Ibuku Lyakwe Ciili Lyakwe Samweli 3:1-39
3 Inkondo yatwalilile pa ya mu ng’anda yakwe Saulo na pa ya mu ng’anda yakwe Devedi; nupya Devedi wakwatilangako maka, lelo amu ng’anda yakwe Saulo yene yacepelwanga maka.
2 Mu kuya kwa nsita Devedi wizile akwata ana aonsi mu Hebuloni. Iyeli lyakwe wali a Amunoni uwaviilwe muli Ainoamu Umwina Yezileele.
3 Wakwe ciili wali a Kilyabu uwaviilwe muli Abigeo uwalipo muka Nabali Umwina Kalimeli; na wakwe citatu wali a Abusalomu uwaviilwe muli Maaka umwana umukazyana wakwe Talimai umwene wa ku Gesyuli.
4 Uwalenga 4 wali a Adoniya uwaviilwe muli Hagiti, nu walenga 5 wali a Syefatiya uwaviilwe muli Abitali.
5 Uwalenga 6 a Itilyamu uwaviilwe muli Egila umuci wakwe Devedi. Yakwene ali yana yano Devedi wavyaliile umu Hebuloni.
6 Nanti cakuti ulwi watwalilile pa ya mu ng’anda yakwe Saulo na amu ng’anda yakwe Devedi, Abineli watwalilile ukukwatilako amaka pa ya mu ng’anda yakwe Saulo.
7 Saulo wakweti umuci na muze uwi zina lyakuti Lizipa mwana Aiya. Pa cisila Isyi-bosyeti uzizye Abineli ati: “U mulandu ci uno wapangiile icupo nu muci wakwe ya tata?”
8 Abineli wasosile sana pa mazwi yano Isyi-bosyeti walanzile nupya watiile: “Uzye nene mutwe wakwe simbwa uwa mu mpanga ya mutundu wakwe Yuda? Kufika ni lelo natwalilila ukuya nu kutemwa kwa cisinka ku ya mu ng’anda yakwe Saulo tata wako nu ku ina yakwe alino na kuli ya cuza yakwe, ntatala na kupondokela nu kukupeela kuli Devedi; alino ilelo wampeela umulandu pa mulandu wa mwanaci.
9 Si Leza amfulule nupya acizye napo ndi cakuti nsikucitila Devedi wakwe vino Yeova walafile ukuti:
10 alapoka uwene uku ya mu ng’anda yakwe Saulo nu kuleka ukuti Devedi awino ateeka Aina Izlaeli na Ayuda, kutandikila uku mpanga iya Dani kufika ku Belisyeba.”
11 Isyi-bosyeti ataswike Abineli cili consi, pano wamutiinanga.
12 Lilyo kwene Abineli watumile antu aakuyanena Devedi ukuti: “Uzye umwineco wa mpanga a weni?” Nupya walanzile nu kuti: “Pangana nani upangano nupya ndacita icili consi cino ningakwanisya pakuti impanga iya Ina Izlaeli yonsi iye iyako.”
13 Devedi nawe waswike ati: “Cili sile ningo! Namapangana upangano nawe. Lelo cintu sile conga cino nimakulenga i cakuti pakuti uce ulolane nani suka wiza na Mikala, umwana umukazyana wakwe Saulo.”
14 Lyene Devedi watumile antu kuli Isyi-bosyeti mwana Saulo, akuyamunena ukuti: “Mpeele Mikala mamane wino nataisye lino nalipiile inkanda 100 zya kumpela ya onsi zya Ina Filisti.
15 Fwandi Isyi-bosyeti watumile akuyasenda Mikala kuli iya Palitieli mwana Laisyi.
16 Lelo iya watandike ukumulondela ala akulila mpaka aya afika uku Baulimu. Lyene Abineli wamunenyile ati: “Swilila!” Nawe waswilile.
17 Lyene Abineli watumile akuyanena akalamba ya mu Izlaeli ukuti: “Pa nsita imwi mwalondanga ukuti Devedi aye umwene winu.
18 Fwandi lyene citini vivyo kwene pano Yeova wanenyile Devedi ati: ‘Ndaomvya Devedi umuomvi wane uku kupususya Aina Izlaeli antu yane uku Ina Filisti nu ku yalwani yao yonsi.’”
19 Lyene Abineli walanzile na Ina Benjamini. Nupya waile uku Hebuloni nu kuyalanda na Devedi uku mbali pali vino Aina Izlaeli na amu ng’anda yakwe Benjamini yonsi yazumilizyanyizye.
20 Lino Abineli wafisile kuli Devedi ku Hebuloni ala ali na aonsi 20, Devedi wapangiile Abineli na aonsi yano wali nayo umutebeto.
