2 Yamwene 14:1-29
14 Mu mwaka wakwe ciili uwa kuteeka kwakwe Yeoasyi mwana Yeowazi umwene wa ku Izlaeli, Amaziya mwana Yeoasyi umwene wa ku Yuda watandike ukuteeka.
2 Wali ni myaka 25 lino watandike ukuteeka, nupya wateesile imyaka 29 umu Yelusalemu. Nyina wali a Yeoadini uwa ku Yelusalemu.
3 Wazanzyanga Yeova, lelo ataali wakwe Devedi icikolwe cakwe. Wacitanga vyonsi wakwe vino Yeoasyi isi wacitanga.
4 Lelo atononyile incende izya kupepelapo zino antu yalolanga ukuti izya muzilo nupya antu yatwalilile ukupeela malambo ya koca na malambo yauze pa ncende kwene zizyo.
5 Nupya lino wizile akwata amaka pa wene, wakomile aomvi yakwe aakomile isi uwali umwene.
6 Lelo atakomile ana yao ukulingana na vino Yeova walemvile umwi buku lya Masunde yakwe Mose ati: “Ya isi yatalinzile ukukomwa pa mulandu ni vicitwa vya yana yao. Na ana yatalinzile ukukomwa pa mulandu ni vicitwa vyakwe ya isi; lelo cila muntu alinzile ukukomelwa pa luyembu lwakwe.”
7 Wakomile Aina Edomu mu Mukonko wa Musilya, kuli kuti aonsi 10,000 nupya waposile umusumba wa Sela umu nkondo aupeela ni zina lyakuti Yokotele, nupya avino ukaamwa ukufika na ndakai.
8 Lyene Amaziya watumile inkombe kuli Yeoasyi mwana Yeowazi mwana Yeu umwene wa mu Izlaeli ukuti: “Iza tulwisyanye.”
9 Mwene Yeoasyi uwa ku Izlaeli watumile mazwi kuli Amaziya umwene wa ku Yuda ati: “Munga wa ku Lebanoni watumile mazwi uku mukedali wa ku Lebanoni aakuti, ‘Peela umwanako umukazyana uku mwanane kuti aye umuci.’ Lelo icilyanyi ca ku Lebanoni capisile pa munga nu kuulyatola.
10 Ica cumi ukuti wakomile Aina Edomu nupya icilenga uye ni cilumba. Yuvwange vivyo kwene, lelo ikala umwi sano lyako. U mulandu ci uno ungailetela intazi nu kucimviwa pamwi ni mpanga ya Yuda?”
11 Lelo Amaziya wakanyile ukuvwa.
Fwandi Umwene Yeoasyi uwa ku Izlaeli waile kuli aliwe, nupya wene na Amaziya Umwene wa ku Yuda yalwile uku Beti-syemesyi incende iyali umu mpanga ya Yuda.
12 Aina Izlaeli yacimvizye Ayuda, fwandi cila muntu utukiile ukwakwe.
13 Mwene Yeoasyi uwa ku Izlaeli walemile Umwene Amaziya uwa ku Yuda, mwana Yeoasyi mwana Ahaziya, ku Beti-syemesyi. Lyene yaile uku Yelusalemu, nupya waile aomoola ciumba ca musumba wa Yelusalemu kufuma pa Mpongolo Yakwe Efulemu kufika pa Mpongolo ya pa Koona, apali mamita mupiipi na 180.
14 Wasenzile goldi yonsi na siuva ni viya vyonsi vya mu ng’anda yakwe Yeova ni vyuma vya mwi sano kumwi na antu yamwi. Lyene waswilile uku Samaliya.
15 Ilyasi lyonsi ilyasyala ilikalanda pali Yeoasyi, pa vintu vya maka vino wacisile na vino walwisizye Umwene Amaziya uwa ku Yuda, lyalembwa umwi buku lya mpiti ilikalanda pali ya mwene ya mu Izlaeli.
16 Lyene Yeoasyi wafwile nu kuziikwa ukwalaala ivikolwe vyakwe uku Samaliya ukwaziikwa ya mwene ya mu Izlaeli; nupya Yeloboamu* umwanakwe wamupyanyile pa wene.
17 Amaziya mwana Yeoasyi umwene wa ku Yuda wikazile imyaka 15 pa cisila ca mfwa yakwe Yeoasyi mwana Yeowazi umwene wa ku Izlaeli.
18 Ilyasi lyonsi ilyasyala ilikalanda pali Amaziya, lyalembwa umwi buku lya mpiti ilikalanda pali ya mwene ya mu Yuda.
19 Lyene uku Yelusalemu kwali amupangile, nawe utukiile uku Lakisyi, lelo yatumile aonsi amukonsile iyaya iyamukoma.
20 Fwandi yamukwezizye pa mfwalasi nu kumuswilizya, nupya yaile iyamuziikila uku Yelusalemu ukwalaala ivikolwe vyakwe mu Musumba Wakwe Devedi.
21 Lyene antu yonsi amu Yuda yatozile Azaliya* uwali ni myaka 16 nu kumwika pa wene ukupyanika pali Amaziya isi.
22 Wapokolwile umusumba wa Elati uno mpiti wali uwakwe Yuda nu kuukuula cipya cipya pa cisila icakuti isi wafwa nu kuziikwa ukwalaala ivikolwe vyakwe.
23 Mu mwaka uwalenga 15 uwa kuteeka kwakwe Amaziya mwana Yeoasyi umwene wa mu Yuda, Yeloboamu mwana Yeoasyi umwene wa mu Izlaeli wizile aya umwene umu Samaliya, nupya wateesile pa myaka 41.
24 Wasosyanga Yeova. Ataatile ukucita imembu zino Yeloboamu mwana Nebati walenzile Aina Izlaeli ukucita.
25 Wapokolwile impanga ino mpiti yali iya Ina Izlaeli kufumilila uku Lebo-Hamati* kuyafika na kuli Yemba wa Alaba,* kulingana na vino Yeova Leza wa Ina Izlaeli walanzile ukupitila muli Yona umuomvi wakwe nupya mwana Amitai kasesema wa ku Gati-hefeli.
26 Yeova waweni vino Aina Izlaeli yaculanga sana. Kutaali umutonte nanti uwa kwazwa Aina Izlaeli.
27 Lelo Yeova walanga walaya ukuti atalalovya Aina Izlaeli* umu nsi. Fwandi wayapuswisye ukuomvya Yeloboamu mwana Yeoasyi.
28 Ilyasi lyonsi ilyasyala ilikalanda pali Yeloboamu, pa vintu vyonsi ivya maka vino wacisile, vino walwisizye na vino waposile umusumba wa Damasika nu wa Hamati nu kuuwezezya kuli Yuda umu Izlaeli, lyalembwa umwi buku lya mpiti ilikalanda pali ya mwene ya mu Izlaeli.
29 Lyene Yeloboamu wafwile nu kuziikwa ukwalaala ivikolwe vyakwe, ukwaziikwa ya mwene ya mu Izlaeli, nupya Zekaliya umwanakwe wamupyanyile pa wene.
Mafutunoti
^ Kuli kuti Yeloboamu wakwe ciili.
^ Icikapiliula ukuti “Yeova wataazwa.” Akaamwa nu kuti Uziya pali 2Ya 15:13; 2Mi 26:1-23; Eza 6:1; na Zek 14:5.
^ Nanti “uku wingililo wa ku Hamati.”
^ Kuli kuti Yemba wa Musilya, nanti Yemba Mufwe.
^ Mu Ciebele: “Izina lya Ina Izlaeli.”
