Ibuku Lyakwe Ciili Lyakwe Samweli 15:1-37
15 Pa cisila cakwe vii vyonsi, Abusalomu wizile akwata iceleta ni mfwalasi izingi na aonsi 50 aakumukoleelela.
2 Abusalomu wakatukanga katondotondo nu kwimilila umu mbali ya museo uwa kwingilila umu musumba. Lyonsi lino umwi wakwata umulandu wa kupingulwa nu mwene, Abusalomu wamwamanga nu kumuzya ati: “Ufumile uku musumba ci?” nawe wasukanga ati: “Ne muomvi wako mfumile umu musumba onga pa misumba ya mitundu ya Ina Izlaeli.”
3 Lyene Abusalomu walandanga ati: “Vino ukulonda vili sile ningo, nomba kusi mapekanyo ali yonsi uku mwene aakuti umwi auvwe uku mulandu wako.”
4 Abusalomu walandanga nu kuti: “Ndi cakuti nene nasonsilwe ukuya kapingula umu mpanga yii, ningaapingula nu kuombela pa mulandu onsi uno umuntu waleta kuli nene, nu kusininkizya ukuti wapingulwa umu mulinganya.”
5 Nupya lino umwi waya kuli Abusalomu nu kumufukamila, Abusalomu wamulemanga, amupalamika alino amutonsola.
6 Abusalomu wacitanga vii uku Ina Izlaeli yonsi ayanga umu kupingulwa uku mwene; watwalilile ukucita vikwene pakuti Aina Izlaeli yamutemwe.
7 Pa cisila ca myaka 4, Abusalomu wanenyile umwene ati: “Napaapata lekini inje uku Hebuloni nkafikililzye umulapo uno nalafile kuli Yeova.
8 Pano lino ne muomvi winu nali uku Gesyuli ya ku Silya nalafile umulapo uu uwakuti: ‘Ndi cakuti Yeova wambwezya uku Yelusalemu, ndapeela ilambo kuli Yeova.’”
9 Fwandi umwene wamunenyile ati: “Upite umutende.” Nawe wakatwike nu kuya uku Hebuloni.
10 Lyene Abusalomu watumile aakuyalondelezya umu mitundu yonsi iya Ina Izlaeli, nu kuyanena ati: “Nga muvwa sile ipenga lyalila, mukapunde muti, ‘Abusalomu wataya umwene umu Hebuloni.’”
11 Aonsi 200 ukufuma uku Yelusalemu yakonsile Abusalomu; yayamile ukwaula ukumanya vino yakuya umu kucita ni vikuya umu kucitika.
12 Nupya lino Abusalomu wapeelanga malambo, watumile aakuyaama Aitofeli Umwina Gilo, impandamano yakwe Devedi ukufuma uku musumba wa Gilo. Mapange yakwe yatwalilile ukuomba ningo, nupya antu atungililanga Abusalomu yavulilangako sile.
13 Mu kuya kwa nsita kwizile aakumanyisya Devedi iyati: “Aina Izlaeli iyapumbukila kuli Abusalomu.”
14 Lilyo kwene sile Devedi wanenyile aomvi yakwe yonsi yano wali nayo umu Yelusalemu ati: “Tuini tutuke, pano kusi alapusuka kuli Abusalomu! Pitisyini, pano angatuzana pa mulandu ni ntete nu kuleta uzanzo pali sweswe nu kukoma antu mu musumba.”
15 Aomvi ya mwene yaswike iyati: “Vyonsi vino wapingula musambazi, avino swe yaomvi yako tumacita.”
16 Fwandi umwene wapisile na yonsi amu ng’anda yakwe, lelo wasile ya mama yakwe apa mbali 10 pakuti yasakamala ing’anda.
17 Umwene watwalilile nu ulendo wakwe ala na antu yonsi yakumulondela, nupya yaile iyapuuza pa Beti-mehaki.
18 Aomvi yakwe Devedi yonsi aali pamwi nawe alino na aonsi yonsi akonsile Itai ukufuma uku Gati, kuli kuti Aina Keleti yonsi, Aina Peleti yonsi, na Ina Gati 600 yapitanga pa nkoleelo ya mwene ala akuyaceeceta.
