2 Yamwene 18:1-37
18 Mu mwaka wakwe citatu uwa kuteeka kwakwe Hosyia mwana Ela umwene uwa ku Izlaeli, Hezekiya mwana Ahazi umwene wa ku Yuda watandike ukuteeka.
2 Wali ni myaka 25 lino watandike ukuteeka nupya wateesile pa myaka 29 umu Yelusalemu. Nyina wali a Abi* mwana Zekaliya.
3 Wacitanga ivisuma kuli Yeova wakwe vino Devedi icikolwe cakwe wacisile.
4 Ononyile incende zya kupepelapo, atamola ivipilala vya kupepa nu kukomola lucesi lwa kupepa.* Ononyile ni nzoka yakwe koopa ino Mose wapanzile; pano Aina Izlaeli yapeelanga malambo ya koca uku nzoka kwene iiyo iyamwanga ukuti Neusyitani.
5 Wataile Yeova Leza wa Ina Izlaeli; kutaali umwene uwali wakwe aliwe pali ya mwene amu Yuda amukoleelile nanti alondelile pali aliwe.
6 Wali uwa cisinka kuli Yeova. Ataatile ukumulondela; watwalilile ukukonka masunde yano Yeova wapeezile Mose.
7 Nupya Yeova wamwazwanga. Lyonsi wacitanga ivisuma. Wapondokiile umwene uwa ku Asilya akana nu kulamuombela.
8 Wacimvizye Aina Filisti kufika nu ku Gaza ni ncende izyalimo, kufuma uku lupungu kufika uku musumba uwi linga.*
9 Mu mwaka uwalenga 4 uwa kuteeka kwa Mwene Hezekiya, kuli kuti mu mwaka uwalenga 7 uwa kuteeka kwakwe Hosyia mwana Ela umwene uwa ku Izlaeli, Syalimanesa umwene wa ku Asilya wizile umu kuzanza umusumba wa Samaliya nupya wauzingulwike.
10 Musumba wa Samaliya yauposile pa mpela ya myaka itatu, mu mwaka uwalenga 6 uwa kuteeka kwakwe Hezekiya, kuli kuti mu mwaka uwalenga 9 uwa kuteeka kwakwe Hosyia umwene uwa ku Izlaeli.
11 Lyene umwene uwa ku Asilya wasenzile Aina Izlaeli umu uzya uku Asilya, nupya walesile ukuti yaikala umu Hala nu mu Haboli ku luzi lwa Gozani nu mu misumba ya Ina Medya.
12 Cii cacitike pa mulandu wa kuti Aina Izlaeli yatuvwilile Yeova Leza wao, lelo yatwalilile ukutama upangano uno wapangine nayo, kuli kuti vyonsi vino Mose umuomvi wakwe Yeova wayanenyile, yataakutike nanti ukuvwila.
13 Mu mwaka uwalenga 14 uwa kuteeka kwa Mwene Hezekiya, Senakelibu umwene uwa ku Asilya waile azanza imisumba yonsi iya malinga iya Yayuda nu kuipoka.
14 Fwandi Hezekiya umwene wa ku Yuda watumile amazwi uku mwene wa ku Asilya uku Lakisyi ati: “Induvyanya. Leka ukundwisya nupya nimakupeela icili consi cino umanena.” Umwene uwa ku Asilya nawe wanenyile Hezekiya kuti amupeele amatalanti* 300 yakwe siuva na matalanti 30 yakwe goldi.
15 Lyene Hezekiya wamupeezile siuva wensi uwali mu ng’anda yakwe Yeova nu mu vipao vya kwi sano.
16 Nupya Hezekiya wasokwile ivisaasa vya kwi tempele lyakwe Yeova na mafulemu yano wayemvizye* nu kuvipeela uku mwene uwa ku Asilya.
17 Lyene umwene uwa ku Asilya watumile Tatani,* Labusali* na Labusyeki* na asilika aingi ukufuma uku Lakisyi kuti yaye uku Mwene Hezekiya uku Yelusalemu. Yaile uku Yelusalemu nu kuyaimilila umupiipi nu mwapitanga manzi afumanga umu ca kusungilamo manzi icali apapela, icayelile umu nzila iyalungama kuno kawasya waombelanga.
18 Lino yatumile akwama umwene, Eliyakimu mwana Hilikiya uwangalilanga isano, Syebina kalemba na Yowa mwana Asafu kasunga wa vyalembwa, aliyo yaileko.
19 Lyene Labusyeki wayanenyile ati: “Kanenini Hezekiya muti, ‘Vii avino umwene uwa maka, umwene uwa ku Asilya walanda, wati: “Uzye ukupama kwako kusintilile pi?
20 Ukulanda ukuti, ‘Imanya ivya kucita, nupya nkweti maka ya kulwa inkondo,’ lelo mazwi yayo aasile sile. A weni wino watutaila pakuti umpondokele?
