Ibuku Lyakwe Ciili Lyakwe Samweli 2:1-32
2 Pa cisila Devedi uzizye kuli Yeova ati: “Uzye inje uku musumba onga pa misumba ya Yayuda?” Yeova nawe wamwaswike ati: “Yanga.” Lyene Devedi uzizye ati: “Aekwi kuno namaya?” Leza nawe wamwaswike ati: “Uye uku Hebuloni.”
2 Fwandi Devedi waile kuuku kwene pamwi na ya mama yakwe yoili, kuli kuti Ainoamu Umwina Yezileele na Abigeo uwali a muka Nabali Umwina Kalimeli lino Nabali atatala wafwa.
3 Devedi wasenzile na antu yano wali nayo, nupya cila muntu wali nu lupwa lwakwe, yaile iikala umu misumba iyazinguluka Hebuloni.
4 Lyene aonsi amu Yuda yaile kuli Devedi nu kumwitulwila mafuta pa mutwe pakuti aye umwene pa mutundu wakwe Yuda.
Yanenyile Devedi iyati: “Aonsi aku Yabesyi-gilyadi ali yano yaziisile Saulo.”
5 Fwandi Devedi watumile aakuyanena antu aku Yabesyi-gilyadi ukuti: “Si Yeova amupaale pano mwalanzile ukutemwa kwa cumi kuli Saulo umusambazi winu pa kumuziika.
6 Si Yeova atwalilile ukuya nu kutemwa kwa cumi kuli mwemwe, nani ndaya ni cikuuku kuli mwemwe pa mulandu na vino mwacisile.
7 Fwandi lyene komini, nupya muye asipe pano umusambazi winu Saulo watafwa, nupya amu mutundu wakwe Yuda iyanjitulwila mafuta pa mutwe pakuti inje umwene wao.”
8 Lelo Abineli mwana Neli mukalamba wa yasilika yakwe Saulo wasenzile Isyi-bosyeti mwana Saulo amulamvya uluzi nu kumutwala uku Mahanaimu,
9 nupya wamusonsile ukuya umwene pakuti aateeka Aina Gilyadi, Aina Asyuli, Aina Yezileele, Aina Efulemu, Aina Benjamini, na Ina Izlaeli yonsi.
10 Isyi-bosyeti mwana Saulo wali ni myaka 40 lino watandike ukuteeka Aina Izlaeli, nupya wateesile pa myaka iili. Nomba amu mutundu wakwe Yuda yene yatungililanga Devedi.
11 Devedi wateesile amu mutundu wakwe Yuda umu Hebuloni pa myaka 7 ni myezi 6.
12 Lino papisile insita Abineli mwana Neli na aomvi yakwe Isyi-bosyeti mwana Saulo yafumile uku Mahanaimu nu kuya uku Gibyoni.
13 Yoabu mwana Zeluya na aomvi yakwe Devedi nayo kwene yaile iyakomaana pa cifula cakwe Gibyoni; iumba lyonga likazile uku lusansa longa ulwa cifula ni umba lyuze nalyo likazile uku lusansa luze ulwa cifula.
14 Lyene Abineli wanenyile Yoabu ati: “Leka asilika yaye umu kulwa ale tukulolako.” Yoabu nawe waswike ati: “Leka yapita.”
15 Fwandi yakatwike nu kuya uku nkoleelo nupya yapenzilwe, Aina Benjamini pamwi na Isyi-bosyeti mwana Saulo yaali 12 alino na aomvi yakwe Devedi nayo yaali 12.
16 Yatandike ukulemana uku mitwe nupya cila muntu wafumizye ulupanga lwakwe nu kutota umulwani wakwe umu mbazo, nupya yonsi yafwilile pamwi. Fwandi incende iiya iyayelile umu Gibyoni, yayamile ukuti Helekati-hazulimu.
17 Ulwi wakomile sana pa wanda uuwa, nupya aomvi yakwe Devedi yacimvizye Abineli na asilika ya Ina Izlaeli.
18 Zeluya wakweti ana aonsi yatatu, kuli kuti Yoabu, Abisyai, na Asaeli; Asaeli wasimulanga sana kwati a mpombo wa mu mpanga.
19 Asaeli wazinginye Abineli nupya ataapalukiile ukwi lunji nanti kuli cimani lino wamuzinganyanga.
20 Lino Abineli wapeepiile, uzizye ati, “Uzye a wewe Asaeli?” Asaeli nawe waswike ati, “Ee, a nene kwene.”
21 Lyene Abineli wanenyile Asaeli ati: “Palukila ukwi lunji nanti kuli cimani nu kulema umusilika wenga, nupya utole icili consi cino umapoka kuli aliwe.” Lelo Asaeli ataatile ukumuzinganya.
22 Abineli nupya kwene wanenyile Asaeli ati: “Ta ukunzinganya. Ndi cakuti nakukoma nimaya nkazewane kuli Yoabu solenzi.”
23 Nomba wakanyile ukwimilila, fwandi Abineli wamutosile umu lunda ni sumo nupya isumo lyapuzinkinye ilifumila uku nsizi nupya waponyile nu kufwa papo kwene. Na yonsi apitanga pa ncende ino Asaeli waponiilepo nu kufwa, yatalanga iimilila papa kwene.
24 Lyene Yoabu na Abisyai yazinginye Abineli. Lino ilanzi lyawanga, yafisile pa kamwamba ka Ama akalozyanya ni ncende iya Giya umu nzila iyapita uku lwanga ulwa Gibyoni.
25 Nupya Aina Benjamini yakolongine ala iyazinguluka Abineli, yapanzile iumba lyonga nupya imiliile papela ya kamwamba kauze.
26 Lyene Abineli wapundiliile Yoabu ati: “Uzye mumatwalilila ukulwisyanya ukufika lilaci? Uzye utamanyile ukuti ivimafumamo vimaipa sana? Uzye a lilaci lino umanena antu kuti yate ukuzinganya ina yao?”
27 Lyene Yoabu walanzile ati: “Nkulapa umwi zina lyakwe Leza wa cumi nupya uwa umi ukuti, ndi cakuti ukana ukulanda, antu nga iyatwalilila ukuzinganya aina yao ukufika katondo.”
28 Lyene Yoabu walizizye ipenga, na antu yakwe yatiile ukuzinganya Aina Izlaeli nu ulwi wasizile.
29 Abineli na antu yakwe yapisile umu Alaba usiku uuwa onsi, yalamvile Uluzi Lwa Yodani nupya yapisile umu mukonko onsi suka iyaya iyafika uku Mahanaimu.
30 Pa cisila cakuti Yoabu wata ukuzinganya Abineli, wakolonganike antu yonsi. Pa yaomvi yakwe Devedi puliile aali 19 kulunda pali Asaeli.
31 Lelo aomvi yakwe Devedi yacimvizye Aina Benjamini na antu yakwe Abineli, nupya asilika yao 360 yafwile.
32 Yasenzile icitumbi cakwe Asaeli nupya yaile iyamuziika umwi lindi lyakwe isi, ilyayela uku Betelemu. Lyene Yoabu na asilika yakwe yapisile usiku onsi nupya yaile iyafika uku Hebuloni lino ilanzi lyatunka.
