Ibuku Lyakwe Ciili Lyakwe Samweli 23:1-39
23 Mazwi ya kusyalikizya yano Devedi walanzile aeya:
“Mazwi yakwe Devedi mwana Yese,Nupya mazwi ya muntu uwacindamikwe,Umusoololwe wakwe Leza wakwe Yakobo,Uwamanyikisya ukwimba inyimbo zyakwe Izlaeli.
2 Umupasi wakwe Yeova walandiile muli nene;Mazwi yakwe yaali pa lulimi lwane.
3 Leza wa Ina Izlaeli walanzile;Leza uwaya wa ciliwe ca Ina Izlaeli wanenyile ati:
‘Ndi cakuti wino akuteeka antu u mulungami,Kuli kuti aakatiina Leza lino akuteeka,
4 Ukuteeka kwakwe kwaya wa luswepo lwa katondo,Ulukayako lino ilanzi lyatunka.
Kuli kuti katondo akaula makumbi.Nupya kwaya wa luswepo ulukayako pa cisila ca mvula,
Ulukalenga isote ukumela umu musili.’
5 Uzye vivyo asi avino ulupwa lwane lwaya kuli Leza?
Pano Leza wapangana nani upangano wa manda pe,Waupekanya ningo nu kuucingilila.
Pa mulandu wakuti ali muno nkapusukila nu kusansamukila,Ali mulandu kwene uno akapaalila ulupwa lwane.
6 Lelo antu awelewele yonsi iyasumbwa wa myunga,Pano itanga isendwe uku minwe.
7 Pakuti umuntu aleme imyunga,Alinzile ukuomvya icela ni isumo,Nupya ilinzile ukocelwa pa ncende kwene ino yayelapo.”
8 Asilika yakwe Devedi aamaka, mazina yao aeya: Yosyebu-basyebeti Umwina Takimoni uwali umukalamba pa yasilika ya maka yatatu. Wakomile antu 800 umu ulwi sile onga ukuomvya isumo lyakwe.
9 Lyene pali aliwe palondelile Elieza mwana Dodo, mwana Ahoi uwali pa yasilika ya maka yatatu aali na Devedi lino yatumfyanga Aina Filisti. Yakolongine uku ulwi, nupya lino Aina Izlaeli yutwike,
10 Wasifile nu kutwalilila ukukoma Aina Filisti mpaka ikasa lyakwe ilitonta lelo ataalekiileko uku lupanga. Fwandi Yeova wazwile Aina Izlaeli ukucimvya pa wanda uuwa; nupya antu autwike yawezile nu kutandika ukutola ivintu ivya yantu aakomilwe.
11 Lyene palondelile Syama mwana Age Umwina Halali. Yakomenkine uku Lehi ukwali icalo ci landa; nupya Aina Izlaeli yutwike Aina Filisti.
12 Lelo Syama wimilile pakasi ka calo nu kucicingilila, nupya watwalilile ukukoma Aina Filisti icakuti Yeova wamwavwile ukucimvya.
13 Mu nsita ya kuzombola, yatatu pa ntunguluzi 30 yaile ukwi cele lya Adulamu ukwali Devedi, nupya Aina Filisti yapangiile inkambi mu Mukonko wa Ina Lefa.
14 Devedi wali muno wafisime, nupya asilika yamwi Aina Filisti yapangiile inkambi umu Betelemu.
15 Lyene Devedi walanzile ati: “Ninguvwa ningo sana ndi cakuti namwile manzi aaya umu cisima icaya umupiipi ni mpongolo ya musumba wa Betelemu!”
16 Lyene asilika yatatu aamaka yaile iingila umu nkambi ya Ina Filisti uku maka, nupya yaile iyatapa manzi umu cisima icayelile umupiipi ni mpongolo ya musumba wa Betelemu nu kutwalila Devedi; lelo Devedi wakanyile ukumwa manzi yayo nupya waitiile pansi pa nkoleelo yakwe Yeova.
17 Walanzile ati: “We Yeova nemo ntanga incite icintu ca musango uu! Uzye imwe uwazi wa yantu ali iika maumi yao umu uzanzo?” Fwandi Devedi wakanyile ukumwa manzi yayo. Vikwene ali vino asilika yakwe yatatu aamaka yacisile.
18 Abisyai umwina wakwe Yoabu mwana Zeluya wali pa yasilika na yauze yatatu; u watungulanga auze; wakomile antu 300 ni isumo, nawe kwene wamanyikwe kwati avino asilika ya maka yatatu yamanyikwe.
19 Nanti icakuti u walumbwike pa yauze yotatu nupya aliwe wayatungululanga, ataakweti icifulo icalingine na cino asilika yatatu akutandikilako yakweti.
20 Benaya mwana Yeoyada wali u monsi umusipe uwaomvile imilimo ya maka mu Kabizeele. Wakomile ana aonsi yaili yakwe Alyeli uwa ku Moabu, nupya wingiile umu ciwina pa wanda uno kwali usu wa mvula nu kukoma cisama.
21 Wakomile nu monsi umwi Umwina Ijipti uwali ipombolo nanti cakuti Umwina Ijipti wakweti isumo, Benaya waile kuli aliwe ala ali ni ntuwa, waile asompola isumo uku Mwina Ijipti nupya wamukomile ni isumo kwene lilyo.
22 Vikwene ali vino Benaya mwana Yeoyada wacisile, nupya nawe kwene wamanyikwe wakwe vino aonsi yatatu aamaka yamanyikwe.
23 Nanti cakuti walumbwike ukucila asilika yaya 30, ataakweti icifulo icalingine na asilika yatatu. Lelo Devedi wamusonsile ukuya pali yano yamulindanga.
24 Asaeli umwina wakwe Yoabu nawe kwene wali pa yasilika 30, asilika yayo aeya: Elianani mwana Dodo uwa ku Betelemu,
25 Syama Umwina Halodi, Elika Umwina Halodi,
26 Helezi Umwina Peleti, Ila umwana wakwe Ikesyi Umwina Tekoa,
27 Abi-eza Umwina Anatoti, Mebunai Umwina Husya,
28 Zalimoni Umwina Ahoi, Maalai Umwina Netofa,
29 Helebu mwana Baana Umwina Netofa, Itai mwana Libai uwa ku Gibeya umusumba wa Ina Benjamini,
30 Benaya Umwina Pilatoni, Hidai uwa ku mikonko iya Gaasyi,
31 Abi-aliboni Umwina Alaba, Azimaveti Umwina Baulimu,
32 Elyaba Umwina Syaaliboni, ana aonsi yakwe Yasyeni, Yonatani,
33 Syama Umwina Halali, Ahiyamu mwana Syalali Umwina Halali,
34 Elifeleti mwana Ahasibai, Ahasibai wali umwana wa Mwina Maakati, Elyamu mwana Aitofeli Umwina Gilo,
35 Hezilo Umwina Kalimeli, Paalai Umwina Alibi,
36 Igali mwana Natani uwa ku Zoba, Bani Umwina Gadi,
37 Zeleki Umwina Amoni, Nahalai Umwina Beeloti uwasendelanga Yoabu mwana Zeluya ivyanzo,
38 Ila Umwina Itili, Galebu Umwina Itili,
39 na Uliya Umwina Hiti, yonsi pamwi yaali 37.
