2 Yamwene 19:1-37
19 Lino Umwene Hezekiya uvwile sile vivyo walepwile ivyakuzwala vyakwe azwala ni cakuzwala ca kulangilamo ulanda nu kuya umu ng’anda yakwe Yeova.
2 Lyene watumile Eliyakimu uwangalilanga isano, Syebina kalemba, na akalamba yakwe ya simapepo kuli kasesema Ezaya mwana Amozi ale iyazwala ivya kulangilamo ulanda.
3 Yamunenyile iyati: “Hezekiya watalanda ati, ‘Ilelo u wanda wa ulanda, wanda wa ntusi, nupya uwanda wa muzewanya; pano tuli wa mwanaci aali umupiipi nu kupaapa nomba atakweti maka ya kuvyalila.
4 Limwi Yeova Leza wako amauvwa amazwi yonsi yakwe Labusyeki wino umusambazi wakwe umwene wa ku Asilya watatuma uku kupontela Leza wa umi, nupya Yeova Leza wako amamufulula pa mazwi yano atauvwa. Fwandi pepelako swemuno tucili nu umi.’”
5 Lyene aomvi ya Mwene Hezekiya yaile kuli Ezaya.
6 Nupya Ezaya wayanenyile ati: “Yangini mukanene umusambazi winu muti, ‘Yeova watalanda ati: “Utuvwa intete pa mulandu na mazwi yano watuuvwa, kuli kuti miponto ino aomvi ya mwene wa ku Asilya iyampontela.
7 Nimaika melenganyo muli aliwe nupya nga uvwa ilyasi alaswilila uku mpanga yakwe; ndalenga nu kuti ace akomwe uku lupanga mu mpanga yakwe kwene.”’”
8 Lino Labusyeki uvwile ukuti umwene wa ku Asilya watafuma uku Lakisyi, waswilile kuli aliwe nupya wazanyile akulwisya Libina.
9 Lyene umwene uvwile ukuti Tihaka umwene wa ku Etiopia akwiza umu kumulwisya. Nupya kwene watumile yamwi kuli Hezekiya ati:
10 “Kanenini Hezekiya umwene wa ku Yuda muti, ‘Utaleka Leza wako wino wataila aakubepa ukupitila umu kulanda ukuti: “Yelusalemu atalapeelwa uku mwene wa ku Asilya.”
11 Uuvwa vino ya mwene ya ku Asilya yonona impanga zyonsi. Uzye wewe sile ulapusuka?
12 Uzye ya leza ya nko zino ivikolwe vyane vyononyile yazipuswisye? Ili kwi incende ya Gozani, musumba wa Halani, musumba wa Lezefu, na antu ya mu Edeni aikalanga umu Teli-asala?
13 Ali kwi umwene wa ku Hamati, umwene wa ku Alipadi, nu mwene wa misumba ya ku Sefalavaimu nu ku Hena nu ku Iva?’”
14 Hezekiya waposile makalata kuli yano umwene watumile nu kuyabelenga. Lyene waile uku ng’anda yakwe Yeova aya akonzolola makalata pa nkoleelo yakwe Yeova.
15 Nupya Hezekiya watandike ukupepa pa nkoleelo yakwe Yeova ati: “We Yeova Leza wa Ina Izlaeli, wemuno wikala papela* pali ya kelubi, wewe sile uli Leza wa cumi pa ma wene yonsi aapano nsi. Wewe wapanga iyulu ni nsi.
16 We Yeova napaapata si uvwa! Yula manso yako nu kulola we Yeova! Uvwa mazwi yano Senakelibu watatuma aakukutumfya we Leza wa umi.
17 We Yeova ica cumi ukuti ya mwene ya ku Asilya yacuzya antu ya mu nko nu konona impanga zyao.
18 Nupya yosile ya leza yao umu moto, pano yataali aa leza lelo yapanzilwe sile ni minwe ya yantu, kuomvya imbao na mawe. Ali mulandu uno yayononiile.
19 Fwandi we Yeova Leza witu, si tupususye kuli aliwe, pakuti mawene yonsi amu nsi yamanye ukuti wewe sile uli Leza, we Yeova.”
