2 Milandu 8:1-18
8 Pa mpela ya myaka 20 ino Solomoni wakuuzile ing’anda yakwe Yeova ni sano lyakwe,
2 wakuuzile cipya cipya ni misumba ino Hilamu wamupeezile nu kuleka ukuti Aina Izlaeli yaikalamo.
3 Nupya waile uku musumba wa Hamati-zoba nu kuyaupoka.
4 Lyene wakuuzile cipya cipya musumba wa Tadimoli umu lwanga ni misumba yonsi iya kusungilamo ivintu ino wakuuzile uku Hamati.
5 Nupya wakuuzile cipya cipya musumba wa Beti-holoni uwa kupela nu wa kwisika, aikako na malinga, mpongolo, ni mifiikilo,
6 wakuuzile cipya cipya nu musumba uwa Baalati ni misumba yonsi umwa kusungila ivintu, misumba umwa kusungila maceleta, misumba umwa kwikala aakwelanga pa mfwalasi, na vyonsi vino walondanga ukukuula umu Yelusalemu, mu Lebanoni nu mu mpanga yonsi ino wateekanga.
7 Lelo antu yonsi asyala afumile umu Ina Hiti, mu Ina Amoli, mu Ina Pelizi, mu Ina Hivi, nu mu Ina Yebusi aataali umu Ina Izlaeli,
8 asyazile umu mpanga, kuli kuti yano Aina Izlaeli yataakomile, Solomoni wayalenzile ukuti yaomba imilimo ya uzya ukufika na ndakai kwene.
9 Lelo Solomoni ataalesile Aina Izlaeli ali yonsi ukuya azya yakwe, pano yaali asilika yakwe, akalamba ya ntunguluzi zya yasilika, aatungululanga aapisyanga maceleta na aakwelanga pa mfwalasi.
10 Kwali akalamba 250 aatungululanga intunguluzi zya Mwene Solomoni, kuli kuti aonsi angalilanga aombanga umulimo.
11 Nupya Solomoni wasenzile umwanaci mwana Falao kufuma umu Musumba Wakwe Devedi nu kumuleta uku ng’anda ino wamukuulile, pano walanzile ati: “Nanti cakuti a mamane atalinzile ukwikala umu ng’anda ya Mwene Devedi uwa Ina Izlaeli, pano incende kuno Imbokosi ya Upangano yakwe Yeova iiza i ya muzilo.”
12 Lyene Solomoni wapeezile malambo ya koca kuli Yeova pa ulambo wakwe Yeova uno wakuuzile pa nkoleelo ya muputule uwali apa kwingilila umwi tempele.
13 Cila wanda wapeelanga malambo ukulingana ni sunde lyakwe Mose ilyalandanga api Sabata, pa mwezi upya na pa mitebeto iyayangako miku itatu umu mwaka, kuli kuti Mutebeto wa Mukate Uwaula Icitutumusi, Mutebeto wa Milungu nu Mutebeto wa Nsakwe.
14 Nupya wisile ya simapepo umu maumba pakuti yaomba ukulingana na vino Devedi isi walanzile, wisile na Ina Levi umu ncende zino yaali nu kulaombelamo, cila wanda Aina Levi iimbanga nu kulumbanya Leza nupya yaombelanga pa nkoleelo yakwe ya simapepo, alinzi ya pa mpongolo nayo kwene waisile umu maumba pakuti yaombela pa mpongolo izipusanepusane, pano vivyo kwene avino Devedi umuntu wakwe Leza wa cumi walanzile.
15 Yataatiile ukulondela masunde yano umwene wapeezile ya simapepo na Ina Levi aalandanga pa mang’anda ya kusungilamo ivintu nanti pa vintu vyuze ivyasyala.
16 Fwandi umulimo wakwe Solomoni watantikwe ningo, kufuma pa wanda uno yakuuzile umufula wa ng’anda yakwe Yeova ukufika lino yasizile. Lyene umulimo wa kukuula ing’anda yakwe Yeova wasizile.
17 Lyene Solomoni waile uku Ezioni-gebeli nu ku Eloti mu mbali yakwe yemba uku mpanga iya Edomu.
18 Hilamu watumiile Solomoni mawato kumwi na aomvi yakwe amanyikisye ukupita pali yemba. Yapisile pamwi na aomvi yakwe Solomoni uku Ofili nu kuyasenda matalanti* yakwe goldi 450 iyayaleta uku Mwene Solomoni.
Mafutunoti
^ Italanti lyonga lyafinanga makilogilamu 34.2. Lolini Ivyeo na Vyuze pa B14.
