2 Yamwene 17:1-41
17 Mu mwaka uwalenga 12 uwa kuteeka kwakwe Ahazi umwene wa ku Yuda, Hosyia mwana Ela wizile atandika ukuteeka Aina Izlaeli umu Samaliya, nupya wateesile pa myaka 9.
2 Wasosyanga Yeova, lelo ataali wakwe ya mwene ya mu Izlaeli aamukoleelile.
3 Syalimanesa umwene wa Ina Asilya wizile umu kumulwisya, lyene Hosyia wizile aya umuomvi wakwe nupya watandike ukulipila imisonko kuli aliwe.
4 Lelo umwene wa ku Asilya wizile amanya ukuti Hosyia wamupangiile, pano Hosyia watumile inkombe kuli So umwene wa ku Ijipti nupya watiile ukulipila imisonko wakwe vino wacitanga lyonsi. Fwandi umwene wa ku Asilya walemile Hosyia nu kumwika umu cifungo.
5 Umwene wa ku Asilya wasenzile asilika yakwe uku kuzanza impanga, nupya wafisile uku musumba wa Samaliya auzinguluka pa myaka itatu.
6 Mu mwaka uwalenga 9 uwa kuteeka kwakwe Hosyia, umwene wa ku Asilya waposile umusumba wa Samaliya. Lyene wasenzile Aina Izlaeli umu uzya uku Asilya nu kulenga ukuti yaikala umu Hala nu mu Haboli uku luzi lwa Gozani nu mu misumba iya Ina Medya.
7 Cii cacitike pa mulandu wakuti Aina Izlaeli yapondokile Yeova Leza wao uwayafumizye umu mpanga ya Ijipti iyatungululwanga na Falao umwene wa ku Ijipti. Yapepanga ya leza yauze,
8 yalondelanga intambi zino inko zino Yeova wayazingiile zyacitanga nupya yalondelanga intambi zino ya mwene ya mu Izlaeli yapanzile.
9 Aina Izlaeli yacitanga ivintu vino Yeova Leza wao wapata. Yatwalilile ukukuula incende zya kupepelapo mu misumba yao yonsi ukufuma pa lupungu kufika uku musumba wi linga.*
10 Yakuulanga ivipilala ni ncesi zya kupepa pa tumyamba nu mwisika lya vimiti vikulu;
11 nupya yapeelelanga malambo ya koca pa ncende zyonsi zya kupepelapo wakwe vino inko zino Yeova walesile ukuti zisendwe umu uzya zyacitanga. Yatwalilile ukucita iviipe pakuti yasosye Yeova.
12 Yaombelanga ivilubi* vino Yeova wayanenyile ukuti: “Mutaombela!”
13 Yeova watwalilile ukucelula Aina Izlaeli na Ayuda ukupitila muli ya kasesema yakwe yonsi na muli ya kalola ya vilolwa, ala akuti: “Tiini ukucita iviipe! Mwalondela masunde yane yonsi yano napeezile ivikolwe vinu nupya yano namupeezile ukupitila umu yaomvi yane ya kasesema.”
14 Lelo yakanyile ukuvwa, yatwalilile ukukomya imyenzo wa vikolwe vyao ivitaali nu utailo muli Yeova.
15 Yakananga masunde yakwe nu upangano uno wapangine ni vikolwe, na vino wayacelulanga, yapepanga ivilubi vya sile sile nupya nayo kwene izile iyaya aa sile sile, wakwe vino inko izyayazingulwike zino Yeova wayalesizye ukukolanya zyali.
16 Yatwalilile ukusuula masunde yonsi yakwe Yeova Leza wao, yapanzile utung’ombe twili ukuomvya ivyela vya kwengulula nupya yapanzile nu lucesi lwa kupepa,* yafukamilanga ni ntanda zyonsi izya mwi yulu nu kuombela Baali.
17 Yocanga na ana yao aonsi na anaci umu moto, yasapoolanga nu kucita ivya maleele, yacitanga ivintu viipe pakuti yasosye Yeova.
18 Fwandi Yeova wasokiile sana Aina Izlaeli icakuti wayazinzile umu mpanga yao. Kutaali nanti aumwi uwasiile suka sile umutundu wakwe Yuda.
19 Na amu mutundu wakwe Yuda kwene yatalondelanga masunde yakwe Yeova Leza wao; nayo kwene yacitanga vino Aina Izlaeli yacitanga.
20 Yeova wakanyile Aina Izlaeli yonsi nu kuleka ukuti yazewane nupya wayapeezile uku yalwani yao, na pa cisila wayazinzile umu mpanga yao.
