2 Yamwene 15:1-38
15 Mu mwaka uwalenga 27 uwa kuteeka kwakwe Yeloboamu* umwene wa mu Izlaeli, Azaliya* umwana wakwe Amaziya umwene wa mu Yuda wizile aya umwene.
2 Wali ni myaka 16 lino watandike ukuteeka, nupya wateesile pa myaka 52 umu Yelusalemu. Nyina wali a Yekoliya uwa ku Yelusalemu.
3 Wacitanga ivisuma kuli Yeova, wakwe vino Amaziya isi wacisile.
4 Lelo atononyile incende izya kupepelapo zino antu yalolanga ukuti izya muzilo, nupya antu yatwalilile ukupeela malambo ya koca na malambo yauze pa ncende kwene zizyo.
5 Yeova walwalike umwene tembwe nupya watwalilile ukuya na tembwe wiyo mpaka imfwa yakwe; wikalanga umu ng’anda yuze ala Yotamu umwanakwe akutungulula isano, kuli kuti ukupingula antu ya mu mpanga iiya.
6 Ilyasi lyonsi ilyasyala ilikalanda pali Azaliya na pali vyonsi vino wacisile, lyalembwa umwi buku lya mpiti ilikalanda pali ya mwene ya mu Yuda.
7 Lyene Azaliya wafwile nu kuziikwa ukwalaala ivikolwe vyakwe umu Musumba Wakwe Devedi, nupya Yotamu umwanakwe wamupyanyile pa wene.
8 Mu mwaka uwalenga 38 uwa kuteeka kwakwe Azaliya umwene wa mu Yuda, Zekaliya mwana Yeloboamu wizile atandika ukuteeka Aina Izlaeli mu Samaliya nupya wateesile pa myezi 6.
9 Wasosyanga Yeova wakwe viivi kwene vino ivikolwe vyakwe vyacisile. Ataatile ukucita imembu zino Yeloboamu mwana Nebati walenzile Aina Izlaeli ukucita.
10 Lyene Syalumu mwana Yabesyi wamupangiile nupya wamukomiile uku Ibeleamu. Pa cisila cakuti wamukoma, wamupyanyile pa wene.
11 Ilyasi lyonsi ilyasyala ilikalanda pali Zekaliya, lyalembwa umwi buku lya mpiti ilikalanda pali ya mwene ya mu Izlaeli.
12 Cii cafikilizye amazwi yano Yeova wanenyile Yeu aakuti: “Mu nkulo 4 izya yana yako mulaafuma aakuteeka umu Izlaeli.” Nupya vivyo kwene ivyacitike.
13 Syalumu mwana Yabesyi wizile aya umwene umu mwaka uwalenga 39 uwa kuteeka kwakwe Uziya umwene wa mu Yuda, nupya wateesile pa mwezi onga mu Samaliya.
14 Lyene Menaemu mwana Gadi wafumile uku Tiliza nu kuya uku Samaliya, nupya waile akoma Syalumu mwana Yabesyi. Pa cisila cakuti wamukoma, wamupyanyile pa wene.
15 Ilyasi lyonsi ilyasyala ilikalanda pali Syalumu na pi pange lyakwe, lyalembwa umwi buku lya mpiti ilikalanda pali ya mwene ya mu Izlaeli.
16 Lyene Menaemu wafumile uku Tiliza nu kuyaonona umusumba wa Tifisa na yonsi aalimo kumwi ni ncende iyali umupiipi, pano yataamuyulile impongolo. Waononyile nu kulepula inda zya yanaci aali pa ukulu.
17 Mu mwaka uwalenga 39 uwa kuteeka kwakwe Azaliya umwene wa mu Yuda, Menaemu mwana Gadi wizile atandika ukuteeka Aina Izlaeli nupya wateesile pa myaka 10 mu Samaliya.
18 Wasosyanga Yeova. Nupya manda yonsi yano wali nu umi, ataatile ukucita imembu zino Yeloboamu mwana Nebati walenzile Aina Izlaeli ukucita.
19 Pulu umwene wa Ina Asilya wizile umu mpanga ya Izlaeli, nupya Menaemu wamupeezile matalanti* 1,000 yakwe siuva pa mulandu na vino wamutungilile pakuti akwatileko maka umu wene wakwe.
20 Menaemu waposile masyekele* 50 yakwe siuva kuli cila Mwina Izlaeli uwali umukankala. Lyene umwene wa ku Asilya ataazanzile Aina Izlaeli.
