2 Yamwene 21:1-26
21 Manase wali ni myaka 12 lino watandike ukuteeka, nupya wateesile imyaka 55 umu Yelusalemu. Nyina wali a Hepeziba.
2 Wasosyanga Yeova pano wacitanga ivya winyi vino inko zino Yeova wazingiile Aina Izlaeli zyacitanga.
3 Wakuuzile cipya cipya incende zino Hezekiya isi ononyile nupya wakuulile Baali maulambo nu kwimika ulucesi lwa kupepa* wakwe vino Ahabu umwene wa mu Izlaeli wacisile. Wafukamilanga ni ntanda zyonsi izya mwi yulu nu kuziombela.
4 Nupya wakuuzile na maulambo yakwe ya leza ya ufi umu ng’anda yakwe Yeova, ing’anda ino Yeova walanzilepo ukuti: “Mu Yelusalemu u mulaya izina lyane.”
5 Nupya wakuulile ni ntanda zyonsi zya mwi yulu maulambo umu misolo iili ya pa ng’anda yakwe Yeova.
6 Osile nu mwanakwe umu moto; wacitanga ivya maleele, nu kusapoola, nupya wasonsile na ya sing’anga na ya kasapoola. Wacisile ivintu iviipe sana ivya kusosya Yeova.
7 Ulucesi lwa kupepa* luno wapanzile walwisile umu ng’anda yakwe Yeova, kuli kuti ing’anda ino Leza wanenyile Devedi na Solomoni umwanakwe ukuti: “Ndika izina lyane umu ng’anda kwene yii mu Yelusalemu kuli kuti musumba uno nasoolola, mu mitundu yonsi ya Ina Izlaeli.
8 Ntalaleka nupya Aina Izlaeli ukululumba umu mpanga ino napeezile ivikolwe vyao ndi cakuti yakulondela masunde yano nayapeezile, kuli kuti masunde yonsi yano umuomvi wane Mose wayanenyile ukulalondela.”
9 Lelo yatuvwilile, nupya Manase watwalilile ukuyaponzya nu kuleka ukuti yacita ivintu iviipisye ukucila vino inko zino Yeova wayazingiile zyacitanga.
10 Yeova watwalilile ukulanda ukupitila muli ya kasesema aomvi yakwe ati:
11 “Manase umwene wa Yayuda akacita ivintu vyonsi vii ivya winyi; wacita ivintu iviipisye ukucila Aina Amoli yonsi amukoleelile, nupya walenga Ayuda ukuyembuka ukupitila umu vilubi vyakwe.
12 Fwandi Yeova Leza wa Ina Izlaeli walanda wati: ‘Ndaleta intazi umu Yelusalemu nu mu Yuda, icakuti wensi aaluvwa alazunguka.
13 Nupya ndaomvya intambo ya kupimilako umu Yelusalemu ino naomvizye uku Samaliya, nupya ndaomvya ica kulinganyizizyako cino naomvizye uku ya mu ng’anda yakwe Ahabu, ndapukuta Yelusalemu wakwe vino umuntu akapukuta imbale nu kuikupika.
14 Ndatazyela antu yane asyala umu mpanga yakwe Yuda nu kuyapeela uku yalwani yao, nupya yalasendwa umu uzya kumwi ni vintu vyao vyonsi,
15 pano yacitanga ivintu iviipe nupya yatwalilile ukunsosya ukufuma pa wanda uno ivikolwe vyao vyafumile umu mpanga ya Ijipti kufika na ndakai.’”
16 Manase atapeleelile sile pa kulenga Ayuda ukuyembuka ukupitila umu kucita iviipe ivyasosyanga Yeova, lelo wakomile na antu ya kaele aingi sana umu Yelusalemu monsi.
17 Ilyasi lyonsi ilyasyala ilikalanda pali Manase na pali vyonsi vino wacisile ni membu zyonsi zino wacisile, lyalembwa umwi buku lya mpiti ilikalanda pali ya mwene ya mu Yuda.
18 Lyene Manase wafwile nu kuziikwa ukwalaala ivikolwe vyakwe nupya wazisilwe umu calo icayelile pa ng’anda yakwe kuli kuti calo cakwe Uza; nupya Amoni umwanakwe wamupyanyile apa wene.
19 Amoni wali ni myaka 22 lino watandike ukuteeka, nupya wateesile imyaka iili umu Yelusalemu. Nyina wali a Mesyulemeti mwana Haluzi Umwina Yotiba.
20 Wasosyanga Yeova wakwe viivi kwene vino Manase isi wacisile.
21 Wacitanga iviipe vyonsi vino isi wacitanga, nupya watwalilile ukuombela nu kufukamila ivilubi vino isi waombelanga.
22 Wasuuzile Yeova Leza wa vikolwe vyakwe, nupya atalondelanga amasunde yakwe Yeova.
23 Mu kuya kwa nsita, aomvi yakwe yamupangiile nupya yamukomiile umu ng’anda yakwe.
24 Lelo antu ya mu mpanga iiya yakomile yonsi apangiile Umwene Amoni nupya iisile Yosiya umwanakwe pa wene.
25 Ilyasi lyonsi ilyasyala ilikalanda pali Amoni na pali vyonsi vino wacisile, lyalembwa umwi buku lya mpiti ilikalanda pali ya mwene ya mu Yuda.
26 Fwandi yamuziisile umwi lindi lyakwe mu calo cakwe Uza, nupya Yosiya umwanakwe u wamupyanyile pa wene.