21 Lyene Abineli wanenyile Devedi ati: “Musambazi wane, leka napita nkakukolonganikile Aina Izlaeli yonsi pakuti yapangane naawe upangano na pakuti ukaye umwene pa yantu yonsi yano ukulonda.” Devedi walesile ukuti Abineli apite, nupya wapisile umu mutende.
22 Pa nsita kwene iiyo ala alino Yoabu na aomvi yakwe Devedi yaciwela ukufuma umu kuzanza ala yali ni vintu ivingi vino yaposile. Pa nsita iiya Abineli ataali na Devedi mu Hebuloni pano ala watamuleka ukuti apite umu mutende.
23 Lino Yoabu na asilika yano wali nayo yonsi yafisile, Yoabu yamunenyile iyati: “Abineli mwana Neli iwaya uku mwene, nupya umwene iwaleka ukuti apite umu mutende.”
24 Fwandi Yoabu waile uku mwene nu kumuzya ati: “U mulandu ci uno iwacitila vii? Abineli iwiza kuli wewe, u mulandu ci uno iwalekela ukuti apite?
25 Uzye utamanya vino Abineli mwana Neli waya! Iwiza umu kukubepa pakuti amanye vyonsi pali wewe alino nu kulondelezya vyonsi vino ukucita.”
26 Lyene Yoabu wafumile pali Devedi nupya watumile antu aakuti yakonke Abineli, yaile iyamuwezezya pa cifula ca Sila; nomba Devedi atamanyile ivyacitikanga.
27 Lino Abineli waswilile uku Hebuloni, Yoabu wasenzile Abineli pa mbali mukasi ka mpongolo pakuti alande nawe. Nomba Yoabu watosile Abineli kuuku kwene nupya wafwile; wacisile vivyo pa mulandu wakuti Abineli wakomile Asaeli umwina wakwe Yoabu.
28 Lino Devedi wizile auvwa vivyo, walanzile ati: “Nemo ndaya uwa kaele kuli Yeova kumwi nu ku wene wane ntalakwata mulandu wa wazi pali Abineli mwana Neli kumwi nu wene wane.
29 Si umulandu uye pa mutwe wakwe Yoabu na pa ya mu ng’anda yakwe isi yonsi. Si umonsi wensi uwa mu ng’anda yakwe Yoabu ataca ate ukucula uku ulwale wa kufuma vimwi ku vyanzwalo nanti uku ulwale wakwe tembwe nanti uku kulemala nanti ukukomwa umu nkondo nanti uku kuulizya ivyakulya!”
30 Fwandi Yoabu na Abisyai umwinakwe yakomile Abineli pa mulandu wakuti wakomile Asaeli umwinao mu nkondo ku Gibyoni.
31 Lyene Devedi wanenyile Yoabu na antu yonsi ali nawe ati: “Lepulini vyakuzwala vinu nu kuzwala masaka nupya muloosye Abineli.” Umwene Devedi nawe kwene wafumile akulondela icintamba apaali citumbi cakwe Abineli.
32 Yaziisile Abineli mu Hebuloni nu mwene wamuloosizye sana pi lindi lyakwe, na antu yonsi yamuloosizye.
33 Umwene Devedi wasisile ulwimbo lwa kuloosya Abineli watiile:
“U mulandu ci uno Abineli wafwila kwati umuwelewele?
34 Makasa yako yatanyefilwe,Na makulu yako yatanyefilwe muli ya ceni.
Watufwa wakwe wino iyakoma uku vipondo.”
Lino antu yonsi yuvwile vivyo yamuloosizye nupya kwene.
35 Pa cisila antu yonsi yaile umu kupeela Devedi ivyakulya pakuti yamuteekezye ala ucili umusanya, lelo Devedi walafile ati: “Si Leza amfulule nupya acizye napo ndi cakuti nalya ivyakulya ivili vyonsi lino ilanzi litatala lyawa!”
36 Antu yonsi yaweni vino Devedi wacisile nupya yuvwile ningo. Antu yonsi yuvwile ningo wakwe viivi kwene vino yuvwanga ningo pali vyonsi vino umwene wacitanga.
37 Fwandi antu yonsi kumwi na Ina Izlaeli yonsi yamanyile pa wanda uuwa ukuti umwene asi aliwe walenzile ukuti Abineli mwana Neli akomwe.
38 Lyene umwene uzizye aomvi yakwe ati: “Uzye mutamanyile ukuti cilolo nupya umuntu mucindikwe watafwa ilelo umu Izlaeli?
39 Ilelo nene mutonte nanti cakuti nene umwene umusoololwe, aonsi yaa, kuli kuti ya mwana Zeluya ankalwe sana. Si Yeova alambule umwipe ukulingana ni vicitwa vyakwe.”
