2 Yamwene 2:1-25
2 Lino Yeova wali umupiipi nu kusenda Eliya umu lwelele ukuomvya icimuza, Eliya na Elisya yafumile uku Giligali.
2 Eliya wanenyile Elisya ati: “Ikala pakwene, pano Yeova watantuma uku Betele.” Lelo Elisya wamunenyile ati: “Nkulapa pa nkoleelo yakwe Yeova Leza wa umi na pali wewe ukuti nsikukusya.” Fwandi yapisile yonsi uku Betele.
3 Lyene ana aonsi yakwe ya kasesema amu Betele yaile kuli Elisya nu kumuzya iyati: “Uzye watumanya ukuti ilelo Yeova amasenda umusambazi wako nupya amata ukukutungulula?” Nawe wayaswike ati: “Ee, imanya mpiti. Mutaalanda api lyasi lii.”
4 Lyene Eliya wanenyile Elisya ati: “Ikala pakwene, pano Yeova watantuma ukuya uku Yeliko.” Lelo Elisya walanzile ati: “Nkulapa pa nkoleelo yakwe Yeova Leza wa umi na pali wewe ukuti nsikukusya.” Fwandi yaile uku Yeliko.
5 Lyene ana aonsi yakwe ya kasesema aali umu Yeliko yaile kuli Elisya nu kumuzya iyati: “Uzye watumanya ukuti ilelo Yeova amasenda umusambazi wako nupya amata ukukutungulula?” Nawe wayaswike ati: “Ee, imanya mpiti. Mutaalanda api lyasi lii.”
6 Nupya kwene Eliya wanenyile Elisya ati: “Ikala pakwene, pano Yeova watantuma ukuya uku Yodani.” Lelo Elisya walanzile ati: “Nkulapa pa nkoleelo yakwe Yeova Leza wa umi na pali wewe ukuti nsikukusya.” Fwandi yoili kwene yapisile.
7 Nupya ana aonsi 50 yakwe ya kasesema nayo kwene yapisile iyaya iimilila katalamukila ala yakulolekesya Eliya na Elisya lino yaali umu mbali ya Luzi Lwa Yodani.
8 Lyene Eliya watozile icakuzwala cakwe acivungulula nu kuuma pa manzi, manzi nayo yapatukine, nupya yoili yalamvile pa musili uume.
9 Lino yalamvile sile, Eliya wanenyile Elisya ati: “Lenga cino ukulonda ukuti nkucitile lino ntatala nasendwa ukufuma kuli wewe.” Elisya nawe walanzile ati: “Napaapata, nkulengako maka ukulingana na maila yaili pa maka yano Leza wakupeela.”
10 Lyene wamwaswike ati: “Walenga icintu citale. Ndi cakuti umalolako lino nkusendwa, ale cimaya vivyo kwene, lelo nga cisi vivyo ale cisikucitika.”
11 Lino yapitanga ala yafumile yakulanzyanya, mu kupumikizya, kwalolike iceleta lya moto ni mfwalasi zya moto izyayapatukinye, nupya icimuza casenzile Eliya umu lwelele.
12 Lino Elisya waweni ivyacitikanga wapunzile ati: “Tata, tata! Nalola iceleta lyakwe Izlaeli na antu yakwe akwezile pa mfwalasi!” Lino watiile ukulola Eliya watozile icakuzwala cakwe nu kucilepula paili.
13 Pa cisila watozile icakuzwala cakwe Eliya cino waponyizye alino aswilila aya aimilila umu mbali ya Luzi Lwa Yodani.
14 Lyene watozile icakuzwala cico nu kuumila pa manzi nupya walanzile ati: “Uzye Yeova, Leza wakwe Eliya ali kwi?” Lino umile pa manzi, manzi yapatukine nupya Elisya walamvile.
15 Lino ana aonsi yakwe ya kasesema aku Yeliko yamuweni katalamukila, yalanzile iyati: “Maka yakwe Eliya yali pali Elisya.” Fwandi yapisile iyaya iyamukomenkanya nu kufukama pa nkoleelo yakwe.
16 Yamunenyile iyati: “Aonsi 50 aamaka aeya. Leka yapite yakalonde umusambazi wako. Limwi umupasi wakwe Yeova iumusenda nu kuyamusumbila pa mwamba umwi nanti umu lwanga lumwi.” Lelo wayanenyile ati: “Awe mutayatuma.”
17 Lelo yatwalilile ukumupatikizya asuka ayazumilizya, fwandi wayanenyile ati: “Yatumini.” Nayo yatumile aonsi yayo iyafuma yakumulonda pa manda yatatu, lelo yatamuzanyile.
18 Lino yaswilile kuli aliwe, wali umu Yeliko. Lyene wayuzizye ati: “Uzye ntamunenyile ukuti mutayako?”
19 Lino papisile insita aonsi ya mu musumba yanenyile Elisya iyati: “Musambazi ukulola ukuti musumba wikala pasuma; lelo manzi yataazipa nupya impanga itaavunda.”*
20 Nawe wayanenyile ati: “Ndetelini imbale inono ipya mwikemo nu musilya.” Nayo yamuletiile.
21 Lyene waile uku kafukoka ka manzi aitilamo umusilya nupya walanzile ati: “Yeova walanda wati, ‘Insangulula manzi. Yatalaletapo imfwa nanti ukulenga ana aatatala yavyalwa ukufwa.’”
22 Nupya manzi yasanguluka ukufika na ndakai, wakwe viivi kwene vino Elisya walanzile.
23 Wafumile kuuku aya uku Betele. Lino wapitanga, tulumendo tumwi twafumile umu musumba nu kutandika ukumusoweka ala tukuti: “Pitanga waya icilipala! Pitanga waya icilipala!”
24 Nawe wapiliwike nu kutulolekesya nupya watutiifile umwi zina lyakwe Yeova. Nupya ya beele yaili akaci yafumile umu mpanga nu kusandola utulumendo 42.
25 Watwalilile nu ulendo wa kuya uku Mwamba wa Kalimeli, nupya lino wafumile kuuku waswilile uku Samaliya.
Mafutunoti
^ Nanti limwi, “ikaonona ana aatatala yavyalwa.”
