Ibuku Lyakwe Ciili Lyakwe Samweli 4:1-12
4 Lino Isyi-bosyeti mwana Saulo uvwile ukuti Abineli watafwa umu Hebuloni, maka yasizile nupya Aina Izlaeli yonsi yasakamile.
2 Kwali aonsi yaili atungululanga maumba azanzanga antu, maumba yayo yaali akwe mwana Saulo: wenga pa yonsi yayo wali a Baana nu muze wali a Lekabu. Yaali aa mwana Limoni umwina Beeloti uwa mu mutundu wakwe Benjamini. (Pano incende ya Beeloti nayo kwene yaipendelanga pa mpanga ya Ina Benjamini.
3 Aina Beeloti yutukiile uku Gitaimu nupya yaaya aenyi kuuku kwene kufika na ndakai.)
4 Yonatani mwana Saulo wakweti umwana umonsi uwali umulemale makulu. Wali ni myaka 5 lino ilyasi lyuvwisile ukufuma uku Yezileele ilyakuti Saulo na Yonatani iyafwa, nupya umwanaci uwamusakamalanga wamunyemwile nu kuutuka, nomba lino umwanaci utukanga ala watauvwa intete, umwana waponyile nu kulemala. Izina lyakwe wali a Mefibosyeti.
5 Ya mwana Limoni Umwina Beeloti, kuli kuti Lekabu na Baana yaile uku ng’anda yakwe Isyi-bosyeti umusanya ala ikukaya, pa nsita ino Isyi-bosyeti wapuuzanga.
6 Ingiile umu ng’anda kwati yakulonda ukusenda ingaano, yatosile Isyi-bosyeti mu lunda; lyene Lekabu na Baana umwinakwe yutwike.
7 Lino ingiile umu ng’anda, yazanyile Isyi-bosyeti watalaala pali bedi kukasi, lyene yamutosile nu kumukoma, nupya pa cisila yamuputwile umutwe, lyene yasenzile umutwe nu kupita usiku onsi mu museo uwalungama uku Alaba.
8 Yatwazile umutwe wakwe Isyi-bosyeti kuli Devedi ku Hebuloni nu kunena umwene iyati: “Umutwe wakwe Isyi-bosyeti mwana Saulo mulwani wako uwalondanga uku kukoma aewu. Ilelo Yeova watakulandwila musambazi pali Saulo na pa ya mu ng’anda yakwe.”
9 Nomba Devedi waswike Lekabu na Baana umwinakwe, ya mwana Limoni Umwina Beeloti ati: “Nkulapa pali Yeova Leza wa umi uwampuswisye umu ntazi zyonsi ukuti,
10 lino umwi wanenyile ukuti, ‘Saulo watafwa,’ ala akwelenganya ukuti wene akuneena ilyasi lisuma, namulemile nu kumukomela umu Zikilagi. Cikwene ali cilambu cino kaleta wi lyasi wiyo wapokelile!
11 Nga lyene cimapela kwi uku yantu aipe atiyakoma umuntu mulungame umu ng’anda yakwe pali bedi yakwe kwene! Namalandula pali vino imumukoma, mumafwa.”
12 Lyene Devedi wanenyile asilika kuti yakome Lekabu na Baana. Yayaputwile ivizanza ni ngazo nu kuyakulika mupiipi ni cifula icayelile umu Hebuloni. Lelo yasenzile umutwe wakwe Isyi-bosyeti nu kuyauziika uku ncende ino yaziisileko Abineli ku Hebuloni.
