2 Yamwene 1:1-18
-
Eliya wasesema pa mfwa yakwe Ahaziya (1-18)
1 Pa cisila ca mfwa yakwe Ahabu, Aina Moabu yapondokiile Aina Izlaeli.
2 Lili kwene alino Ahaziya waponyile ukufuma umu muputule wakwe wapapela mu Samaliya lino walyasile pa mbao zya pa cipongo ca kwingilila umu muputule nupya wacisike. Lyene watumile inkombe ati: “Pitangini mukuzye kuli Baali-zebubi leza wa ku Ekiloni ndi cakuti ndapola.”
3 Lelo malaika wakwe Yeova wanenyile Eliya* Umwina Tisyibe ati: “Katuka yanga ukakomenkanye inkombe zya mwene wa ku Samaliya nupya uzinene uti, ‘Uzye a pa mulandu wakuti umu Izlaeli mutaaya Leza, acino mukuila umu kuzya kuli Baali-zebubi leza wa ku Ekiloni?
4 Acino Yeova walanda wati: “Utalakatuka pano uizi, lelo ulafwa.”’” Lyene Eliya wapisile.
5 Lino yano watumile yawezile, lilyo kwene sile wayuzizye ati: “U mulandu ci uno mwawelela?”
6 Nayo yamwaswike iyati: “Itwakomenkanya umonsi umwi uwali watunena wati, ‘Swililini mukanene umwene uwatamutuma muti, “Yeova walanda wati: ‘Uzye a pa mulandu wakuti mu Izlaeli mutaaya Leza, acino mukuila umu kuzya kuli Baali-zebubi leza wa ku Ekiloni? Fwandi utalakatuka pano uizi, lelo ulafwa.’”’”
7 Lyene wayuzizye ati: “Uzye umonsi uwali wamukomenkanya nu kumunena mazwi yayo wali akuloleka uli?”
8 Nayo yamunenyile iyati: “Wali azwite icakuzwala ca mavumbu nu musipi wa mpapa mu musana.” Lilyo kwene walanzile ati: “A Eliya Umwina Tisyibe.”
9 Lyene umwene watumile umukalamba wa yasilika 50 pamwi na asilika kwene yayo. Lino waile kuli aliwe, wamuzanyile wataikala pa mwamba papela. Lyene wamunenyile ati: “We muntu wakwe Leza wa cumi, ‘Umwene akukwama.’”
10 Lelo Eliya wamwaswike ati: “Ndi cakuti nene muntu wakwe Leza, umoto kaufume ukwi yulu nu kukoca pamwi na aonsi 50 yano uli nayo.” Nupya umoto wafumile ukwi yulu nu kumoca pamwi na aonsi 50 yano wali nayo.
11 Fwandi umwene watumile umukalamba wa yasilika 50 na muze pamwi na asilika kwene yayo. Nawe waile kuli Eliya nu kumunena ati: “We muntu wakwe Leza wa cumi, ‘Umwene akukwama likwene.’”
12 Lelo Eliya wamunenyile ati: “Ndi cakuti nene muntu wakwe Leza wa cumi, umoto kaufume ukwi yulu nu kukoca pamwi na aonsi 50 yano uli nayo.” Nupya umoto wakwe Leza wafumile ukwi yulu nu kumoca pamwi na aonsi 50 yano wali nayo.
13 Lyene umwene watumile umukalamba wa yasilika 50 wakwe citatu pamwi na asilika kwene yayo. Lelo umukalamba wa yasilika wiyo wene waile afukama pa nkoleelo yakwe Eliya atandika nu kumupaapata ukuti amuvwile uluse, ati: “We muntu wakwe Leza wa cumi napaapata, utaleka imfwe pamwi na aonsi 50 yano indi nayo.
14 Umoto iufuma mpiti ukwi yulu nu koca akalamba yaili aa pa yasilika 50 kumwi na asilika yao, lelo leka nemo inje nu umi.”
15 Lyene malaika wakwe Yeova wanenyile Eliya ati: “Pita nawe. Utamutiina.” Fwandi wapisile nawe aya uku mwene.
16 Eliya wanenyile umwene ati: “Yeova walanda wati, ‘Wali watuma inkombe uku kuzya kuli Baali-zebubi leza uwa ku Ekiloni. Uzye a pa mulandu wakuti mu Izlaeli mutaaya Leza? U mulandu ci uno utali uzizya kuli aliwe? Acino, utalakatuka pano uizi, lelo ulafwa.’”
17 Lyene wafwile ukulingana na mazwi yakwe Yeova yano Eliya walanzile; nupya pa mulandu wakuti ataakweti umwana umonsi, Yeolamu* wamupyanyile pa wene umu mwaka wakwe ciili wa kuteeka kwakwe Yeolamu mwana Yeosyafati umwene wa Yayuda.
18 Ilyasi lyonsi ilyasyala ilikalanda pali Ahaziya na vyonsi vino wacisile, lyalembwa umwi buku lya mpiti ilikalanda pali ya mwene ya mu Izlaeli.
