2 Yamwene 23:1-37
23 Lyene umwene watumile akuyaama akalamba ya mu Yuda nu mu Yelusalemu, nayo yacisile vivyo kwene.
2 Pa cisila umwene waile uku ng’anda yakwe Yeova pamwi na antu yonsi amu Yuda, aikazi ya mu Yelusalemu yonsi, ya simapepo na ya kasesema, kuli kuti antu yonsi ukufuma apa munono ukufika pa mukalamba. Wayabelengiile vyonsi ivyali umwi buku lya upangano lino yazanyile umu ng’anda yakwe Yeova.
3 Umwene wimilile umupiipi ni cipilala nu kupangana upangano na Yeova uwakuti wali nu kulauvwila Yeova nu kukonka masunde yakwe nu mwenzo wakwe onsi nu umi wakwe onsi ukupitila umu kucita ivyalemvilwe umwi buku liili ilya upangano. Nupya antu yazumilizye upangano uwo.
4 Lyene umwene wanenyile Hilikiya simapepo mukalamba na ya simapepo yauze alino na ya simapepo aombelanga pa milyango ukuti yakafumye iviya vyonsi vino yaomvyanga pa kupepa Baali umu ng’anda yakwe Yeova, viya vino yaomvyanga pa kupepa ulucesi* na vino yaomvyanga pa kupepa intanda zyonsi izya mwi yulu. Lyene wavyociile ukunzi ya musumba wa Yelusalemu uku mutentemuko wa Kiduloni, nupya wasenzile itwi uku Betele.
5 Lyene wazinzile ya simapepo aombelanga ya leza yauze yano ya mwene ya mu Yuda yasonsile ukuti yapeela malambo ya koca pa ncende zya kupepelapo izyali umu misumba ya mu Yuda nu mu ncende izyazingulwike Yelusalemu, kumwi na aapeelanga malambo ya koca kuli Baali, kwi lanzi, uku mwezi nu ku ntanda zyonsi izya mwi yulu.
6 Wafumizye ulucesi lwa kupepa* umu ng’anda yakwe Yeova nu kulutwala ukunzi ya musumba wa Yelusalemu uku Mukonko wa Kiduloni, nupya walociile umu mukonko kwene uwo nu kuvungola vyonsi asalanganyizizya nu lukungu pa malindi ya yantu yonsi.
7 Omozile na mang’anda ya yonsi ya cizelele ya pi tempele, aali umu ng’anda yakwe Yeova na kuno anaci yasumilanga matenti ya kuvimbila ulucesi lwa kupepa.*
8 Lyene wafumizye ya simapepo yonsi umu misumba ya mu Yuda, walenzile ni vifulo vya kupepelapo pano ya simapepo yapeelelanga malambo ya koca kuti vitaya ivilinge ukupepelapo ukufuma uku Geba ukufika uku Belisyeba. Ononyile ni ncende zya kupepelapo izyayelile pa mpongolo yakwe Yoswa intunguluzi ya mu musumba, izyayelile kuli cimani lino umwi akwingila apa mpongolo ya musumba.
9 Ya simapepo aombelanga pa ncende zya kupepelapo, yataombelanga pa ulambo wakwe Yeova uwa mu Yelusalemu, lelo yalyanga umukate uwaula icitutumusi pamwi na aina yao.
10 Walenzile ni ncende ya kupepelapo iya Tofeti iyayelile umu mukonko wakwe ya mwana Hinomu* itaya ilinge ukupepelapo pakuti kutaya nanti aumwi uwa koca umwanakwe umonsi nanti umwanaci umu moto kuli Moleki.
11 Walesizye ni mfwalasi zino ya mwene ya mu Yuda yapeezile ukwi lanzi kuti zitaingilila umu ng’anda yakwe Yeova ukupita umu muputule wa kulilamo wakwe Natani-meleki umuomvi wa kwi sano, uwayelile umu muputule wa vipilala; osile na maceleta yano yapeezile ukwi lanzi.
