2 Yamwene 20:1-21
20 Lyene Hezekiya wizile alwala umupiipi nu kufwa. Kasesema Ezaya mwana Amozi waile kuli aliwe nu kumunena ati, “Yeova watalanda ati: ‘Nena amu ng’anda yako ivyakucita pano umafwa, usikupola.’”
2 Lyene Hezekiya wapiliukile uku ciumba atandika ukupepa kuli Yeova ati:
3 “Napaapata we Yeova, iusya vino nakuombela na ucisinka nu mwenzo wane onsi na vino nkacita ivisuma kuli wewe.” Nupya Hezekiya watandike ukulila sana.
4 Lino Ezaya atatala wafika nu mu musolo wa pakasi, Yeova wamunenyile ati:
5 “Swilila ukanene Hezekiya aakatungulula antu yane uti, ‘Yeova Leza wakwe Devedi icikolwe cako walanda wati: “Inuvwa ipepo lyako. Indola na minsozi yako. Nimakupozya. Nupya pa wanda wakwe citatu ulaya uku ng’anda yakwe Yeova.
6 Nimakulundilako imyaka 15 nupya ndakupususya nu kupususya umusumba uu uku mwene wa ku Asilya, nupya ndacingilila umusumba uu pa mulandu wane na pa mulandu wakwe Devedi umuomvi wane.”’”
7 Lyene Ezaya walanzile ati: “Letini iciulungwa ca masamvu aume.” Nayo yalesile nu kumwikila pa cilonda, lyene watandike ukupola panono panono.
8 Hezekiya uzizye Ezaya ati: “Nimasininkizya uli ukuti Yeova amampozya nu kuti ndaya uku ng’anda yakwe Yeova pa wanda wakwe citatu?”
9 Ezaya waswike ati: “Icimanyililo icifumile kuli Yeova icikulangilila ukuti Yeova alafikilizya vino watalanda aeci: Uzye ukulonda icinzingwa icili pa masitepu cipuzye masitepu 10 ukuya uku nkoleelo nanti cipuzye masitepu 10 ukuwelela icisila?”
10 Hezekiya walanzile ati: “Icanguke uku cinzingwa ukupuzya masitepu 10 ukuya inkoleelo lelo citanga cipuzye masitepu 10 ukuswilila uku cisila.”
11 Fwandi Ezaya wapefile kuli Yeova nawe walenzile icinzingwa ca pa masitepu yakwe Ahazi kuswilila uku cisila ukupuzya masitepu 10.
12 Pa nsita kwene iiya Belodaki-baladani umwene wa ku Babiloni mwana Baladani watumile makalata ni ca upe kuli Hezekiya pano uvwile ukuti Hezekiya walwala.
13 Hezekiya wapokelile yano umwene wa ku Babiloni watumile nupya wayalanzile ivyuma vya mwi sano lyakwe vyonsi, kuli kuti siuva, goldi, mafuta yakwe basamu, na mafuta yauze amutengo, ivyanzo vyakwe na vyonsi ivyali umu vipao vyakwe. Kutaali icili consi cino Hezekiya atayalanzile umwi sano lyakwe nu mu mpanga yonsi ino wateekanga.
14 Lyene Ezaya kasesema waile uku Mwene Hezekiya nu kumuzya ati: “I vyani vino aonsi yaa iyalanda nupya yafumile kwi?” Hezekiya nawe waswike ati: “Iyafuma uku mpanga ya kutali sana, ku Babiloni.”
15 Nupya wamuzizye ati: “I vyani vino iyalola umwi sano lyako?” Hezekiya watiile: “Iyalola vyonsi sile. Kusi nanti acimwi cino ntayalanzile umu vipao vyane.”
16 Lyene Ezaya wanenyile Hezekiya ati: “Uvwa vino Yeova watalanda,
17 ‘Yeova watalanda ati: “Manda yakwiza lino vyonsi ivyaya umwi sano lyako na vyonsi vino ivikolwe vyako vyasunga ukufika ndakai, vilasendwa uku Babiloni. Kusi nanti acimwi icilasyala.
18 Nupya anako kololo yamwi yalasendwa nupya yalaya aomvi ya kwi sano lya mwene wa ku Babiloni.”’”
19 Lyene Hezekiya wanenyile Ezaya ati: “Mazwi yano Yeova watalanda yali sile ningo.” Walanzile nu kuti: “Cilazipa ndi cakuti kulaya umutende nu kucingililwa* mu manda yane.”
20 Ilyasi lyonsi ilyasyala ilikalanda pali Hezekiya ni vintu vya maka vino wacisile na vino wapanzile umwa kusungila manzi nu mwa kupita manzi alino na vino waleesile manzi mu musumba, lyalembwa umwi buku lya mpiti ilikalanda pali ya mwene ya mu Yuda.
21 Lyene Hezekiya wafwile nu kuziikwa ukwalaala ivikolwe vyakwe; nupya Manase umwanakwe wamupyanyile pa wene.
Mafutunoti
^ Mu Ciebele: “Icumi.”