19 Lyene umwene wanenyile Itai Umwina Gati ati: “U mulandu ci uno ukupitila naswe? Swilila uku mwene umupya pano wafuma uku mpanga yuze nupya uutwike sile.
20 Nupya alino wizile sile likwene, uzye ndinzile ukukusenda walulumba pamwi naswe lino ntamanyile na kuno nkuya? Swilila pamwi na yonsi yano uli nayo, si Yeova aye nu kutemwa kwa cumi alino ni cisinka kuli wewe!”
21 Lelo Itai waswike umwene ati: “Nkulapa pali Yeova Leza wa umi na pa umi wako we musambazi wane, konsi kuno ulaya akuno nani ne muomvi wako ndaya, injipekanya sile nu kufwila pamwi naawe!”
22 Lino Devedi uvwile vivyo wanenyile Itai ati: “Twapita.” Fwandi Itai Umwina Gati wakonsile pamwi na yonsi yano wali nayo, na ana.
23 Antu yonsi umu mpanga yalilanga lino antu yaa yapitanga, nupya umwene wimiliile apiipi nu mukonko wa Kiduloni; antu yonsi yapitanga mu museo uwalungama uku lwanga.
24 Zadoki nawe kwene apano wali nupya wali na Ina Levi yonsi aasenzile Imbokosi ya Upangano yakwe Leza wa cumi; nupya isile Imbokosi ya Upangano yakwe Leza wa cumi pansi; na Abiata kwene apano wali lino antu yafumanga umu musumba.
25 Lelo umwene wanenyile Zadoki ati: “Swilizya Imbokosi ya Upangano yakwe Leza wa cumi mu musumba. Ndi cakuti intemwikwa kuli Yeova, nani kwene alanswilizya pakuti nkailole nu kulola muno ikaikala.
26 Nomba ndi cakuti walanda ukuti, ‘Ntakutemilwe,’ lyene alacita kuli nene vyonsi vino akulonda.”
27 Umwene wanenyile Zadoki simapepo ati: “Uzye asi wewe kalola? Wemo na Abiata swililini mu musumba mu mutende, nupya musende na ana inu, kuli kuti Aimaazi umwanako na Yonatani mwana Abiata.
28 Ndaalolela pa maulalo aya umupiipi nu lwanga kufika lino ndapokelela amazwi kufuma kuli mwemwe.”
29 Fwandi Zadoki na Abiata yaswilizye Imbokosi ya Upangano yakwe Leza wa cumi ku Yelusalemu, nupya yatwalilile ukwikala kuuku kwene.
30 Lino Devedi wakwelanga pa Mwamba wa Miolivi, walilanga ala wataivimba uku mutwe nupya wapitanga ala atazwite ivya ku ngazo. Na antu yonsi yano wali nayo yavimbiile uku mitwe nupya yalilanga ala yakutumbela umwamba.
31 Lyene Devedi yamunenyile iyati: “Aitofeli ali pa yantu aakuombela pamwi na Abusalomu.” Lino Devedi uvwile vivyo wapefile ati: “We Yeova si senula ukupanda mano kwakwe Aitofeli, kuye uwelewele.”
32 Lino Devedi wafisile papela pa mwamba pano antu yapepelanga Leza, wazanyile Husyai Umwina Aliki wataiza umu kumukomenkanya, ala ivyakuzwala vyakwe ivilepulwa nupya wali nu lukungu pa mutwe.
33 Nomba Devedi wamunenyile ati: “Ndi cakuti twapita swensi, umaya icisendo kuli nene.
34 Nomba ndi cakuti waswilila uku musumba nu kunena Abusalomu ukuti, ‘Nene muomvi wako we mwene. Mpiti nali nene muomvi wakwe tata wako, nomba paa lyene nene muomvi wako,’ ale ungangavwa ukuvulunganya mapange yakwe Aitofeli.
35 Ya simapepo, kuli kuti Zadoki na Abiata yalaya naawe. Ulinzile ukuyanena vyonsi vino uvwa umu ng’anda ya mwene.
36 Ulazana na anao yaili, kuli kuti Aimaazi mwana Zadoki na Yonatani mwana Abiata, nupya ali yano ulinzile ukutuma ukwizanena vyonsi vino uuvwa.”
37 Fwandi Husyai cuza wakwe Devedi waile umu musumba lino Abusalomu wingilanga umu Yelusalemu.