12 Umwene ononyile na maulambo yano ya mwene ya mu Yuda yapanzile api paala lyakwe Ahazi, kumwi na maulambo yano Manase wapanzile umu misolo yiili iya ng’anda yakwe Yeova. Wayavungozile nu kusalanganyizizya ulukungu umu Mukonko wa Kiduloni.
13 Nupya umwene walenzile nu kuti incende zya kupepelapo izyayelile pa nkoleelo ya musumba wa Yelusalemu zitaya izilinge ukupepelapo, kuli kuti izyayelile uku kaeya ka Mwamba wa Ononyi,* zino Solomoni umwene wa Ina Izlaeli wakuulile Asyitaloti leza mwanaci uwa winyi uwa Ina Sidoni na zino wakuulile Kemosyi leza wa Ina Moabu uwa winyi alino na zino wakuulile Milikomu leza wa Ina Amoni uwa winyi.
14 Watamozile ivipilala vya kupepa nu kuputoola incesi zya kupepa,* nupya pa ncende zizyo wazuzizyepo mafupa ya yantu.
15 Ononyile nu ulambo uwali uku Betele, ni ncende ya kupepelapo ino Yeloboamu mwana Nebati wapanzile nu kulenga Aina Izlaeli ukuyembuka. Pa cisila ca konona ivintu vivyo, osile incende ya kupepelapo ipasyala sile ulukungu, nupya osile nu lucesi lwa kupepa.*
16 Lino Yosiya wapiliwike nu kulola malindi pa mwamba, watumile akuyasenda mafupa alimo nu kuyocela pa ulambo pakuti utaya ulinge ukupeelelapo malambo, kulingana na viivi kwene vino Yeova walanzile ukupitila umu muntu wakwe Leza ukuti ivintu vii vilinzile ukucitika.
17 Nupya uzizye ati: “I lindi lyakwe weni lino nkulola paapa?” Aonsi ya mu musumba nayo yamwaswike iyati: “I lindi lya muntu wakwe Leza wa cumi uwa ku Yuda uwasoowile ivintu vino watucita uku ulambo wa ku Betele.
18 Fwandi walanzile ati: “Lekini apuuze. Mutaleka ali wensi aleme uku mafupa yakwe.” Fwandi yasiile mafupa yakwe kumwi na mafupa yakwe kasesema uwafumile uku Samaliya.
19 Yosiya ononyile mang’anda yonsi akupepelamo aali pa ncende zya kupepelapo umu misumba ya mu Samaliya, yano ya mwene ya mu Izlaeli yakuuzile pakuti yasosye Leza, nupya wacisile uku mang’anda yayo wakwe viivi kwene vino wacisile uku ncende ya kupepelapo iya ku Betele.
20 Nupya ya simapepo yonsi aombelanga pa ncende zya kupepelapo aali kuuku wayociile pa maulambo, nu kocelapo mafupa ya yantu. Pa cisila waswilile uku Yelusalemu.
21 Lyene umwene wanenyile antu yonsi ati: “Pekanyini nu kuzevya Ucilo kuli Yeova Leza winu wakwe vino calembwa umwi buku lii ilya upangano.”
22 Kutaatazile kuye Ucilo wakwe uu umu manda yano ya kapingula yapingulanga Aina Izlaeli nanti umu manda yonsi yakwe ya mwene ya mu Izlaeli na yakwe ya mwene ya mu Yuda.
23 Lelo umu mwaka uwalenga 18 uwa kuteeka kwa Mwene Yosiya yazevizye Ucilo uwo kuli Yeova umu Yelusalemu.
24 Yosiya wakomile na ya kacita ya maleele, na ya kasapoola, nupya ononyile ivilubi vyakwe telafimu, vilubi vya winyi* ni vintu vyonsi ivya winyi ivyali umu mpanga ya Yuda nu mu Yelusalemu, pakuti acite ivyalemvilwe umwi buku lya masunde lino Hilikiya simapepo wazanyile umu ng’anda yakwe Yeova.
