsi yapeezile ing’anda yakwe Leza wa cumi.
6 Ya simapepo iimiliile umu ncende zino yaombelangamo wakwe vino Aina Levi aalemile ivya kulizizyako inyimbo zyakwe Yeova yacisile. (Umwene Devedi wapanzile iviombelo vii kuti aviomvya uku kutaizya Yeova nu kumulumbanya “pa mulandu wakuti ukutemwa kwakwe ukwa cumi kukaikalilila manda pe.”) Nupya ya simapepo yalizyanga amapenga umu viunda ivikalamba ala Aina Izlaeli yonsi iimilila.
7 Lyene Solomoni wasangulwile incende iyali pakasi ka musolo uwali pa nkoleelo ya ng’anda yakwe Yeova, pano paapa kwene apano wali nu kupeelela malambo ya koca na mafuta ya nyama zino wali nu kupeela ukuya malambo ya mutende, pa mulandu wakuti ulambo wakwe koopa uno Solomoni wapanzile utaali nu kukumana malambo ya koca, malambo ya vyakulya, na mafuta ya nyama.
8 Pa nsita kwene iiya, Solomoni wapanzile umutebeto pa manda 7 pamwi na Ina Izlaeli yonsi, lyali iumba ilikalamba sana ukufuma uku Lebo-hamati* kufika nu ku mukonko wa Ijipti.
9 Lelo pa wanda uwalenga 8* yaakweti ukongano uiyele, pano walanga iyakwata ukuzevya kwa kupeela ulambo pa manda 7 nu mutebeto wa manda 7.
10 Lyene pa wanda uwalenga 23 umu mwezi uwalenga 7 walesile kuti antu yapite uku mang’anda yao ala iyasansamuka nupya ala iyatemwa pa visuma vyonsi vino Yeova wacitiile Devedi na Solomoni alino na Ina Izlaeli antu yakwe.
11 Fwandi Solomoni wamazile ukukuula ing’anda yakwe Yeova ni sano; nupya wapanzile vyonsi vino walondanga uku ng’anda yakwe Yeova nu kwi sano lyakwe.
12 Lyene Yeova walolekiile kuli Solomoni usiku nu kumunena ati: “Inuvwa ipepo lyako, nupya insoolola incende yii kuti iye iyane apa kupeelela malambo.
13 Nga nayala iyulu ni mvula yakana ukutoonya nupya natuma makanta kuti aonone impanga, natuma ni cikuko pa yantu yane,
14 lyene antu yane akaamilwa api zina lyane yaicefya nu kupepa alino nu kundonda nupya yata nu kucita iviipe, nduvwa ukufuma ukwi yulu nu kuyelela pa membu zyao nupya ndazifya impanga yao.
15 Lyene ndaalola nu kukutikisya amapepo aalapepwa pa ncende yii.
16 Insoolola ing’anda yii nu kuisangulula kuti apano paye izina lyane amanda pe, nupya ndaisakamala nu kuicingilila.
17 “Naawe ndi cakuti umambombelanga wakwe vino Devedi tata wako wacitanga, ukupitila umu kucita vyonsi vino nakunena nupya ndi cakuti umalondelanga masunde yane,
18 lyene ndaleka uwene wako utwalilile wakwe vino napangine upangano na Devedi tata wako ukuti, ‘Lyonsi umu lupwa lwako mulaaya uwa kwikala pa cilimba ca wene umu Izlaeli.’
19 Lelo ndi cakuti wata ukundondela nu kuta ukusunga masunde yano nakupeela, nupya watandika ukuombela ya leza yauze nu kuyafukamila,
20 ndalovya Aina Izlaeli umu mpanga ino nayapeela, ndonona ni ng’anda ino nasangulula kuti pacindikilwa izina lyane, nupya antu yonsi yalaaseka nu kulanda ivya miponto pa ng’anda yii.
21 Ing’anda yii ilononwa. Na wensi uwapita umupiipi alailolekesya nu kuzunguka ati, ‘U mulandu ci uno Yeova wacitila vii uku mpanga yii nu ku ng’anda yii?’
22 Lyene yalalanda yati, ‘A pa mulandu wakuti yapondokile Yeova Leza wa vikolwe vyao uwayafumizye umu mpanga ya Ijipti, nupya yaile kuli ya leza yauze iyatandika ukuyafukamila nu kuyaombela. Ali mulandu uno wataletela intazi zii zyonsi pali aliyo.’”
