Ibuku Lyakwe Ciili Lyakwe Samweli 24:1-25
24 Nupya kwene ukali wakwe Yeova wizile pa Ina Izlaeli lino umwi watunsile Devedi ati: “Yanga ukapende Aina Izlaeli na Ayuda.”
2 Fwandi umwene wanenyile Yoabu umukalamba wa yasilika uwali nawe ati: “Yanga umu mitundu ya Ina Izlaeli yonsi, kutandikila uku Dani kufika uku Belisyeba, ukapende antu pakuti imanye impendwa ya yantu.”
3 Lelo Yoabu wanenyile umwene ati: “Si Yeova Leza wako avuzye antu imiku 100, nupya si umusambazi wane alole vino Leza amacita, nomba u mulandu ci uno umusambazi wane akulondela ukucita icintu cii?”
4 Lelo mazwi ya mwene yakweti sana maka kucila mazwi yakwe Yoabu na akalamba ya yasilika. Fwandi Yoabu na akalamba ya yasilika yafumile uku mwene nu kuya umu kupenda Aina Izlaeli.
5 Yalamvile Uluzi Lwa Yodani nu kuyapangila inkambi uku Aloeli ukwi lunji* lya musumba pakasi ka mukonko, nupya yalungime lwa ku Ina Gadi alino ni ncende iya Yazeli.
6 Ukufuma kuko yaile uku Gilyadi nu ku mpanga iya Tatimu-hodisyi nupya yaile uku Dani-yani nupya yaile iyazinguluka ni mpanga iya Sidoni.
7 Lyene yaile uku Tuli ku musumba uwacingililwa ni linga alino nu mu misumba yonsi iya Ina Hivi na Ina Kenani, nupya yaile iingila umu Negebu, umusumba uwa Yayuda uku Belisyeba.
8 Fwandi yapisile umu mpanga yonsi, nupya yawezile uku Yelusalemu pa cisila ca myezi 9 na manda 20.
9 Lyene Yoabu wapeezile umwene impendwa ya yantu aalemvilwe. Asilika Aina Izlaeli aakweti ya panga yaali 800,000, na Ayuda yaali 500,000.
10 Nomba pa cisila lino Devedi wamala ukupenda antu kampingu watandike ukumucuzya. Lyene wanenyile Yeova ati: “Injembuka sana pa kucita icintu cii. Fwandi we Yeova si unjelele ne muomvi wako pano incita icintu ca uwelewele sana.”
11 Lino Devedi wazyusile katondo, Yeova wanenyile Gadi kasesema uwalolelanga Devedi ivilolwa ati:
12 “Yanga kanene Devedi uti, ‘Yeova walanda wati: “Namakunena ivintu vitatu. Usoololepo conga cino ndinzile ukuleta pali wewe.”’”
13 Fwandi Gadi waile kuli Devedi nu kumunena ati: “Uzye ndete icipowe umu mpanga yako pa myaka 7? Nanti limwi uce uwautuka alwani yako pa myezi itatu ale yakukuzinganya? Nanti limwi nkalete icikuko umu mpanga yako pa manda yatatu? Elenganyapo ningo sana pakuti unene ivya kuyanena uwatantuma.”
14 Fwandi Devedi wanenyile Gadi ati: “Indi sana nu ulanda. Leka Yeova aliwe atukome pano wene wakwata sana uluse; ukucila ukuti antu aliyo yankome.”
15 Lyene Yeova watumile icikuko uku Ina Izlaeli ukufuma katondo ukufika pa nsita iyapimilwe, icakuti antu 70,000 kufuma uku Dani kufika uku Belisyeba yafwile.
16 Lino malaika watambalike ikasa lyakwe pa musumba uwa Yelusalemu kuti aonone, Yeova uvwile uyi pa cikuko cino waleesile, nupya wanenyile malaika uwakomanga antu ati: “Casila! Ponya ikasa.” Malaika wakwe Yeova wali umupiipi nu lwano lwakwe Alauna Umwina Yebusi.
17 Lino Devedi waweni malaika uwakomanga antu, wanenyile Yeova ati: “Anene nayembwike, nupya nene naluvyanyizye; nomba uzye i vyani vino imfwele zii izicita? Si leka ikasa lyako liye pali nene na pa ya mu ng’anda yakwe tata.”
18 Fwandi Gadi waile kuli Devedi pa wanda uuwa nu kumunena ati: “Yanga ukapangile Yeova ulambo pa lwano lwakwe Alauna Umwina Yebusi.”
19 Devedi wapisile ukulingana na mazwi yano Yeova wanenyile Gadi.
20 Lino Alauna waweni umwene na aomvi yakwe yakuya kuno wali, lilyo kwene sile waile afupama pa nkoleelo ya mwene.
21 Alauna uzizye ati: “U mulandu ci uno umusambazi wane wizila kuli ne muomvi wakwe?” Devedi nawe waswike ati: “Iniza umu kukala ulwano lwako pakuti nkuulilepo Yeova ulambo, pakuti icikuko icaticiza pa Ina Izlaeli cisile.”
22 Lelo Alauna wanenyile Devedi ati: “Si umusambazi wane atole ulwano nu kupeelelapo ilambo ilili lyonsi. Ing’ombe zya kupeela ilambo lya koca aezi, ni ca kupuulilako ni yoko ivya kupembelako umoto aevi.
23 We mwene ivintu vyonsi vii nakupeela.” Lyene Alauna wanenyile umwene ati: “Si Yeova Leza wako akupaale.”
24 Lelo umwene wanenyile Alauna ati: “Awe, ndinzile ukukala vyonsi. Nsikupeela malambo ya koca kuli Yeova Leza wane ukwaula ukulipila icili consi.” Fwandi Devedi wakazile ulwano ni ng’ombe pa masyekele* 50 yakwe siuva.
25 Nupya Devedi wakuulile Yeova ulambo pa ncende kwene iiya nu kupeelelapo malambo ya koca na malambo ya mutende. Lyene Yeova uvwile vino Devedi wapaapatileko antu, nupya icikuko cafumile pa Ina Izlaeli.
Mafutunoti
^ Nanti “uku kaeya.”
^ Syekele wenga angalingana na magilamu 11.4. Lolini Ivyeo na Vyuze pa B14.
