2 Yamwene 3:1-27
3 Yeolamu mwana Ahabu watandike ukuteeka Aina Izlaeli umu Samaliya mu mwaka uwalenga 18 uwa kuteeka kwakwe Yeosyafati umwene wa mu Yuda, nupya wateesile pa myaka 12.
2 Wasosyanga Yeova, lelo atacisile iviipe wakwe vino isi na nyina yacisile, pano wene ononyile icipilala cakwe Baali ica kupepa cino isi wapanzile.
3 Lelo wacitanga imembu wakwe ziizi kwene zino Yeloboamu mwana Nebati walenzile Aina Izlaeli ukucita. Walondelanga mumu kwene.
4 Mesya umwene wa ku Moabu wateekanga imfwele, nupya walipilanga imfwele izinono 100,000 na ya suuku asi yapelwe 100,000 uku mwene wa mu Izlaeli.
5 Lino Ahabu wafwile sile, umwene wa ku Moabu wapondokile umwene wa ku Izlaeli.
6 Fwandi Umwene Yeolamu wafumile uku Samaliya nu kuyakolonganika Aina Izlaeli yonsi.
7 Watumile na akuyanena Yeosyafati umwene wa Yayuda ati: “Umwene wa ku Moabu watampondokela, uzye ulansukilila umu kulwisya Aina Moabu?” Nawe wamwaswike ati: “Ee ndakusukilila. Wemo nani sweswe yali yamwi. Antu yane icili cimwi nu kuti antu yako. Imfwalasi zyane icili cimwi nu kuti imfwalasi zyako.”
8 Lyene Yeosyafati wamuzizye ati: “Tulapita i nzila ci?” Nawe wamwaswike ati: “I nzila ya ku lwanga lwa Edomu.”
9 Fwandi umwene wa ku Izlaeli wapisile pamwi nu mwene wa ku Yuda nu mwene wa ku Edomu. Lino yapisile pa manda 7, amanzi yano asilika yamwanga ni viteekwa vino yaali navyo yasizile.
10 Umwene wa ku Izlaeli walanzile ati: “Caipa sana. Yeova watatwama pakuti atupeele uku Ina Moabu.”
11 Lyene Yeosyafati uzizye ati: “Uzye kuno kutaya kasesema wakwe Yeova wino tungalenga atuzizyeko kuli Yeova?” Fwandi wenga pa yaomvi ya mwene wa Ina Izlaeli waswike ati: “Kuli Elisya mwana Syafati, uwitulwilanga Eliya amanzi ya kufulala iminwe.”
12 Yeosyafati walanzile ati: “Yeova akalandila muli aliwe.” Fwandi umwene wa Ina Izlaeli na Yeosyafati nu mwene wa ku Edomu yaile kuli Elisya.
13 Elisya uzizye umwene wa mu Izlaeli ati: “I cani cino wizila kuno? Pitanga kuli ya kasesema yakwe tata wako na yakwe mayo wako.” Lelo umwene wa mu Izlaeli walanzile ati: “Awe, pano Yeova uwatatwama ukuti aize atupeele uku Ina Moabu.”
14 Elisya wamunenyile ati: “Nkulapa umwi zina lyakwe Yeova wa maumba wino nkaombela ukuti, ndi cakuti utaya na Yeosyafati umwene wa ku Yuda nga ntaali nakulola na pa manso.
15 Ndetelini kalizya wa nyimbo.” Lino kalizya wa nyimbo watandike sile ukulizya, amaka yakwe Yeova izile pali Elisya.
16 Wayanenyile ati: “Yeova walanda wati, ‘Imbini imifolo umu mukonko uu,
17 pano Yeova walanda wati: “Kutalaya icipunga nanti imvula; lelo umu mukonko uu mulazula amanzi, nupya mulamwa pamwi ni nyama zinu zyonsi.”’
18 Lelo vii i vinono sana pali vino Yeova alamucitila, pano alamupeela na Ina Moabu.
19 Muce monone imisumba ya malinga yonsi ni misumba yonsi icindame sana, muce mukome imiti yonsi isuma nu kucilika utufukoka twa manzi, nupya muce monone ivyalo vyonsi ivisuma ukuomvya amawe.”
20 Lyene akatondo pa nsita ino yapeelanga upe wa vyakulya, amanzi yatandike ukufumilila uku Edomu, nupya yazuzile impanga yonsi.
21 Aina Moabu yonsi yuvwile ukuti ya mwene iiza umu kuyalwisya, fwandi yakolonganike aonsi yonsi angasenda ivyanzo nu kuyaimilila uku mupaka.
22 Lino yazyusile katondotondo, ilanzi lyakozizye pa manzi, nupya uku lusansa lwa Ina Moabu, manzi yalolekanga ayenzu kwati uwazi.
23 Lyene Aina Moabu yalanzile iyati: “U wazi uu! Nanti ciye uli ya mwene iyakomana ukuomvya ulupanga. Fwandi mwe Ina Moabu mwensi twapiteni tukasende ivintu vyao!”
24 Lino iingile umu nkambi ya Ina Izlaeli, Aina Izlaeli yakatwike nu kutandika ukuyakoma, nayo yutwike. Aina Izlaeli iingile umu musumba wa Moabu ala yafumile yakukoma Aina Moabu autukanga.
25 Yawisizye imisumba, nupya cila muntu wasumbiile iwe umu vyalo vyonsi ivisuma, navyo vyazuzilemo amawe; yacilike utufukoka twa manzi tonsi nu kukomola imiti yonsi isuma. Viumba sile ivya mawe ivya musumba wa Kili-haleseti i vyasile viimi, nupya aavwintanga amawe ukuomvya ivya kuvwintilako yavizingulwike nu kuviwisya.
26 Lino umwene wa ku Moabu waweni ukuti asikucimvya, wasenzile asilika 700 aali na ya panga nu kulungama ukwayelile umwene wa ku Edomu kuti akuno yafumile nu kupuuka; lelo yafizilwe.
27 Lyene umwene wa ku Moabu watozile umwanakwe iyeli uwali nu kumupyana pa wene, nu kumupeelela pa ciumba kuti aye ilambo lya koca. Nupya antu yasokiile sana Aina Izlaeli nu kusya umwene wa ku Moabu iyaswilila uku mpanga yao.
