Ibuku Lyakwe Ciili Lyakwe Samweli 11:1-27
11 Pa kutandika kwa mwaka,* apa nsita ino aene yakaya umu ulwi, Devedi watumile Yoabu na aomvi yakwe kumwi na asilika ya Ina Izlaeli yonsi uku kukoma Aina Amoni. Lyene yaile iyazanza umusumba wa Laba, ala Devedi watasyala umu Yelusalemu.
2 Uwanda umwi manguzi, Devedi wakatwike pa bedi aya umu kutandala api paala li sano, lino wali api paala waweni umwanaci akufulala nupya umwanaci wiyo wali u musuma sana.
3 Devedi watumile umwi uwa kuyalondelezya pa mwanaci wiya, nupya wizile amunena ati: “A Batisyeba mwana Elyamu umuci wakwe Uliya Umwina Hiti.”
4 Lyene Devedi watumile aakuyasenda Batisyeba. Batisyeba waile kuli Devedi na Devedi wacisile nawe uzelele. (Cii cacitike pa nsita ino Batisyeba waisangululanga uku kukowela.*) Lyene pa cisila Batisyeba waswilile ukwakwe.
5 Lyene umwanaci wizile akwata inda, nupya watumile amazwi kuli Devedi ati: “Inkwata inda.”
6 Devedi watumile amazwi kuli Yoabu aakuti: “Nena Uliya Umwina Hiti aize kuli nene.” Fwandi Yoabu watumile Uliya kuli Devedi.
7 Lino Uliya wafisile kuli Devedi, Devedi wamuzizye vino Yoabu aali, vino asilika yonsi yali na vino ulwi wapitikanga.
8 Lyene Devedi wanenyile Uliya ati: “Yanga ukwako pakuti ukapuuze.” Lino Uliya wafumile umu ng’anda ya mwene, umwene wamutumiile upe.*
9 Lelo Uliya ataile ukwakwe, waizi pa mulyango wa ng’anda ya mwene kumwi na aomvi ya musambazi wakwe yonsi.
10 Devedi yamunenyile ukuti: “Uliya ataaile uku ng’anda ukwakwe.” Lino Devedi uvwile vivyo, uzizye Uliya ati: “Uzye utaali pa ulendo? U mulandu ci uno utaailile ukwako?”
11 Uliya waswike Devedi ati: “Mbokosi ya Upangano ili mu nsakwe kumwi na Ina Izlaeli na Yuda, nupya umusambazi wane Yoabu na aomvi yakwe iyapangila inkambi panzi. Nga lyene nemo ningaya uli uku ng’anda ukwane pakuti nkalye, ukumwa nu kupanga icupo na mamane? Nkulapa pa umi wako ukuti nsikucita vivyo!”
12 Lyene Devedi wanenyile Uliya ati: “Ikala kuno ni lelo kwene, nupya mutondo ndakuleka upite.” Fwandi Uliya wikazile umu Yelusalemu pa wanda uuwo nu wanda uwalondelilepo.
13 Devedi watumile aakuyaama Uliya pakuti aize aliile pamwi nawe ivyakulya nu kumwa nupya wamulenzile ukuti akoleke. Lelo pa wanda kwene uuwa usiku, Uliya waile alaala kuno waizi uwanda uwafumileko pamwi na aomvi ya musambazi wakwe, nupya kwene ataaile ukwakwe.
14 Katondo Devedi walemvile kalata kuli Yoabu nu kupeela Uliya kuti amutwalile.
15 Muli kalata walemvile ati: “Mukike Uliya uku nkoleelo kuno ulwi iukoma sana. Lyene mukawelele icisila nu kumusya wenga pa nkoleelo pakuti yakamukome.”
16 Yoabu u walolanga umusumba, nupya waile aika Uliya pano wamanyile ukuti apaali asilika ya maka sana.
17 Lino amu musumba yaile umu kuzanza Yoabu, aomvi yamwi yakwe Devedi yafwile kumwi na Uliya kwene Umwina Hiti.
18 Yoabu watumile uwa kuyanena Devedi vino ulwi wapitike.
19 Yoabu wanenyile wino watumile ati: “Ndi cakuti wamala ukunena umwene pali vino ulwi iupitika,
20 limwi umwene angaya akasoke nu kukuzya ukuti, ‘U mulandu ci uno imwapalamila sana uku musumba pa kulwa? Uzye mutali mumanyile ukuti yangaya yakamulase ukufuma papela ya ciumba?
21 Uzye a weni uwakomile Abimeleki mwana Yelubesyeti? Uzye asi umwanaci u wamutamile nu mwanansyo ukufuma papela ya ciumba, nu kulenga ukuti afwe umu Tebezi? U mulandu ci uno mwailile umupiipi sana ni ciumba?’ Lyene ukalande uti, ‘Nu muomvi wako kwene Uliya Umwina Hiti watafwa.’”
22 Fwandi umuntu wiyo waile kuli Devedi nu kuyamunena vyonsi vino Yoabu wamutumile ukuyalanda.
23 Wanenyile Devedi ati: “Antu yao yatucizile maka nupya izile umu kutulwisya; lelo twayazinginye suka ukuyafika pa mulyango wa kwingilila umu musumba.
24 Nupya ya kalasa ya nceto yalasanga aomvi yako kufuma papela ya ciumba, na aomvi yako yamwi yafwile; na Uliya Umwina Hiti nawe kwene wafwile.”
25 Lino Devedi uvwile vivyo wanenyile uwatumilwe ati: “Ukanene Yoabu uti: ‘Utasakamala pali cico, pano ulupanga lukakoma ali wensi. Ulwisye na maka yako yonsi pakuti ucimvye umusumba.’ Nupya umukomelezye.”
26 Lino umuci wakwe Uliya uvwile ukuti uwakwe watafwa, watandike ukumuloosya.
27 Lino insita ya kuloosya yasizile sile, Devedi watumile aakuyasenda Batisyeba nu kumutwala ukwakwe, Batisyeba wizile aya a mamakwe nupya wamuvyaliile umwana umonsi. Lelo Yeova wasosile sana pali vino Devedi wacisile.
Mafutunoti
^ Kuli kuti, mu nsita ya mpepo.
^ Nanti limwi, “kukowela kwa ku mwezi.”
^ Kuli kuti, “Upe uno umwineco wa ng’anda wapeelanga umwenyi umucindikwe.”
