Ibuku Lyakwe Ciili Lyakwe Samweli 21:1-22
21 Lyene kwizile ikuya icipowe umu manda yakwe Devedi pa myaka itatu, fwandi Devedi uzizye Yeova, nupya Yeova waswike ati: “Saulo na amu ng’anda yakwe yali nu mulandu wa wazi pa mulandu wakuti Saulo wakomile Aina Gibyoni.”
2 Fwandi umwene wamile Aina Gibyoni nu kulanda nayo. (Aina Gibyoni yataali Aina Izlaeli lelo yaali Aina Amoli aasileko, nupya Aina Izlaeli yalafile ukuti yataali nu kuyakoma, nomba Saulo walondanga ukuyakoma pa mulandu wakuti walondesyanga ukwazwilizya Aina Izlaeli na Ayuda.)
3 Devedi uzizye Aina Gibyoni ati: “I vyani vino ningamucitila, nupya ningafumyapo uli umulandu uu uwa wazi, pakuti mupaale antu yakwe Yeova?”
4 Aina Gibyoni yaswike Devedi iyati: “Tusikulondekwa ukulipilwa siuva nanti goldi pali vino Saulo na amu ng’anda yakwe yatucitiile; nupya tusikulonda ukukoma Umwina Izlaeli ali wensi.” Devedi nawe walanzile ati: “Vyonsi vino mumalanda nimamucitila.”
5 Nayo yanenyile umwene iyati: “Umuntu uwalondanga ukutulovya umu Izlaeli—
6 ana yakwe aonsi 7 yapeelwe kuli sweswe. Tumakulika imiili yao* pa nkoleelo yakwe Yeova mu Gibeya, mu mpanga yakwe Saulo wino Yeova wasoolwile.” Lyene umwene walanzile ati: “Namayapeela kuli mwemwe.”
7 Lelo umwene walanzile icikuuku kuli Mefibosyeti mwana Yonatani umwana wakwe Saulo, pa mulandu nu mulapo uno Devedi na Yonatani mwana Saulo yalafile pa nkoleelo yakwe Yeova.
8 Fwandi umwene wasenzile Alimoni na Mefibosyeti ana yaili yakwe Lizipa mwana Aiya, yano waviile kuli Saulo, nupya wasenzile ana aonsi 5 yakwe Mikala* mwana Saulo yano waviile kuli Adilieli mwana Bazilai Umwina Mehola.
9 Lyene wayapeezile uku Ina Gibyoni, nayo yayakomile nu kukulika ivitumbi vyao pa mwamba pa nkoleelo yakwe Yeova. Yonsi 7 yafwilile pamwi; yakomilwe umu manda ya kutandikilapo ukuzombola, kuli kuti kuzombola baale.
10 Lyene Lizipa mwana Aiya watozile icakuzwala ca kulangilamo ulanda nu kucanza pa ciliwe, kufuma pano uzombozi watandikile kufika pano imvula yatandikile ukutonyezya pa vitumbi; atalesile ivyunyi ukuwila pa vitumbi umusanya nanti ivilyanyi vya mu mpanga ukupalamila pa vitumbi usiku.
11 Yanenyile Devedi vino Lizipa mwana Aiya umuci wa pa mbali wakwe Saulo wacisile.
12 Devedi waile asenda mafupa yakwe Saulo na mafupa yakwe Yonatani umwanakwe uku ntunguluzi* zya mu Yabesyi-gilyadi izivile mafupa yayo mu musolo wa musumba wa Beti-syani, muno Aina Filisti yakulikiile Saulo na Yonatani pa wanda uno yayakomile umu Giliboa.
13 Wafumizye mafupa yakwe Saulo na mafupa yakwe Yonatani kuuku, nupya yakolonganike na mafupa aa yantu aakulikwe.
14 Lyene yaziisile mafupa yakwe Saulo na yakwe Yonatani umwanakwe umu mpanga yakwe Benjamini umu Zela umwi lindi lyakwe Kisyi isi wakwe Saulo. Pa cisila ca kucita vyonsi vino umwene wayanenyile, Leza uvwile vino amu mpanga yalenzile.
15 Nupya kwene kwizile ikuya ulwi pa Ina Filisti na Ina Izlaeli. Fwandi Devedi na aomvi yakwe yaile umu kulwisya Aina Filisti, lelo Devedi watonsile.
16 Isyibi-benobu uwa mu lupwa lwa Ina Lefa uwakweti isumo lyakwe koopa, ilyafinyile ukucila pa makilogilamu yatatu* nupya uwakweti ulupanga ulupya, walondanga ukukoma Devedi.
17 Lilyo kwene sile Abisyai mwana Zeluya waile aazwa Devedi nupya wazanzile Umwina Filisti nu kumukoma. Lyene aomvi yakwe Devedi yalafile kuli Devedi iyati: “Utalinzile ukupita naswe umu ulwi! Nupya utalinzile ukuzimya lampi wa Ina Izlaeli!”
18 Pa cisila, nupya kwene ulwi wakatwike pa Ina Filisti uku Gobi. Pa nsita kwene iiyo Sibekai Umwina Husya wakomile Safu uwa mu lupwa lwa Ina Lefa.
19 Nupya kwene ulwi wakatwike pa Ina Filisti uku Gobi, nupya Elianani mwana Yaale-olegimu Umwina Betelemu wakomile Golyati Umwina Gati uwali ni isumo ilyakweti icilemelo kwati icimuti cakwe ya kapikula.
20 Nupya kwene ulwi wakatwike uku Gati ukwali umuntu umwi uwali ipombolo, wakweti iminwe 6 ukwi kasa lyonga na lyonga, ni vikando 6 uku lwazo longa na longa, vyonsi pamwi vyali 24, nupya nawe kwene wali uwa mu lupwa lwa Ina Lefa.
21 Watwalilile ukutumfya Aina Izlaeli, fwandi Yonatani mwana Syimei umwina wakwe Devedi wamukomile.
22 Antu yaa 4 yaali amu lupwa lwa Ina Lefa umu Gati, nupya Devedi na aomvi yakwe aayakomile.
Mafutunoti
^ Kuli kuti “kuyavunola makasa na makulu.”
^ Nanti limwi, “Melabu.”
^ Nanti limwi, “uku ineco ya mpanga.”
^ Mu Ciebele: “Masyekele 300.” Lolini Ivyeo na Vyuze pa B14.
