2 Yamwene 16:1-20
16 Mu mwaka uwalenga 17 uwa kuteeka kwakwe Peka mwana Lemaliya, Ahazi mwana Yotamu umwene wa ku Yuda wizile aya umwene.
2 Ahazi wali ni myaka 20 lino watandike ukuteeka, nupya wateesile pa myaka 16 umu Yelusalemu. Wene ataali wakwe Devedi icikolwe cakwe pano wasosyanga Yeova Leza wakwe.
3 Wacitanga iviipe wakwe vino ya mwene ya mu Izlaeli yacisile, osile nu mwanakwe umu moto, icintu ca winyi icali pa vintu vino inko zino Yeova wazingiile Aina Izlaeli zyacitanga.
4 Watwalilile ukupeelela malambo ya koca na malambo yauze pa ncende zya kupepelapo, pa tumyamba alino nu mwisika lya vimiti.
5 Lyene Lezini umwene wa ku Silya na Peka mwana Lemaliya umwene wa ku Izlaeli yaile umu kulwisya Ahazi. Yazingulwike umusumba wa Yelusalemu lelo yatauposile.
6 Pa nsita kwene iiya, Lezini umwene wa Ina Silya waposile umusumba wa Elati nu kuuswilizya uku Ina Edomu, nupya wazinzile na Ayuda aikalangamo. Aina Edomu yatandike ukwikala umu Elati nupya amuno yakaikala ukufika na ndakai.
7 Fwandi Ahazi watumile aakuyanena Tigilati-pilesa umwene wa Ina Asilya ati: “Nene muomvi wako nupya umwanako. Iza umpususye uku mwene wa ku Silya nu mwene wa ku Izlaeli aakundwisya.”
8 Lyene Ahazi watozile siuva na goldi ivyali umu ng’anda yakwe Yeova nu mu vipao vya kwi sano nu kuvituma uku mwene wa Ina Asilya pakuti amuozye.
9 Umwene wa ku Asilya wazumile, nupya waile uku musumba wa Damasika nu kuupoka lyene wasenzile antu umu uzya uku Kili, nupya wakomile Lezini.
10 Lyene Umwene Ahazi waile uku Damasika umu kulola Tigilati-pilesa umwene wa ku Asilya. Lino Umwene Ahazi waweni vino ulambo wa ku Damasika walolekanga, watumiile Uliya simapepo icikope icalangililanga vino ulambo wapanzilwe.
11 Uliya simapepo wapanzile ulambo uwalolekanga wakwe uuwa kwene uno Umwene Ahazi wamutumiile ala ali uku Damasika. Wamazile ukupanga ulambo ala Umwene Ahazi acili uku Damasika.
12 Lino umwene wawezile nu kulola ulambo, waile apeelelapo malambo.
13 Nupya watwalilile ukupeelelapo malambo ya koca na malambo ya vyakulya; witilangapo na malambo ya vyakumwa nupya wasansangapo nu wazi wa malambo ya mutende.
14 Lyene wafumizye ulambo wakwe koopa uwali pa nkoleelo yakwe Yeova pa ng’anda yakwe, pakasi ka ulambo wakwe ni ng’anda yakwe Yeova, nupya wawisile uku katutu ka ulambo wakwe.
15 Umwene Ahazi wanenyile Uliya simapepo ati: “Katondo uwapeelela ilambo lya koca pa ulambo ukalamba, manguzi nayo uwapeelelapo ilambo lya vyakulya, ilambo lya koca ilya mwene ni lambo lyakwe ilya vyakulya, kumwi na malambo ya koca, malambo ya vyakulya na malambo ya vyakumwa aa yantu yonsi. Uwasansapo nu wazi wa malambo yonsi aakoca nu wazi onsi uwa malambo yauze. Kulozya uku ulambo wakwe koopa wene ndakunena ivya kucita.”
16 Uliya simapepo wacisile vyonsi vino Umwene Ahazi wamunenyile.
17 Umwene Ahazi waputozile ivipampa ivyali pa vya kusendelapo ivintu nupya wafumizyepo na ya beseni aalipo, wisizye itanki ilyali pa ng’ombe zyakwe koopa nu kuyaliteeka pa mawe.
18 Wafumizye icikuulwa icipaalike umwayelanga Isabata cino yakuuzile umu ng’anda, wayazile nu mulyango uno umwene wingililangapo umu ng’anda yakwe Yeova; wacisile vivyo pa mulandu nu mwene wa ku Asilya.
19 Ilyasi lyonsi ilyasyala ilikalanda pali Ahazi na pali vino wacisile, lyalembwa umwi buku lya mpiti ilikalanda pali ya mwene ya mu Yuda.
20 Lyene Ahazi wafwile nu kuziikwa ukwalaala ivikolwe vyakwe mu Musumba Wakwe Devedi; nupya Hezekiya* umwanakwe wamupyanyile pa wene.
Mafutunoti
^ Icikapiliula ukuti “Yeova akakomya.”