25 Kutaali umwene ali wensi pali ya mwene aamukoleelile uwaombelanga Yeova nu mwenzo wakwe onsi nu umi wakwe onsi na maka yakwe yonsi wakwe aliwe, pano wene wacitanga vyonsi ivyali umu Masunde Yakwe Mose, nupya kutaali umwene ali wensi uwali wakwe aliwe pali ya mwene aamulondelilepo.
26 Lelo Yeova ataatile ukusokela amu Yuda pa mulandu ni viipe vino Manase wacisile pakuti amusosye.
27 Yeova walanzile ati: “Ndazinga Yuda wakwe vino nazinzile Izlaeli, nupya ndakana umusumba wa Yelusalemu uno nasoolola ni ng’anda ino nalanzile inti, ‘Apalaya izina lyane.’”
28 Ilyasi lyonsi ilyasyala ilikalanda pali Yosiya na vyonsi vino wacisile, lyalembwa umwi buku lya mpiti ilikalanda pali ya mwene ya mu Yuda.
29 Umu manda yakwe Yosiya, Falao Neko umwene wa ku Ijipti waile umu kukomenkanya umwene wa ku Asilya uku Luzi Lwa Yufuleti, lyene Umwene Yosiya waile umu kumulwisya, lelo lino Neko wamuweni sile wamukomile uku Megido.
30 Fwandi aomvi yakwe yasenzile icitumbi cakwe umwi celeta ukufuma uku Megido nu kutwala uku Yelusalemu iyaya yamuziika umwi lindi lyakwe. Lyene antu ya mu mpanga iiya yatoozile Yeowazi mwana Yosiya nu kumwika pa wene ukupyana pali isi.
31 Yeowazi wali ni myaka 23 lino watandike ukuteeka nupya wateesile imyezi itatu umu Yelusalemu. Nyina wali a Hamutali mwana Yelemiya uwa ku Libina.
32 Watandike ukusosya Yeova wakwe viivi kwene vino ivikolwe vyakwe vyacisile.
33 Falao Neko wisile Yeowazi umu cifungo uku Libula umu mpanga ya Hamati pakuti atateeka umu Yelusalemu, nupya walanzile ukuti umu mpanga ya Yuda mwafuma umusonko wa matalanti* yakwe siuva 100 ni talanti lyakwe goldi.
34 Nupya Falao Neko wisile Eliyakimu mwana Yosiya pa wene ukumupyanika pali isi Yosiya, amupeela ni zina lyuze ilyakuti Yeoyakimu; lelo wasenzile Yeowazi uku Ijipti kuno waile afwila.
35 Yeoyakimu wapeelanga Falao siuva na goldi, lelo pakuti akwanisya ukupeela Falao siuva wapingwile ukuti amu mpanga yakwe yalipila imisonko. Wisileko icipendo cakwe siuva na goldi cino cila muntu alinzile ukulalipila pakuti apeela impiya zizyo kuli Falao Neko.
36 Yeoyakimu wali ni myaka 25 lino watandike ukuteeka, nupya wateesile imyaka 11 umu Yelusalemu. Nyina wali a Zebida mwana Pedaiya uwa ku Luma.
37 Wasosyanga Yeova wakwe viivi kwene vino ivikolwe vyakwe vyacisile.
Mafutunoti
^ Lolini Ulondolozi wa Mazwi.
^ Lolini Ulondolozi wa Mazwi.
^ Lolini Ulondolozi wa Mazwi.
^ Lolini Ulondolozi wa Mazwi, “Gehena.”
^ Kuli kuti Umwamba wa Miolivi, maka maka ulusansa lwa ku kaeya ulukaamwa nu kuti Umwamba wa Luyembu.
^ Lolini Ulondolozi wa Mazwi.
^ Lolini Ulondolozi wa Mazwi.
^ Izwi lya Ciebele lyakolana ni zwi ilikaomviwa uku “usali.” Nupya likaomviwa nu ku kulondolola icintu ca sile sile.
^ Italanti lyonga lyafinanga makilogilamu 34.2. Lolini Ivyeo na Vyuze pa B14.