21 Ilyasi lyonsi ilyasyala ilikalanda pali Menaemu na pali vyonsi vino wacisile, lyalembwa umwi buku lya mpiti ilikalanda pali ya mwene ya mu Izlaeli.
22 Lyene Menaemu wafwile nu kuziikwa ukwalaala ivikolwe vyakwe nupya Pekaya umwanakwe wamupyanyile pa wene.
23 Mu mwaka uwalenga 50 uwa kuteeka kwakwe Azaliya umwene wa mu Yuda, Pekaya mwana Menaemu wizile atandika ukuteeka Aina Izlaeli mu Samaliya nupya wateesile pa myaka iili.
24 Wasosyanga Yeova. Ataatile ukucita imembu zino Yeloboamu mwana Nebati walenzile Aina Izlaeli ukucita.
25 Lyene Peka umuomvi wakwe nupya mwana Lemaliya wamupangiile nupya wamukomiile umu Samaliya umu lupungu lwa kwi sano pamwi na Aligobu na Aliyeli. Peka wali na aonsi 50 Aina Gilyadi nupya pa cisila cakuti wamukoma wamupyanyile pa wene.
26 Ilyasi lyonsi ilyasyala ilikalanda pali Pekaya na pali vyonsi vino wacisile, lyalembwa umwi buku lya mpiti ilikalanda pali ya mwene ya mu Izlaeli.
27 Mu mwaka uwalenga 52 uwa kuteeka kwakwe Azaliya umwene wa mu Yuda, Peka mwana Lemaliya wizile atandika ukuteeka Aina Izlaeli umu Samaliya nupya wateesile pa myaka 20.
28 Wasosyanga Yeova. Ataatile ukucita imembu zino Yeloboamu mwana Nebati walenzile Aina Izlaeli ukucita.
29 Mu manda yakwe Peka umwene wa mu Izlaeli, Tigilati-pilesa umwene wa ku Asilya waile azanza nu kupoka misumba yii: musumba wa Iyoni, musumba wa Abeli-beti-maaka, musumba wa Yanowa, musumba wa Kedesyi, musumba wa Hazoli, musumba wa Gilyadi nu musumba wa Galili, kuli kuti impanga yonsi yakwe Nafutali, nupya aikalangamo wayasenzile umu uzya uku Asilya.
30 Lyene Hosyia mwana Ela wapangiile Peka mwana Lemaliya nupya wamukomile; lyene wamupyanyile pa wene mu mwaka uwalenga 20 uwa kuteeka kwakwe Yotamu mwana Uziya.
31 Ilyasi lyonsi ilyasyala ilikalanda pali Peka na pali vyonsi vino wacisile, lyalembwa umwi buku lya mpiti ilikalanda pali ya mwene ya mu Izlaeli.
32 Mu mwaka wakwe ciili uwa kuteeka kwakwe Peka mwana Lemaliya umwene wa mu Izlaeli, Yotamu mwana Uziya umwene wa mu Yuda wizile aya umwene.
33 Wali ni myaka 25 lino watandike ukuteeka, nupya wateesile pa myaka 16 umu Yelusalemu. Nyina wali a Yelusya mwana Zadoki.
34 Wacitanga ivisuma kuli Yeova wakwe vino Uziya isi wacisile.
35 Lelo atononyile incende izya kupepelapo zino antu yalolanga ukuti izya muzilo, nupya antu yatwalilile ukupeela malambo ya koca na malambo yauze pa ncende kwene zizyo. Aliwe wakuuzile impongolo ya papela pa ng’anda yakwe Yeova.
36 Ilyasi lyonsi ilyasyala ilikalanda pali Yotamu na pali vyonsi vino wacisile, lyalembwa umwi buku lya mpiti ilikalanda pali ya mwene ya mu Yuda.
37 Mu manda yaaya Yeova watandike ukutuma Lezini umwene wa Ina Silya na Peka mwana Lemaliya mu kulwisya Ayuda.
38 Lyene Yotamu wafwile nu kuziikwa ukwalaala ivikolwe vyakwe mu musumba wakwe Devedi icikolwe cakwe. Nupya Ahazi wamupyanyile pa wene.
Mafutunoti
^ Kuli kuti Yeloboamu wakwe ciili.
^ Icikapiliula ukuti “Yeova wataazwa.” Akaamwa nu kuti Uziya pali 2Ya 15:13; 2Mi 26:1-23; Eza 6:1; na pali Zek 14:5.
^ Italanti lyonga lyafinanga makilogilamu 34.2. Lolini Ivyeo na Vyuze pa B14.
^ Syekele wenga angalingana na magilamu 11.4. Lolini Ivyeo na Vyuze pa B14.
