2 Timoti 2:1-26
2 Fwandi wemo mwanane, twalilila ukuya na maka umu cikuuku cikulu icaya muli Klistu Yesu;
2 nupya ivintu vino uvwile ukufuma kuli nene, vino yakambone aingi yaasininkizye, ivintu vii uvipeele uku yonsi aacisinka aalafikapo ukusambilizya yauze.
3 Vino wewe musilika wakwe Klistu Yesu, ipekanye ukucula uku viipe.
4 Umuntu aakaingila usilika asiombako imilimo yuze pakuti azane ivikulondekwa, pano akalonda ukuzanzya uwamwingizya usilika.
5 Nanti sile umu vyangalo, ali wensi uwacimvya asipeelwa icilambu ndi cakuti atalondiile masunde.
6 Umulimi aakaombesya aalinzile ukutandikilapo ukulya ivizao.
7 Lyonsi uwaelenganya pali vino nkukunena; Umwene alakwazwa ukwiluka ivintu vyonsi.
8 Iusya ukuti Yesu Klistu watuutulwilwe ukufuma uku yafwe, nupya wali umwana wakwe Devedi, ukulingana ni lyasi lisuma lino nkasimikila,
9 ilyalenga ukuti nacula nu kuyalilwa umu cifungo wa cipondo. Lelo izwi lyakwe Leza litaanyepwa.
10 Ali cino nkazizimizya ivintu vyonsi pa mulandu wakwe yano yasoololwa, pakuti nayo kwene yangaca yapusuke ukupitila muli Klistu Yesu nu kucindamikwa manda pe.
11 Amazwi yaa aacumi, aakuti: Ndi cakuti twafwilile pamwi nawe, ale tulaya nu umi pamwi nawe;
12 ndi cakuti twatwalilila ukuzizimizya ale tulateeka pamwi nawe; ndi cakuti twamukaana, ale nawe alatukaana;
13 ndi cakuti twata ukuya acumi, wene akatwalilila ukuya uwa cumi, pano atanga aikaane.
14 Twalilila ukuiusya ivintu vii, uwayasambilizya pa manso yakwe Leza ukuti yataalwa pa mulandu wa mazwi, icintu cii i ca sile sile pano cikaonona aakauvwa.
15 Uwaombesya pakuti Leza akutemwe, nupya uye wa muomvi aatakwata icingamulenga ukuya ni nsonyi, uwasambilizya nu kulondolola ningo icumi.
16 Lelo taluka ku mivwangile ikakowezya ivya muzilo, pano ikatalusya sana antu kuli Leza,
17 nupya mazwi yayo yalasalangana wa cilonda icisipola icikalya umwili . Himenaesi na Filetusi yaya pa yantu yayo.
18 Antu yaa yafuma umu cumi, yakati ukutuutuluka kwacitika mpiti nupya yakalenga yamwi ukuta ukuya nu utailo.
19 Asi mulandu na vivyo, umufula wakwe Leza ukome watwalilila ukuyako, uwalembwapo amazwi yakuti, “Yeova wamanya antu yakwe,” nu kuti, “Lekini wensi akaama pi zina lyakwe Yeova ataluke uku viipe.”
20 Lyene mu ng’anda ikalamba mukaya iviya ivipusanepusane vimwi i vyakwe goldi na siuva, vyuze navyo i vya mbao ni vya kumata sile, nupya vimwi vikaomviwa ku vintu ivicindame lelo vyuze vyene i vya sile sile.
21 Fwandi ndi cakuti umwi wataluka ku viya ivya sile sile, alaya iciviya icilaomviwa uku vintu vicindame, icisangululwe, ica mulimo ku mwineco nupya alaipekanya ukuomba umulimo onsi usuma.
22 Fwandi taluka uku lunkumbwa lwa ulumendo, lelo uwalondelela ulungami, utailo, ukutemwa, umutende pamwi na yayo akaama pi zina lya Mwene nu mwenzo usanguluke.
23 Nupya uwataluka uku vikanza vya uwelewele, pano vikaleta ulwete.
24 Pano umuomvi wa Mwene atalinzile ukuya uwa lwete, lelo alinzile ukuya umuteekele ku yantu yonsi, uwamanya ukusambilizya ningo nupya aakateeka umwenzo nga yamwi yamuluvyanya,
25 akaya umufuuke pa kusambilizya aakapaazya. Pano limwi Leza angayazwa ukulapila nu kuyalenga ukumanya icumi,
26 nupya yangiluka nu kufuma ku citeyo cakwe Ciwa, pa kumanya ukuti wayalema apuma pakuti yacita ukulonda kwakwe.
