2 Yamwene 22:1-20
22 Yosiya wali ni myaka 8 lino watandike ukuteeka, nupya wateesile imyaka 31 umu Yelusalemu. Nyina wali a Yedida mwana Adaya uwa ku Bozikati.
2 Wacitanga ivisuma kuli Yeova nupya wacitanga ivisuma vyonsi vino Devedi icikolwe cakwe wacisile, ataatazile ate ukucita ivisuma.
3 Umu mwaka uwalenga 18 uwa kuteeka kwakwe, Umwene Yosiya watumile Syafani kalemba, mwana Azaliya mwana Mesyulamu uku ng’anda yakwe Yeova ati:
4 “Yanga kuli Hilikiya simapepo mukalamba ukamunena ukuti akolonganike impiya zyonsi zino antu yaleta umu ng’anda yakwe Yeova, zino ya simapepo aakaombela pa mulyango yakolonganika ukufuma uku yantu.
5 Uleke yapeele impiya zizyo kuli yano yasontwa ukuomba umulimo umu ng’anda yakwe Yeova, nayo yalapeela aomvi aalinzile ukuzifya ivyononeka uku ng’anda yakwe Yeova,
6 kuli kuti ukupeela amanya ivya kupangapanga na ya kakuula; nayo yalaziomvya uku kukala imbao na mawe aaputule akuomvya uku kuzifya ing’anda.
7 Lelo kutafwile ukuya uwa kuyuzya pali vino impiya zizyo zikuomviwa, pano aonsi yayo atailwe.”
8 Lyene Hilikiya simapepo mukalamba wanenyile Syafani kalemba ati: “Inzana ibuku lya Masunde umu ng’anda yakwe Yeova.” Fwandi Hilikiya wapeezile Syafani ibuku lilyo atandika nu kulibelenga.
9 Lyene Syafani kalemba waile uku mwene nu kumunena ati: “Aomvi yako iyafukumula impiya izyali umu ng’anda yakwe Leza, nupya iyazipeela kuli yano yasontwa ukwangalila umulimo wa pa ng’anda yakwe Yeova.”
10 Nupya Syafani wanenyile umwene ati: “Kuli ni buku lino Hilikiya simapepo watampeela.” Lyene watandike ukubelengela umwene.
11 Lino umwene uvwile sile amazwi aali umwi buku lya masunde, walepwile ivyakuzwala vyakwe.
12 Lyene umwene wanenyile Hilikiya simapepo, Ahikamu mwana Syafani, Akiboli mwana Mikaya, Syafani kalemba na Asaiya umuomvi wa mwene ati:
13 “Yangini mukanguzizye kuli Yeova nu kuzizya antu ya mu mpanga yii kumwi na Ayuda yonsi ukulozya uku mazwi ali umwi buku lii ilyatilizanwa, pano ukali wakwe Yeova uwatiwiza pali sweswe ukalamba, pa mulandu wakuti ivikolwe vitu vituvwilile amazwi ali umwi buku lii nupya yataalondile vyonsi ivyalembwamo.”
14 Fwandi Hilikiya simapepo, Ahikamu, Akiboli, Syafani na Asaiya yaile kuli Hulida kasesema mwanaci. Hulida wali a muka Syalumu mwana Tikiva mwana Haliasi uwasakamalanga umwa kusungila ivyakuzwala, nupya wikalanga umu citungu cakwe ciili ica musumba wa Yelusalemu; nupya yaile iyalanda nawe kuuku kwene.
15 Hulida wayanenyile ati: “Yeova Leza wa Ina Izlaeli walanda wati, ‘Munene umuntu uwatamutuma kuli nene muti:
16 “Yeova watalanda ati, ‘Ndaleta uwononesi pa ncende yii na pa yantu akaikalamo, nupya mazwi yonsi amwi buku lino umwene watabelenga yalafikiliziwa.
17 Pa mulandu wakuti yampondokela nupya yakupeela malambo ya koca kuli ya leza pakuti yansosye muli vyonsi vino yakucita, ndaleta ukali wane pa ncende yii nupya kusi alaulesya.’”
18 Lelo umwene wa ku Yuda uwatamutuma ukuti mwize muzye kuli Yeova mukamunene muti, “Yeova Leza wa Ina Izlaeli watalanda ati: ‘Kulozya uku mazwi yano watuuvwa,
19 pa mulandu wakuti watonsizye umwenzo nu kuicefya pa nkoleelo yakwe Yeova lino uvwile mazwi yano nalanzile pa ncende yii na pa yantu akaikalamo, kuli kuti lino nalanzile ukuti antu yalazunguka lino yaluvwa nu kulola icitiipu iciliza pali aliyo, nupya walepwile ivyakuzwala vyako nu kuloosya pa nkoleelo yane, fwandi Yeova walanda wati nani inuvwa ipepo lyako.
20 Ali mulandu kwene uno ndaleka ukuti uziikwe umwi lindi lyako umu mutende ukwalaala ivikolwe vyako, nupya utalalola ucuzi onsi uno ndaleta pa ncende yii.’”’” Lyene yaile iyanena umwene vino Leza walanzile.
