2 Yamwene 6:1-33
6 Ya kasesema yauze yanenyile Elisya iyati: “Lola! Incende ino tutenzipo yatitucepela.
2 Leka tuye uku Yodani. Nupya cila muntu akasende icimuti ca kupangila umwa kwikala kuuku kwene.” Nawe wayanenyile ati: “Pitangini.”
3 Wenga pali aliyo wamuzizye ati: “Uzye ungapita pamwi na swe yaomvi yako?” Nawe waswike ati: “Ee.”
4 Fwandi wapisile pamwi nayo, iyaya iyafika uku Yodani iyatandika nu kukoma imiti.
5 Lino wenga pali ya kasesema wakomanga umuti, impasa yasokokiile umu luzi, nupya wapunzile ati: “Iye mwe musambazi, i yazime!”
6 Muntu wakwe Leza wa cumi wamuzizye ati: “Aepi pano yatiponela?” Lyene wamulanzile pano yaponiile. Nawe wakomile icimuti nu kusumbila papo kwene nupya walenzile impasa ukweleela.
7 Wamunenyile ati: “Tola.” Nawe wakonzolwile ikasa nu kutola impasa.
8 Lyene umwene wa ku Silya waile umu kulwa na Ina Izlaeli. Walanzyanyizye na aomvi yakwe pano yaali nu kupangila inkambi.
9 Muntu wakwe Leza wa cumi watumile amazwi ku mwene wa ku Izlaeli ati: “Ucenjele, utiza pa ncende yii pano Aina Silya yakwiza yakuzanzile pakwene.”
10 Fwandi umwene wa mu Izlaeli watumile mazwi uku yantu yakwe aikalanga pa ncende ino muntu wakwe Leza wa cumi wamunenyilepo. Muntu wakwe Leza wa cumi watwalilile ukucelula umwene, nawe ataile uku ncende iiyo pa miku iingi.
11 Cii calenzile umwene wa ku Silya ukusoka sana, fwandi wamile aomvi yakwe nu kuyuzya ati: “Nenini! Uzye a weni pali sweswe ali uku lusansa lwa mwene wa ku Izlaeli?”
12 Lyene wenga pa yaomvi yakwe waswike ati: “Kusi nanti a wenga pali sweswe musambazi! Elisya kasesema wa mu Izlaeli, aliwe akanena umwene wa mu Izlaeli vyonsi vino ukalandila umu muputule wako uwa kukasi.”
13 Umwene walanzile ati: “Yangini mukamulonde kuno ali, pakuti intume aonsi akuyamulema.” Pa cisila uvwile ukuti: “Ali uku Dotani.”
14 Lilyo kwene sile watumile asilika aakwelanga pa mfwalasi na apa maceleta kumwi na asilika yauze aingi; nayo yapisile usiku nu kuyazinguluka umusumba.
15 Lino umuomvi wa muntu wakwe Leza wa cumi wakatwike katondotondo nu kufuma panzi, waweni asilika aali ni mfwalasi na maceleta ya nkondo ala iyazinguluka umusumba. Lyene lilyo kwene sile uzizye Elisya ati: “Iye mwe musambazi! Tumacita uli?”
16 Lelo wamunenyile ati: “Utuvwa intete! Pano aali uku lusansa lwitu aingi ukucila aali uku lusansa lwao.”
17 Lyene Elisya watandike ukupepa ati: “We Yeova muyule amanso pakuti alole.” Lilyo kwene sile Yeova wayuzile manso ya muomvi wakwe Elisya, nawe waweni mu ncende ya myamba muziile imfwalasi na maceleta ya moto ankondo ukuzinguluka Elisya.
18 Lino Aina Silya yaile kuli aliwe, Elisya wapefile kuli Yeova ati: “Napaapata, pafuzya antu yaa.” Nawe wayapafwizye wakwe viivi kwene vino Elisya walenzile.
19 Lyene Elisya wayanenyile ati: “Imuponga, uu asi ali musumba uno mukulonda. Nkonkini pakuti mutwale uku monsi wino mukulonda.” Lelo wayatwazile uku Samaliya.
20 Lino yafisile uku Samaliya, Elisya wapefile ati: “We Yeova yayule manso pakuti yalole.” Fwandi Yeova wayuzile manso yao nupya yaweni ukuti yali umu Samaliya.
21 Lino umwene wa ku Izlaeli wayaweni, uzizye Elisya ati: “Tata uzye njakome?”
22 Lelo wamwaswike ati: “Awe utayakoma. Uzye ukakoma antu yano walwisya nu kusenda umu uzya? Yapeele ivyakulya na manzi pakuti yalye nu kumwa nu kuswilila uku musambazi wao.”
23 Fwandi wayapekanyizizye mutebeto ukalamba, nayo yaliile nu kumwa, pa cisila wayalesile ukuti yapite uku musambazi wao. Nupya asilika Aina Silya apokololanga ivintu yataatazile yaswililepo umu mpanga ya Izlaeli.
24 Pa cisila Umwene Beni-hadadi uwa ku Silya wakolonganike asilika yakwe yonsi nu kuyazinguluka umusumba wa Samaliya.
25 Fwandi mu Samaliya mwizile imuya sana icipowe icakuti mutwe wakwe punda wakalwanga pa mpiya zyakwe siuva 80, nupya makufi yaili aamatotoli ya nkunda yakalwanga pa mpiya zyakwe siuva 5.
26 Lino umwene wa mu Izlaeli wapitanga papela ya ciumba, umwanaci wamupundilile ati: “Musambazi twazwe!”
27 Nawe wamunenyile ati: “Ndi cakuti Yeova atakwazwile, aekwi kuno ningafumya uwazwilizyo? Uzye u ku lwano? Nanti kuno yakafenela waini nanti mafuta?”
28 Umwene wamuzizye ati: “I ntazi ci ino ukweti?” Nawe waswike ati: “Mwanaci wii wanenyile wati, ‘Leta umwanako tumulye ilelo, lyene mutondo tulalya umwanane.’
29 Fwandi twelike umwanane nu kumulya. Uwanda uwalondelilepo namunenyile nati, ‘Leta umwanako tumulye.’ Lelo wamufisile.”
30 Lino umwene uvwile sile vino umwanaci walanzile, walepwile ivyakuzwala vyakwe. Lyene lino wapitanga pa ciumba papela, antu yaweni ukuti mu vyakuzwala vyakwe wazwitemo ni cakuzwala ca kulangilamo ulanda.
31 Lyene walanzile ati: “Si Leza amfulule nupya alunde napo ndi cakuti ilelo ntaputwile umutwe wakwe Elisya mwana Syafati.”
32 Elisya watenzi umu ng’anda yakwe pamwi na akalamba. Lyene umwene watumile umuntu umwi kuti amukoleelele, lelo lino atatala wafika, Elisya wanenyile akalamba ati: “Uzye imulola? Umwana wa nkomi watatuma uwa kwiza umu kumputula umutwe. Mwikeko mano, ndi cakuti wino watatuma wafika, muyale icisaasa nu kutininkizyako. Musambazi wakwe watamukonka umu nsizi.”
33 Lino Elisya acili akulanda, wino umwene watumile wafisile nupya umwene walanzile ati: “Wavya uu ufumile kuli Yeova. U mulandu ci uno ningalolelela uwazwilizyo wakwe Yeova?”
