2 Yamwene 25:1-30
25 Umu mwaka uwalenga 9 uwa kuteeka kwakwe Zedekiya, umu mwezi uwalenga 10 pa wanda uwalenga 10 umu mwezi, Nebukadineza umwene wa ku Babiloni waile na asilika yakwe yonsi umu kulwisya Yelusalemu. Wapanzile inkambi nu kutuulika ivu ilyali wa ciumba ukuzinguluka umusumba.
2 Nupya umusumba wazingulwikwe ukufika umu mwaka uwalenga 11 uwa kuteeka kwa Mwene Zedekiya.
3 Pa wanda uwalenga 9 uwa mu mwezi uwalenga 4, umu musumba mwali sana icipowe, mutaali ivyakulya.
4 Alwani iingile umu musumba, nupya asilika yonsi aali umu musumba yutwike usiku ukuomvya impongolo iyaali pakasi ka viumba viili umupiipi ni calo ca mwene, ala Aina Kalideya iyazinguluka umusumba; nupya umwene utwike alungama uku nzila iyaya uku Alaba.
5 Lelo asilika Aina Kalideya yazinginye umwene, nupya yaile iyamulemela uku lwanga lwa Yeliko, lyene asilika yakwe yonsi yasalangine iyamusya.
6 Yamulemile nu kumutwala uku mwene wa ku Babiloni uku Libula, nupya yamupingwile.
7 Yakomile ya mwana Zedekiya ala na Zedekiya akulolako, lyene Nebukadineza watonkwile Zedekiya amanso, amunyepa na maceni yakwe koopa nu kumusenda uku Babiloni.
8 Pa wanda uwalenga 7 umu mwezi uwalenga 5, kuli kuti umu mwaka uwalenga 19 uwa kuteeka kwakwe Nebukadineza umwene wa ku Babiloni, Nebuzaladani umukalamba wa yalinzi, umuomvi wa mwene wa ku Babiloni waile uku Yelusalemu.
9 Osile ing’anda yakwe Yeova, isano na mang’anda yonsi aali umu Yelusalemu; nupya osile mang’anda yonsi aayantu yonsi acindikwe.
10 Nupya asilika Aina Kalideya aali nu mukalamba wa yalinzi, yaongolwile iviumba vyonsi ivyazingulwike Yelusalemu.
11 Nebuzaladani umukalamba wa yalinzi wasenzile antu yonsi asyazile umu musumba, antu autukile uku mwene wa ku Babiloni na antu yonsi asyala.
12 Lelo umukalamba wa yalinzi wasileko yamwi pa yantu aali apiina sana akuti yaomba umu vyalo vya myangazi nu mu vyalo vyuze.
13 Aina Kalideya yatamozile ivipilala vyakwe koopa ivyali uku ng’anda yakwe Yeova ni vya kusendelapo ivintu ni tanki lyakwe koopa ilyali pa ng’anda yakwe Yeova, nupya yasenzile koopa uku Babiloni.
14 Yasenzile ni mbeketi, ya fosyolo, vya kuzimizyako umoto, makapu, ni viya vyonsi vyakwe koopa ivyaomviwanga api tempele.
15 Mukalamba wa yalinzi wasenzile ni vya kusendelapo umoto ni mbale izyapangiilwe na goldi umwengululwe ningo na siuva.
16 Koopa uwaomviwe uku kupangila ivipilala viili, itanki, ni vya kusendelapo ivintu vino Solomoni wapanzile pa ng’anda yakwe Yeova wali umwingi sana icakuti atanga apimwe.
17 Cila lucesi lwali mamita 8 ukuya umupela, ivyali wa ntendo ivyali papela vyali ivyakwe koopa; alino vyali ukucila pali mita wenga ukuya umupela, nupya ivyazingulwikeko na mapomegilaneti vyonsi vyali ivyakwe koopa. Lucesi lwakwe ciili nalo kwene lwapanzilwe icili cimwi.
18 Umukalamba wa yalinzi wasenzile na Selaya simapepo mukalamba, Zefaniya inkonkanyi yakwe simapepo mukalamba, na alinzi ya pa milyango yatatu.
19 Wasenzile umuomvi wa kwi sano uwangalilanga asilika ukufuma umu musumba, ya cuza ya mwene 5 aali umu musumba, na kalemba wa mukalamba wa yasilika uwakolonganikanga asilika, na aonsi 60 ukufuma umu yantu aali umu musumba.
20 Nebuzaladani umukalamba wa yalinzi wayasenzile nu kuyatwala uku mwene wa ku Babiloni uku Libula.
21 Umwene wa ku Babiloni wayakomiile uku Libula umu mpanga ya Hamati. Vikwene avino Ayuda yasenzilwe umu uzya ukufuma uku mpanga yao.
22 Nebukadineza umwene wa ku Babiloni wasonsile Gedaliya mwana Ahikamu mwana Syafani kuti atungulula antu asile umu mpanga ya Yuda.
23 Lino akalamba yonsi aayasilika na asilika yao yuvwile ukuti umwene wa ku Babiloni watasonta Gedaliya, lilyo kwene sile yaile kuli Gedaliya uku Mizipa. Paali Isumaeli mwana Netaniya, Yoanani mwana Kaleya, Selaya mwana Taniumeti Umwina Netofa, na Yazaniya umwana wa Mwina Maakati na asilika yao.
24 Gedaliya walafile umulapo kuli aliyo na asilika yao ati: “Mutatiina ukuya aomvi ya Ina Kalideya. Ikalini umu mpanga nu kuombela umwene wa ku Babiloni, nupya ivintu vilamuzipila.”
25 Nupya umu mwezi uwalenga 7 Isumaeli mwana Netaniya mwana Elisyama uwali uwa mu lupwa lwa mwene, wizile na aonsi 10 nu kukoma Gedaliya pamwi na Ayuda na Ina Kalideya aali nawe uku Mizipa.
26 Pa cisila, antu yonsi ukutandikila uku munono ukufika pa mukalamba, kumwi na akalamba ya yasilika yaile uku Ijipti, pano yatiinyile Aina Kalideya.
27 Lino Eveli-melodaki watandike ukuteeka umu Babiloni, umu mwaka uwalenga 37 ukufuma pano Yeoyakini umwene wa ku Yuda wasendiilwe umu uzya, pa wanda uwalenga 27 umu mwezi uwalenga 12, wafumizye Yeoyakini umu cifungo.
28 Wamusakamalanga ningo, nupya wacindamike icilimba cakwe ica wene ukucila ivilimba vyakwe ya mwene yauze aali nawe umu Babiloni.
29 Fwandi, Yeoyakini wazuzile ivyakuzwala vino wazwalanga umu cifungo, nupya lyonsi lino wali nu umi waliilanga pamwi nu mwene wa ku Babiloni.
30 Cila wanda umwene wamupeelanga ivyakulya, umi wakwe onsi.
