Ibuku Lyakwe Ciili Lyakwe Samweli 17:1-29
17 Lyene Aitofeli wanenyile Abusalomu ati: “Leka nsoolole aonsi 12,000 nupya tumakonka Devedi usiku.
2 Namaya nkamuzane watatonta nupya atakweti maka, namaya nkamutiinye nupya antu yonsi yano yali nawe yamaya yakuutuke, nupya nayamukoma sile wenga.
3 Lyene namaya nkawezye antu yonsi kuli wewe. Ivimaya vikacitikile umuntu wino ukulonda i vimalenga antu yonsi ukuwela. Lyene antu yonsi yalaya nu mutende.”
4 Abusalomu na akalamba yonsi amu Izlaeli yatemilwe vino Aitofeli walanzile.
5 Nomba Abusalomu walanzile ati: “Amini Husyai Umwina Aliki, pakuti tuvwe vino nawe amalanda.”
6 Fwandi Husyai waile kuli Abusalomu. Lyene Abusalomu wamunenyile ati: “Aitofeli watalanda vii na vii. Uzye tucite vino watalanda? Nga asi vivyo, tucite uli?”
7 Husyai wanenyile Abusalomu ati: “Paa pene ukupanda mano kwakwe Aitofeli kusi ningo!”
8 Husyai watwalilile ukulanda ati: “Wamanya ukuti ya tata yako na antu yao yakwata maka, nupya iyakalipa wakwe beele uwataponzya utwana twakwe umu mpanga. Nupya, ya tata yako yamanya ulwi yasikuya pamwi na antu usiku.
9 Pa nsita yii ya tata yako iyafisama umwi cele nanti umu ncende yuze; nupya ndi cakuti aliyo yatandikilapo ukuzanza, aamauvwa yamalanda ukuti, ‘Antu yano ya kukonka Abusalomu yayacimvya!’
10 Nanti sile umuntu musipe wakwe cisama aluvwa intete, pano Aina Izlaeli yonsi yamanya ukuti ya tata yako yakwata maka nupya antu yao yasipa.
11 Nemo mano yano nkukupandako aeya: Leka Aina Izlaeli yonsi yakolongane ukufuma uku Dani kufika uku Belisyeba, yavule wa mucanga wa mu mbali yakwe yemba, nupya uyatungulule umu ulwi.
12 Tulazanza Devedi konsi kuno tulamuzana nupya tulamuunganila wakwe vino ulumi lukapona pa musili; nupya pali aliyo pasi nanti a wenga aalapusuka.
13 Ndi cakuti utukila umu musumba umwi Aina Izlaeli yonsi yalaya yakonone umusumba uwo, nupya tulaunyepelela ni ntambo nu kuutintila umu mukonko, kusi nanti acimwi icilasyala.”
14 Lyene Abusalomu na Ina Izlaeli yonsi yatiile: “Vino Husyai Umwina Aliki walanda vyazipa ukucila vino Aitofeli wali walanda!” Yeova walondesyanga ukuvulunganya ukupanda mano kwako Aitofeli pakuti Yeova angaleta intazi pali Abusalomu.
15 Pa cisila Husyai wanenyile ya simapepo, kuli kuti Zadoki na Abiata vino Aitofeli wapanzileko Abusalomu mano kumwi na akalamba ya mu Izlaeli na vino nawe wamupanzileko mano.
16 Nupya watiile: “Tumini zuwa akuya kuli Devedi nu kuyamucelula ukuti utikala pa maulalo ya mu lwanga ilelo usiku, ulambe uluzi, nga cisi vivyo wemo na antu yako yonsi mumakomwa.”
17 Yonatani na Aimaazi iikalanga umu Eni-logeli; pano yataali nu kulolekela umu musumba, fwandi umuomvi umukazyana waile ayanena ivyacitikanga, nayo yaile uku kunena Umwene Devedi.
18 Lelo umulumendo umwi wayaweni nupya waile anena Abusalomu. Fwandi Yonatani na Aimaazi yaile zuwa zuwa pa ng’anda ya muntu umwi uwikalanga umu Baulimu uwakweti icisima pa musolo. Yaile iingila umu cisima,
19 nupya umuci wa muntu wiyo wavimvilepo cimwi pa mulyango nu kwanikapo ingaano izipule; nupya kusi uwamanyile.
20 Aomvi yakwe Abusalomu yaile pa ng’anda ya mwanaci nu kumuzya iyati: “Uzye Aimaazi na Yonatani yali kwi?” Umwanaci waswike ati: “Iiza yapita, iyalungama uku luzi.” Lyene aonsi yayo yatandike ukuyalonda lelo yatayazanyile, fwandi yaswilile uku Yelusalemu.
21 Lino aonsi yapisile, Yonatani na Aimaazi yafumile umu cisima nu kuyanena Devedi iyati: “Katuka nu kulamba zuwa uluzi pano Aitofeli watapanda Abusalomu mano aipe pali wewe.”
22 Lilyo kwene sile Devedi na antu yonsi yano wali nayo yakatwike nu kulamba Uluzi Lwa Yodani. Lino wacanga, ala yonsi iyalamba Uluzi Lwa Yodani.
23 Lino Aitofeli waweni ukuti yatalondiile vino walanzile, wakwezile punda nu kuya uku ng’anda ukwakwe mu musumba uno wikalangamo. Pa cisila ca kunena amu lupwa lwakwe vino yaali nu kucita, waikulike. Fwandi wafwile nu kuziikwa ukwaziisilwe ivikolwe vyakwe.
24 Devedi waile uku Mahanaimu, Abusalomu nawe walamvile Uluzi Lwa Yodani, kumwi na Ina Izlaeli yonsi.
25 Abusalomu wasonsile Amasa kuti awino aangalila asilika kupyanikizya pali Yoabu; Amasa wali a mwana Itila Umwina Izlaeli uwapanzile icupo na Abigeo mwana Nahasyi, kaci wakwe Zeluya nyina wakwe Yoabu.
26 Aina Izlaeli na Abusalomu yapangiile inkambi umu Gilyadi.
27 Lino Devedi wafisile sile uku Mahanaimu, Syobi mwana Nahasyi ukufuma uku Laba ya Ina Amoni, Makili mwana Amiyeli ukufuma uku Lo-debali, na Bazilai Umwina Gilyadi ukufuma uku Logelimu
28 yaleesile ivitala, ya beseni, inyungu, ingaano, baale, fulaulo, ingaano izisalule, cilemba, ilanda, ingaano izyume,
29 uci, umukaka, ni mfwele, yaleesile ivyakulya vii vyonsi kuli Devedi na antu yakwe kuti yalye, pano yalanzile iyati: “Antu yali ni nzala nu lusala nupya iyatonta pa mulandu wa kupita umu lwanga.”
