2 Yamwene 24:1-20
24 Mu manda yakwe Yeoyakimu, Umwene Nebukadineza uwa ku Babiloni waile umu kulwisya Ayuda, nupya Yeoyakimu wizile aya umuomvi wakwe pa myaka itatu. Lelo wizile amupondokela.
2 Lyene Yeova watandike ukumutumila aakumuzanza ukufuma uku Ina Kalideya, Aina Silya, Aina Moabu na Ina Amoni. Watwalilile ukuyatuma uku mpanga ya Yuda kuti yakayonone, wakwe viivi kwene vino Yeova walanzile ukupitila muli ya kasesema aomvi yakwe.
3 Yeova u walenzile ukuti vii vicitikile Ayuda pakuti ayazinge pa mulandu ni membu zyonsi zino Manase wacisile,
4 na pa yantu ya kaele yano wakomile, pano wakomile antu ya kaele umu Yelusalemu monsi nupya Yeova atalondanga ukumwelela.
5 Ilyasi lyonsi ilyasyala ilikalanda pali Yeoyakimu na pali vyonsi vino wacisile, lyalembwa umwi buku lya mpiti ilikalanda pali ya mwene ya mu Yuda.
6 Lyene Yeoyakimu wafwile nu kuziikwa ukwalaala ivikolwe vyakwe, nupya Yeoyakini umwanakwe wamupyanyile pa wene.
7 Umwene uwa ku Ijipti ataatazile atume asilika ukufuma umu mpanga yakwe, pano umwene uwa ku Babiloni waposile impanga yonsi iyaali iya mwene uwa ku Ijipti kufuma uku Mukonko wa Ijipti kufika uku Luzi Lwa Yufuleti.
8 Yeoyakini wali ni myaka 18 lino watandike ukuteeka, nupya wateesile imyezi itatu umu Yelusalemu. Nyina wali a Neusyita mwana Elinatani uwa ku Yelusalemu.
9 Wasosyanga Yeova wakwe viivi kwene vino isi wacisile.
10 Pa nsita kwene iiya, aomvi yakwe Nebukadineza uwa ku Babiloni yaile umu kulwisya umusumba wa Yelusalemu, nupya yaile iyauzinguluka.
11 Umwene Nebukadineza waile uku musumba ala aomvi yakwe iyauzinguluka.
12 Yeoyakini umwene wa ku Yuda waile uku mwene uwa ku Babiloni pamwi na nyina, aomvi yakwe, ya cilolo na aomvi yakwe aa kwi sano; nupya umwene uwa ku Babiloni wamusenzile umu uzya mu mwaka uwalenga 8 uwa kuteeka kwakwe.
13 Lyene wasenzile ivyuma vyonsi ivyali umu ng’anda yakwe Yeova ni vyali umwi sano. Waputoozile iviya vyakwe goldi vyonsi vino Solomoni umwene uwa ku Izlaeli wapanzile umwi tempele lyakwe Yeova, wakwe viivi kwene vino Yeova walanzile.
14 Wasenzile antu yonsi amu Yelusalemu umu uzya na ya cilolo yonsi, asilika yonsi aamaka, na antu aamanyile ivya kupangapanga na ya kasula ya vyela; kuli kuti wasenzile antu 10,000. Kusi uwasyazile umu mpanga iiya suka sile apiina sana.
15 Wasenzile Yeoyakini umu uzya uku Babiloni, wasenzile na nyina wakwe Yeoyakini, aci yakwe, aomvi yakwe aa kwi sano na onsi acindame aa mu mpanga iiya ukufuma uku Yelusalemu ukuya uku Babiloni.
16 Nupya umwene uwa ku Babiloni wasenzile aasilika yonsi 7,000 umu uzya, na antu amanyile ivya kupangapanga 1,000 na ya kasula ya vyela, yonsi kwene yali aonsi ya maka aasambilile ivya kulwa.
17 Umwene uwa ku Babiloni wasonsile Mataniya umuto wakwe isi wakwe Yeoyakini kupyana Yeoyakini pa wene, nupya wamutemile izina lyuze ilyakuti Zedekiya.
18 Zedekiya wali ni myaka 21 lino watandike ukuteeka, nupya wateesile imyaka 11 umu Yelusalemu. Nyina wali a Hamutali mwana Yelemiya uwa ku Libina.
19 Watwalilile ukusosya Yeova wakwe viivi kwene vino Yeoyakimu wacisile.
20 Vintu vii vyacitike pa mulandu wakuti Yeova wasokiile antu ya mu Yelusalemu nu mu Yuda kufikila ayazinga, nupya Zedekiya wapondokiile umwene uwa ku Babiloni.
