2 Yamwene 5:1-27
5 Naamani umukalamba wa yasilika ya mwene uwa ku Silya wali umonsi umumanyikwe nupya uwizile acindikwa sana uku musambazi wakwe, pa mulandu wakuti Yeova wamuomvizye pa kwazwa Aina Silya ukucimvya. Wali umusilika wa maka nanti cakuti walwile tembwe.
2 Wanda umwi lino Aina Silya yaile umu kulwa na Ina Izlaeli yasenzile kakazyana ka mu Izlaeli akizile ikatandika ukuombela umuci wakwe Naamani.
3 Lyene kanenyile umuci wakwe Naamani ikati: “Ndi cakuti umusambazi wane waile kuli kasesema wa mu Samaliya, angamupozya tembwe.”
4 Fwandi umuntu umwi* waile anena umusambazi wakwe vino kakazyana ka ku Izlaeli kalanzile.
5 Lyene umwene wa ku Silya wamunenyile ati: “Pitanga! Nupya nimatuma kalata uku mwene wa ku Izlaeli.” Fwandi wapisile, nupya wasenzile matalanti 10 yakwe siuva, na goldi uwafinyile masyekele 6,000 ni vyakuzwala 10.
6 Lyene watwazile kalata uku mwene wa ku Izlaeli umwali amazwi yakuti: “Natuma kalata wii kuli wewe pamwi na Naamani umuomvi wane pakuti umupozye tembwe.”
7 Lino umwene wa ku Izlaeli wabelenzile sile kalata, walepwile ivyakuzwala vyakwe nu kulanda ati: “Uzye nene Leza pakuti nkwate maka ya kukoma nu kulenga umuntu kuya nu umi? Pano watatuma umuntu wii kuli nene nu kunena ukuti mupozye tembwe! Mungalola ukuti akulonda sile twalemanila.”
8 Lino Elisya umuntu wakwe Leza wa cumi uvwile sile ukuti umwene wa ku Izlaeli watalepula ivyakuzwala vyakwe, lilyo kwene watumile amazwi uku mwene ati: “U mulandu ci uno watulepwila ivyakuzwala? Leka aize kuli nene pakuti amanye ukuti mu Izlaeli mwaya kasesema.”
9 Fwandi Naamani waile kuli Elisya ni mfwalasi na maceleta yakwe ankondo nu kuyaimilila pa mulyango wa ng’anda.
10 Lelo Elisya watumile uwa kuyamunena ati: “Pitanga ukaitumpike imiku 7 mu Yodani nupya umapola nu kusangululwa.”
11 Lyene Naamani wasosile sana nu kutandika ukupita, ala akulanda akuti: “Nemo inkuti ‘Amafuma nu kwiza imilila paa, alino apepe kuli Yeova Leza wakwe, ala akupisya ikasa lyakwe pali tembwe pakuti impole.’
12 Uzye inguzi izyaya umu Damasika, kuli kuti uluzi lwa Abana nu luzi lwa Fapa zitazipapo ukucila inguzi zyonsi zya mu Izlaeli? Uzye ntanga nkaitumpike umu nguzi zizyo nu kusangululwa?” Lyene wapiliwike nu kupita ala watasoka sana.
13 Aomvi yakwe yaile kuli aliwe nu kumuzya iyati: “Tata, ndi cakuti kasesema wamunenyile ukucita icintu cimwi citale mutanga mucite vivyo kwene? Uzye lyene mungafilwa ukucita vino watamunena sile ati ‘Kaitumpike nu kusangululwa’?”
14 Lyene wapisile aya aitumpika imiku 7 umu Luzi Lwa Yodani wakwe viivi kwene vino umuntu wakwe Leza wa cumi wamunenyile. Nupya umwili wakwe wapozile iutandika ukuloleka wa mwili wa mwana munono, nupya wasangulwilwe.
15 Pa cisila waswilile uku umuntu wakwe Leza wa cumi pamwi na antu yonsi yano wali nayo, nupya waile aimilila pa nkoleelo yakwe Elisya nu kulanda ati: “Lyene namanya ukuti umu Izlaeli sile u mwaya Leza. Fwandi toola nu upe uu kufuma kuli ne muomvi wako.”
16 Lelo Elisya walanzile ati: “Nkulapa umwi zina lyakwe Yeova Leza wa umi wino nkaombela ukuti nsikutoola upe uwo.” Watwalilile ukumupaapata, nomba wakananga.
17 Lyene Naamani walanzile ati: “Napaapata, leka ne muomvi wako mpeelwe ivu lya mu mpanga yii lino ya punda yaili yangasenda pano ne muomvi wako ntalatala mpeele ilambo lya koca nanti ilambo lyuze kuli leza muze ukucila pali Yeova.
18 Lelo si Yeova anjelele ne muomvi wako pa cintu cii conga: Lino umusambazi wane wingila umu ng’anda yakwe Limoni ku kumufukamila, akandemelela pi kasa, fwandi nkafukama umu ng’anda yakwe Limoni. Ndi cakuti nafukama, si Yeova anjelela pa cintu cii ne muomvi wako.”
19 Lyene Elisya wamunenyile ati: “Upite ningo.” Pa cisila ca kufumapo nu kupita intamfu ilinge,
20 Geazi umuomvi wakwe Elisya watandike ukwelenganya ati: ‘Musambazi wane waleka Naamani Umwina Silya ukupita ukwaula ukupoka vino ali waleta. Nkulapa umwi zina lyakwe Yeova Leza wa umi, namasimula nu kumukonka nkapokeko vimwi.’
21 Lyene Geazi wakonsile Naamani. Lino Naamani waweni umwi akusimula ukuya kuli aliwe, wisile umwi celeta lyakwe nu kumukomenkanya nupya walanzile ati: “Uzye vyonsi vili sile ningo?”
22 Nawe waswike ati: “Vyonsi vili sile ningo. Musambazi wane wantuma wati, ‘Likwene kwiza aonsi yamwi yaili amuli ya kasesema ukufuma umu ncende ya myamba yakwe Efulemu. Napaapata yapeele italanti lyakwe siuva ni vyakuzwala viili.’”
23 Naamani wamunenyile ati: “Tola matalanti yaili.” Watwalilile ukumupaapata nupya watozile matalanti yaili yakwe siuva nu kuika umu vyola viili, alino amupeela ni vyakuzwala viili nu kupeela aomvi yakwe yaili kuti yamusendele.
24 Lino wafisile uku Ofeli,* waposile ivintu vivyo nu kuvingizya umu ng’anda nupya walesile ukuti yapita. Lino yafumilepo,
25 wapisile aya aimilila umupiipi nu musambazi wakwe. Lyene Elisya wamuzizye ati: “Geazi, aekwi kuno wafuma?” Nawe waswike ati: “Ne muomvi wako ntaile nanti akumwi.”
26 Elisya nawe wamuzizye ati: “Uzye ntali indi naawe lino umuntu ali wika umwi celeta nu kukukomenkanya? Uzye yii insita ya kupoka siuva nanti ivyakuzwala nanti mafuta ya miolivi nanti ivyalo vya myangazi nanti imfwele nanti ing’ombe nanti aomvi aonsi nanti anaci?
27 Fwandi tembwe uwali kuli Naamani amaiza kuli wewe nu ku yana yako manda pe.” Lilyo kwene sile wafumilepo ala ali na tembwe nupya wataswepuluka.
Mafutunoti
^ Nanti limwi Naamani.
^ Ncende ya mu Samaliya, nanti limwi ingaya ka mwamba nanti ilinga.
