2 Yamwene 11:1-21
11 Lyene lino Ataliya nyina wakwe Ahaziya waweni ukuti umwanakwe wafwa, wakatwike nu kukoma ana ya mwene yonsi.
2 Lyene Yeosyeba umwana wa Mwene Yeolamu kaci wakwe Ahaziya, wasenzile Yeoasyi mwana Ahaziya umu umfisolo nu kumufumya pa yana ya mwene aali nu kukomwa, aya amusungila umu muputule wa mukasi pamwi nu wa kumusakamala. Yamufisile pakuti Ataliya atamulola, fwandi atakomilwe.
3 Wali nawe pa myaka 6 ala wamufisa umu ng’anda yakwe Yeova lino Ataliya wateekanga impanga.
4 Mu mwaka uwalenga 7, Yeoyada watumile aakuyaama intunguluzi zya yalinzi ya mwene na alinzi ya kwi sano aali umu maumba ya yantu 100, nayo yaile kuli aliwe umu ng’anda yakwe Yeova. Wapangine nayo upangano nu kuleka ukuti yalape pa ng’anda yakwe Yeova ukuti yalasunga upangano uuwo, lyene wayalanzile umwana wa mwene.
5 Wayakonkomizye ati: “Vino mwakulacita aevi: Iumba lyonga pa maumba yatatu yano imupanga, lyaya pa ulinzi pa wanda wi Sabata nupya lyacingilila isano lya mwene,
6 iumba lyakwe ciili lyaimilila pa mpongolo yi tempele, lyene iumba lyuze nalyo lyaimilila pa mpongolo yuze ukwi tundu lya yalinzi ya kwi sano. Mwakulacinjanya ukulinda ing’anda.
7 Maumba inu yaili atalaaomba pa wanda wi Sabata yalinzile ukulaalinda ing’anda yakwe Yeova pakuti yacingilile umwene.
8 Mulinzile ukuzinguluka umwene umu mbali zyonsi ala mulemile ivyanzo. Wensi uwezya ukupuzya pano muli kuti aingile umukasi alinzile ukukomwa. Mwaya nu mwene konsi kuno akuya.”
9 Angalilanga alinzi yacisile viivi kwene vino Yeoyada simapepo walanzile. Cila wino wasenzile aonsi alindanga pa wanda wi Sabata, pamwi na ataombanga pa wanda wi Sabata nupya yaile kuli Yeoyada simapepo.
10 Lyene simapepo wapeezile angalilanga alinzi masumo ni visyangu ivyali ivya Mwene Devedi ivyali umu ng’anda yakwe Yeova.
11 Nupya alinzi ya kwi sano imiliile umu vifulo vyao ala iyalema ivyanzo kufuma ukwi lunji lya ng’anda kufika kuli cimani, nu mupiipi nu ulambo alino nu mupiipi ni ng’anda ukuzinguluka umwene.
12 Lyene Yeoyada wafumizye umwana wa mwene nu kumuzwika icisote ca wene, nupya wisile ulupapulo lwa masunde yakwe Leza pa mutwe wakwe nu kumwika pa wene. Yatandike ukutoota ala yakuti: “Uwikale manda aingi mwene!”
13 Lino Ataliya uvwile icongo ca yantu asimulanga, lilyo kwene waile kuli aliyo uku ng’anda yakwe Yeova.
14 Lyene waweni umwene aimi umupiipi nu lucesi ukulingana nu lutambi luno yalondelanga. Intunguluzi na ya kalizya ya mapenga yaali nu mwene nupya antu yonsi amu mpanga iiya yasansamukanga nu kulizya mapenga. Lino Ataliya waweni vivyo, walepwile ivyakuzwala vyakwe nu kupunda ati: “Iyampondokela! Iyampondokela!”
15 Lelo Yeoyada simapepo wanenyile angalilanga alinzi, kuli kuti akalamba ya yasilika ati: “Mufumyini pano nupya ndi cakuti ali wensi wezya ukumupokolola mumukome nu lupanga.” Pano walanga simapepo watalanda ati: “Mutamukomela umu ng’anda yakwe Yeova.”
16 Lyene yamulemile nupya lino yafisile pano imfwalasi zingililanga umwi sano, yamukomile.
17 Lyene Yeoyada walenzile paye upangano pali Yeova nu mwene na antu, uwakuti yalatwalilila ukuombela Yeova, nupya walenzile paye upangano pa mwene na antu.
18 Pa cisila antu yonsi amu mpanga iiya yaile uku ng’anda yakwe Baali iyaya iyonona maulambo yakwe, yatamozile ni vilubi vyakwe nupya yakomile Matani simapepo wakwe Baali pa nkoleelo ya maulambo.
Lyene simapepo Yeoyada wasonsile akwangalila pa ng’anda yakwe Yeova.
19 Lyene wanenyile angalilanga maumba ya yalinzi umwali antu 100, alinzi ya mwene, alinzi ya kwi sano, na antu yonsi amu mpanga iiya ukuti yasukilile umwene kufuma uku ng’anda yakwe Yeova ukuya ukwi sano ukuomvya inzila iyapita pa mpongolo. Lyene umwene waile aikala pa cilimba cakwe ya mwene.
20 Fwandi antu yonsi amu mpanga iiya yaali ni nsansa nupya umu musumba mwali umutende, pano walanga iyakoma Ataliya ukuomvya ulupanga ukwi sano.
21 Yeoasyi wali ni myaka 7 lino watandike ukuteeka.