21 Lola! Wataila Ijipti, uwaya wi tete ilifwampe lino umuntu nga wasintilizyako lingamutota umu minwe. Vivyo kwene avino Falao umwene uwa ku Ijipti waya kuli yonsi amutaila.
22 Nupya ndi mwanena mwati, ‘Twataila Yeova Leza witu,’ uzye asi ali mwineco wa ncende zya kupepelapo na maulambo yano Hezekiya onona, anena na amu mutundu wakwe Yuda na amu Yelusalemu ukuti, ‘Mwafukamila ulambo uwa mu Yelusalemu’?”’
23 Fwandi lyene leka tulole amacimvya pali wewe nu musambazi wane umwene wa ku Asilya: Nimakupeela imfwalasi 2,000 tulole ndi cakuti ungalonda antu aakumanile aakukwelapo.
24 Uzye we muno wataila ukuti Aina Ijipti yalakupeela maceleta na aonsi akukwela pa mfwalasi, wewe ungacimvya nanti sile intunguluzi yonga pa yaomvi aasulwe aamusambazi wane?
25 Uzye ukulola ukuti iniza umu konona incende yii ukwaula ukuti Yeova antume? Yeova umwineco kwene uwatanena ati, ‘Yanga ukonone impanga iiya.’”
26 Lyene Eliyakimu mwana Hilikiya na Syebina na Yowa yanenyile Labusyeki iyati: “Landanga na swe yaomvi yako mu lulimi lwa Cialamaiki, pano tukauvwa; utalanda naswe mu lulimi lwa Yayuda pano antu ali papela yi linga yanguvwa.”
27 Lelo Labusyeki wayuzizye ati: “Uzye uku musambazi winu sile na kuli mwemwe kuno umusambazi wane watantuma ukulanda amazwi yaa? Uzye atantumile nu ku yonsi kwene ali papela yi linga yayo aalalya mavi yao nu kumwa matunzi yao kumwi namwe kwene?”
28 Lyene Labusyeki wimilile nu kupunda umu lulimi lwa ya Yuda ati: “Uvwini amazwi ya mwene wa maka, umwene uwa ku Asilya.
29 Umwene watalanda ati, ‘Mutaleka Hezekiya amubepe, pano atalamupususya kuli nene.
30 Nupya mutaleka Hezekiya amulenge ukutaila Yeova ukupitila umu kulanda ati: “Yeova alatupususya nu kuti umusumba uu utalapeelwa uku mwene uwa ku Asilya.”
31 Mutauvwa kuli Hezekiya, pano umwene uwa ku Asilya watalanda ati: “Pangini umutende nani nu kuzala, nupya cila muntu alalya ivizao vya ku myangazi yakwe ni vya ku misamvu yakwe nu kumwa manzi ya mu cifula cakwe,
32 kufikila lino ndiza nu kumutwala umu mpanga iyaya wa mpanga inu, impanga umwaya ingano, waini umupya, umukate, ivyalo vya myangazi, miti ya miolivi nu uci. Lyene mulaya nu umi mutalafwa. Mutauvwa kuli Hezekiya pano akumuponzya ukupitila umu kulanda ati, ‘Yeova alatupusya.’
33 Uzye kwatala kwayako leza umwi uwapususya impanga ya luko lwakwe ku mwene uwa ku Asilya?
34 Ali kwi leza wa Ina Hamati nu wa Ina Alipadi? Yali kwi ya leza ya Ina Sefalavaimu, Aina Hena na Iva? Uzye yapuswisye umusumba uwa Samaliya kuli nene?
35 A leza ci pali ya leza yonsi amu mpanga uwapususyapo impanga yakwe kuli nene, pakuti Yeova awino apususye Yelusalemu?”’”
36 Lelo antu yatamwaswike icili consi, pano walanga umwene watayanena ati, “Mutaya mukamwasuke.”
37 Lyene Eliyakimu mwana Hilikiya uwangalilanga isano, Syebina kalemba na Yowa mwana Asafu uwasunganga ivyalembwa yaile kuli Hezekiya ala iyalepula ivyakuzwala vyao, nupya yaile iyamunena vino Labusyeki walanzile.
Mafutunoti
^ Inzila iipi iya kwamilamo izina lyakuti Abiya.
^ Lolini Ulondolozi wa Mazwi.
^ Kuli kuti umu ncende zyonsi umwali antu anono nanti aingi.
^ Italanti lyonga lyafinanga makilogilamu 34.2. Lolini Ivyeo na Vyuze pa B14.
^ Kuli kuti yano wayemvizye na goldi.
^ Nanti “umukalamba wa yasilika.”
^ Nanti “umukalamba wa kwi sano.”
^ Nanti “umukalamba wakwe yano yapeelanga umwene ivyakulya.”