21 Walesile ukuti Aina Izlaeli yate ukuteekwa na amu ng’anda yakwe Devedi, nupya yasonsile Yeloboamu mwana Nebati pa wene. Lelo Yeloboamu walenzile Aina Izlaeli ukuta ukulondela Yeova nupya walenzile yacite uluyembu ulwipisye.
22 Nupya Aina Izlaeli yatwalilile ukucita imembu zyonsi zino Yeloboamu wacitanga. Yataatile
23 mpaka Yeova ayazinga wakwe viivi kwene vino walanzile ukupitila muli ya kasesema aomvi yakwe. Fwandi Aina Izlaeli yayafumizye umu mpanga nu kuyasenda umu uzya uku Asilya kuno ikala ukufika na ndakai.
24 Lyene umwene wa ku Asilya waleesile antu kufuma uku Babiloni, ku Kuta ku Ava, ku Hamati, nu ku Sefalavaimu nu kuleka kuti yaikala mu misumba ya mu Samaliya kuti yapyane Aina Izlaeli; ikazile umu Samaliya nu mu misumba iyalimo.
25 Lino yacitandika sile ukwikala kuuku, yatapepanga Yeova. Fwandi Yeova wayatumiile ya cisama, nayo yakomilepo antu yamwi.
26 Yamwi yanenyile umwene wa ku Asilya iyati: “Inko zino wasenzile umu uzya nu kuzika umu misumba ya mu Samaliya zitamanya ivya kupepa Leza uwa mu mpanga iiya. Fwandi akayatumila ya cisama aakuyakoma pano kutaya uwamanya ivya kupepa Leza wa mu mpanga iiya.”
27 Lyene umwene wa ku Asilya walanzile ati: “Lekini wenga pali ya simapepo yano mwasenzile umu uzya ukufuma kuuku aswilile akaikala kuuku kwene pakuti ayasambilizya ivya kupepa Leza wa ku mpanga iiya.”
28 Fwandi wenga pali ya simapepo yano yasenzile umu uzya ukufuma uku Samaliya waswilile aya aikala umu Betele, nupya watandike ukuyasambilizya ivya kupepa Yeova.
29 Lelo cila luko lwaipangile ya leza nu kuika umu mang’anda aali pa ncende zya kupepelapo zino Aina Samaliya yapanzile; cila luko lwacisile vivyo kwene mu misumba yao.
30 Fwandi antu ya ku Babiloni yapanzile Sukoti-benoti, antu ya ku Kuti yapanzile Nelegali, antu ya ku Hamati yapanzile Asyima,
31 Aina Ava nayo yapanzile Nibiazi na Talitaki. Aina Sefalavaimu yocanga ana yao kuti yapeele ilambo kuli Adilameleki na Anameleki ya leza yao.
32 Nanti cakuti yatiinanga Yeova, yasonsile ya simapepo ukufuma umu yantu yao, aakuombela umu mang’anda ya pa ncende zya kupepelapo.
33 Yeova wene yamutiinanga lelo yapepanga ya leza yao, wakwe vino inko zino yafumileko zyacitanga.
34 Kufika na ndakai yakalondela imipepele yao iya mpiti. Kusi aakapepa Yeova nupya kusi aakalondela masunde yano Yeova wapeezile ya mwana Yakobo, wino wizile atandika ukwamwa ukuti Izlaeli.
35 Lino Yeova wapangine upangano nayo, wayanenyile ati: “Mutaapepa ya Leza yauze, nanti ukuyafukamila nanti ukuyaombela nanti ukupeela malambo kuli aliyo.
36 Lelo Yeova uwamufumizye umu mpanga ya Ijipti ukuomvya ikasa lyakwe lya maka, awino mulinzile ukupepa nupya awino mulinzile ukulafukamila nu kupeela malambo kuli aliwe.
37 Mulinzile ukulalondela sana masunde yano wamulembiile nupya mutalinzile ukupepa ya leza yauze.
38 Mutalinzile nu kwilila upangano uno wapangine namwe, nupya mutalinzile ukupepa ya leza yauze.
39 Lelo mulinzile ukulapepa Yeova Leza winu pano alamupususya uku yalwani inu yonsi.”
40 Lelo yakanyile ukuvwa nupya yalondiile imipepele yao iya mpiti.
41 Inko zii zyapepanga Yeova, lelo zyaombelanga na ya leza ya kuwaza. Nupya ana yao na izikulu yakacita wakwe viivi kwene vino ivikolwe vyao vyacitanga kufika na ndakai.
Mafutunoti
^ Kuli kuti umu ncende zyonsi umwali antu anono nanti aingi.
^ Izwi lya Ciebele lyakolana ni zwi ilikaomviwa uku “usali.” Nupya likaomviwa nu ku kulondolola icintu ca sile sile.
^ Lolini Ulondolozi wa Mazwi.