20 Lyene Ezaya mwana Amozi watumile amazwi kuli Hezekiya ati: “Yeova Leza wa Ina Izlaeli walanda wati, ‘Inuvwa ipepo lino watupepa kuli nene ukulozya kuli Senakelibu umwene wa ku Asilya.
21 Yeova watalanda pali aliwe ati:
“Nacisungu wa mu Zioni watakusuula nupya watakutumfya.
Umwana umwanaci wa mu Yelusalemu watakunta umutwe pali wewe.
22 A weni wino ukutumfya nu kupontela?
A weni wino ukukalipilaNu kutumbwila manso yako acilumba?
A Leza wa Muzilo wakwe Izlaeli!
23 Watutumfya Yeova ukupitila umu yaomvi yako yano watumile nu kulanda uti,‘Ndatentemuka imyambaNa maceleta yane aingi sana ankondoUku ncende izya kutali sana uku Lebanoni.Ndakoma imiti isuma iyayako iya mikedali ni miti isuma sana iikaamwa ukuti yunipa.
Ndafika uku ncende iya kutali sana ukwaya imiti isuma sana.
24 Ndimba ivisima nu kumwa manzi ya ku mpanga zyuze;Ndakamya inguzi zyonsi* zya mu Ijipti ukuomvya ingazo zyane.’
25 Uzye utuvwa? Napanzile ukucita vivyo mpiti sana.
Napekinye ukucita vivyo mpiti mpiti.
Lyene insita yatifika iyakuti incite vivyo.
Ulasangula imisumba ya malinga ukuya ivitotela.
26 Antu aakaikalamo yatalakwata uwa kuyazwa;Yaluvwa intete nupya yalazewana.
Yalaya wa vimelwa vya mu calo na wi sote,Wi sote ilyatilipya nu muza ukaye uwa ku ufumondaka ilyamela api paala.
27 Lelo nkamanya lino wikala, lino wafuma, na lino wingila,Nupya nkamanya lino wansokela,
28 Pano imanya vino watusoka nu kuvwa kuno ukung’anza.
Fwandi ndakoweka iswelo umu mpuno zyako nu kwika umwando wa mfwalasi umu kanwa kako,Nupya ndakuswilizya kuno wafumile.”
29 “‘Nupya icimaya icimanyililo kuli wewe* aeci: Umwaka uu ulalya ivyakulya ivyativiimelela; nu mu mwaka wakwe ciili kwene ulalya ivyakulya ivyativiimelela; lelo umu mwaka wakwe citatu ulalima nu kuzombola, nupya ulalima ivyalo vya myangazi nu kulya ivizao ivyatiseekako.
30 Amu ng’anda yakwe Yuda aali nu umi yalakwata imisisi wa vimelwa nu kuseeka ivizao.
31 Kulaya antu aumi aalafuma umu Yelusalemu na alapusuka alafuma umu Mwamba wa Zioni. Yeova wa maumba aalacita vii pa mulandu nu kucincila kwakwe.
32 “‘Fwandi Yeova watalanda pa mwene wa ku Asilya ati:
“Ataliza umu musumbaNanti ukulasamo ulucetoNanti ukwizamo ni cisyanguNanti ukuuzanza.”
33 Yeova watalanda nu kuti:“Viivi kwene vino wizile avino alaswilila, ataliza umu musumba.
34 Ndacingilila umusumba uu nu kuupususya pa mulandu waneNa pa mulandu na Devedi umuomvi wane.”’”
35 Wanda kwene uuwa usiku malaika wakwe Yeova waile nu konona asilika 185,000 aali umu nkambi ya Ina Asilya. Lino antu yazyusile katondo, yaweni sile vitumbi vitupu.
36 Fwandi Senakelibu umwene wa ku Asilya wafumile kuuku aswilila uku Ninive akuno aya aikala.
37 Nupya lino wafukime pa ng’anda yakwe Nisiloki leza wakwe, Adilameleki na Syaleza ana yakwe yamukomile ukuomvya ulupanga nu kuutukila uku Alalati. Nupya umwanakwe Esa-adoni wamupyanyile pa wene.
Mafutunoti
^ Nanti limwi, “pakasi.”
^ Nanti “mifolo iyafuma umu Luzi Lwa Naelo.”
^ Kuli kuti Hezekiya.
