2 Yamwene 10:1-36
10 Ahabu wakweti ana aonsi 70 umu Samaliya. Lyene Yeu walemvile makalata nu kuyatuma uku Samaliya, kuli ya cilolo ya mu Yezileele, ku yakalamba, na kuli yano yasunganga ya mwana Ahabu, umwali amazwi yakuti:
2 “Muli na ana aonsi aa musambazi winu, pamwi na maceleta ya nkondo, imfwalasi, musumba wi linga ni vyanzo, fwandi nga mwapokelela kalata wii,
3 musoolole umwana wenga pa yana ya musambazi winu wino mukulola ukuti watalinga nu kumwika pa cilimba ca wene cakwe isi. Lyene muce mulwisye nu kucingilila amu ng’anda ya musambazi winu.”
4 Lelo yuvwile sana intete nupya yalanzile iyati: “Ndi cakuti ya mwene yaili yangafilwa ukumulwisya, nga swemo tungamulwisya uli?”
5 Fwandi uwangalilanga isano, ntunguluzi ya musumba, akalamba na asunganga ya mwana Ahabu yatumile mazwi kuli Yeu iyati: “Sweswe yaomvi yako, tumacita ivili vyonsi vino umatunena. Tusikusoolola umwene. Ucite ivili vyonsi vino ukulola ukuti vili ningo.”
6 Lyene wayalembile kalata wakwe ciili ati: “Ndi cakuti muli uku lusansa lwane nupya mwakulanguvwila, mutondo pa nsita ndi ikwene muce mwize kuli nene uku Yezileele nu kuleta imitwe ya yana ya musambazi winu.”
Ana aonsi 70 aa mwene yaali na aonsi ya mu musumba ayasakamalanga.
7 Lino yapokelile sile kalata, yalemile ana ya mwene aonsi 70 nu kuyakoma, nupya isile imitwe yao muli ya basiketi nu kuituma kuli aliwe uku Yezileele.
8 Inkombe yaile kuli aliwe nu kumunena iti: “Iyaleta imitwe ya yana aonsi aamwene.” Nawe wayanenyile ati: “Muitulike umu mitumba iili pa mpongolo ya musumba ukufika katondo.”
9 Lino wafumile katondo, wimilile pa nkoleelo ya yantu yonsi nu kulanda ati: “Mwemwe ya kaele. Napaangile umwene nupya namukomile, nomba a weni uwatakoma yonsi yaa?
10 Fwandi mumanye ukuti kusi mazwi nanti ayamwi yakwe Yeova yano Yeova walanzile pa ya mu ng’anda yakwe Ahabu aatalafikiliziwa, nupya Yeova watacita vino walanzile ukupitila muli Eliya umuomvi wakwe.”
11 Nupya Yeu wakomile yonsi aasile umu ng’anda yakwe Ahabu mu Yezileele, kumwi na aonsi yonsi amuombelanga, ivyuza vyakwe na ya simapepo yakwe, icakuti kutaali uwapuswike.
12 Lyene wakatwike nu kuya uku Samaliya. Mu nzila mwali icikuulwa muno ya kacema yanyepelanga imfwele pakuti yazipele.
13 Yeu wakomenkinye aina yakwe Ahaziya umwene wa ku Yuda, nupya wayuzizye ati: “Mwemwe yaweni?” Nayo yatile: “Sweswe aina yakwe Ahaziya, nupya twaya umu kulola ndi cakuti ana ya mwene na ana yakwe namwene yali sile ningo.”
14 Lilyo kwene sile walanzile ati: “Yalemini!” Fwandi yalemile aonsi yayo 42 nu kuyayakomela pa ca kusungilamo manzi icali pa cikuulwa cino yapelelangamo imfwele. Wakomile yonsi kutaali nanti aumwi uwapuswike.
15 Lino wafumile kuuku, wakomenkinye Yeonadabu mwana Lekabu, lino wamulamwike wamuzizye ati: “Uzye vino naya uwa cumi kuli wewe avino nawe waya kuli nene?”
Yeonadabu waswike ati: “Ee.”
Nawe wamunenyile ati: “Ndi cakuti avino cili leta ikasa lyako.”
Nawe watambalike ikasa kuli aliwe, Yeu nawe wamutintile umwi celeta lyakwe.
16 Lyene walanzile ati: “Twapita ukalole vino nkufulula antu aataya ni cisinka kuli Yeova.” Fwandi yapisile yonsi umwi celeta lyakwe ilya nkondo.
17 Lyene waile uku Samaliya nu kuyakoma amu ng’anda yakwe Ahabu yonsi asile kuuku mpaka ayalovya, wakwe viivi kwene vino Yeova walanzile ukupitila muli Eliya.
18 Nupya Yeu wakolonganike antu yonsi nu kuyanena ati: “Pano Ahabu wapelezile ukupepa Baali, Yeu wene akucilapo.
19 Fwandi nkolonganikilini ya kasesema yakwe Baali yonsi, ya kapepa yakwe yonsi na ya simapepo yakwe yonsi. Mutaleka kusyale nanti a wenga, pano namapeela ilambo ilikalamba kuli Baali. Wensi aasikwizako akukomwa.” Lelo Yeu waomvizye umucenjelo pakuti alovye ya kapepa yakwe Baali.
20 Yeu walanzile nu kuti: “Nenini antu kuti yaipekanye uku ukongano wa kupepa Baali.” Nayo yacisile vivyo kwene.
21 Lyene Yeu watumile mazwi umu Izlaeli monsi, nupya ya kapepa yakwe Baali yonsi izile. Kutaali nanti aumwi uwasiile. Ingile umu ng’anda yakwe Baali nupya ing’anda yazuzile.
22 Lyene wanenyile uwangalilanga muno yasungilanga ivyakuzwala ati: “Letela ya kapepa yakwe Baali yonsi ivyakuzwala.” Nawe wayaletile.
23 Yeu na Yeonadabu mwana Lekabu iingile umu ng’anda yakwe Baali. Lyene wanenyile ya kapepa yakwe Baali ati: “Ceceetini mulole ndi cakuti muno musi ya kapepa yakwe Yeova suka sile ya kapepa yakwe Baali.”
24 Lyene yaile umu kupeela upe na malambo ya koca. Walanga Yeu watasoolola aonsi 80 nu kuika panzi ayanena nu kuti: “Ndi cakuti mwaleka umwi pa yonsi yaa utuka, mwemwe mumafwilapo.”
25 Lino Yeu wamazile ukupeela ilambo lya koca wanenyile alinzi na asilika ati: “Ingilini muyakome! Mutaleka ali wensi autuke!” Fwandi alinzi na asilika yayakomile ukuomvya ulupanga nu kuyasumbila panzi, nupya yatwalilile ukuyakoma kufika nu mu muputule wa mukasi sana uwa mu ng’anda yakwe Baali.
26 Yafumizye ni vipilala vya kupepa umu ng’anda yakwe Baali nu kuvyoca.
27 Yatamozile icipilala cakwe Baali nu kuwisya ing’anda yakwe nupya yaisangwile icimbusu wakwe vino yaya ukufika na ndakai.
28 Avino Yeu walovizye ukupepa Baali umu Izlaeli.
29 Lelo Yeu atononyile ivilubi vyakwe goldi, kuli kuti icali umu Betele ni cali umu Dani nupya cico calenzile ukuti ayembuke wakwe vino Yeloboamu mwana Nebati wacisile uwalenzile Aina Izlaeli ukuyembuka.
30 Fwandi Yeova wanenyile Yeu ati: “Pa mulandu wakuti watucita ivisuma nupya watucita icilungame kuli nene pa kucita vyonsi vino nalondanga ukucita uku ya mu ng’anda yakwe Ahabu, ndalenga umu nkulo 4 izya yana yako mwafuma aakuteeka umu Izlaeli.”
31 Lelo Yeu atalondelanga masunde yakwe Yeova Leza wa Ina Izlaeli nu mwenzo wakwe onsi. Watwalilile ukucita imembu zino Yeloboamu walenzile Aina Izlaeli ukucita.
32 Mu manda yaya Yeova walesile ukuti impanga ya Ina Izlaeli iyapokwa panono panono. Hazaeli watwalilile ukuzanza impanga ya Izlaeli
33 kufuma uku Yodani kuno ilanzi likatunkila, impanga yonsi iya Gilyadi muno amu mutundu wakwe Gadi, mutundu wakwe Lubeni nu mutundu wakwe Manase yakaikala, umwaya ni ncende iyafumilile uku Aloeli iyayela umupiipi nu mukonko wa Alinoni kufika nu ku Gilyadi nu ku Basyani.
34 Nupya ilyasi lyonsi ilyasyala ilikalanda pali Yeu na pa vintu vya maka vyonsi vino wacisile, lyalembwa umwi buku lya mpiti ilikalanda pali ya mwene ya mu Izlaeli.
35 Lyene Yeu wafwile nu kuziikwa ukwalaala ivikolwe vyakwe umu Samaliya; nupya Yeowazi umwanakwe u wamupyanyile pa wene.
36 Yeu wateesile Aina Izlaeli umu Samaliya pa myaka 28.
