2 Yamwene 7:1-20
7 Lyene Elisya walanzile ati, “Uvwini mazwi yakwe Yeova. Yeova watalanda ati: ‘Mutondo pa nsita wakwe ikwene pa mpongolo ya musumba wa Samaliya, makilogilamu 4* yakwe fulaulo musuma yalaakalwa pali syekele wenga,* na makilogilamu 8 yakwe baale nayo yalaakalwa pali syekele wenga.’”
2 Lyene umusilika umwi uno umwene wataile, wanenyile umuntu wakwe Leza wa cumi ati: “Cico citanga cicitike nanti Yeova wayuzile mayulu nu kulenga ukuti ingano ziitike.” Elisya wamunenyile ati: “Ulalolako na manso yako, lelo utalalyako.”
3 Pa mpongolo ya musumba paali antu 4 aalwile tembwe, nupya yalanzyanyanga iyati: “I cani cino tumaikalila pakwene mpaka tufwe?
4 Nga twaya umu musumba lino mucili cipowe, twayafwila mumu kwene. Nupya ndi twikala pano, nalyo kwene tumafwa. Fwandi lekini tuye uku nkambi ya Ina Silya. Nga yatatukomile tumapusuka, lelo nga yatukoma ale avivyo kwene.”
5 Lyene yapisile usiku iyaya uku nkambi ya Ina Silya. Lino yafisile ukunzi ya nkambi, yaweni ukuti mu nkambi musi ali wensi.
6 Pano Yeova walenzile aali umu nkambi ya Ina Silya ukuvwa icongo ca maceleta ya nkondo ni mfwalasi, kuli kuti icongo ca yasilika aingi. Fwandi yalanzile iyati: “Umwene wa Ina Izlaeli watalalika ya mwene ya Ina Hiti na ya mwene ya Ina Ijipti kuti ize yatulwisye!”
7 Insita kwene iiyo iya usiku yakatwike nu kuutuka pakuti yapusuke, nupya yasiile matenti yao, imfwalasi, ya punda ni nkambi yonsi.
8 Lino antu yaya aalwile tembwe yafisile uku nkambi, iingile umwi tenti limwi nu kutandika ukulya nu kumwa. Nupya yasenzilemo siuva na goldi ni vyakuzwala nu kuyavifisa. Lyene yaswilile iyaya iingila umwi tenti lyuze, namo kwene yasenzile ivintu ivyalimo nu kuyavifisa.
9 Lyene yatandike ukulanzyanya iyati: “Vino tukucita visi ningo. Lelo uwanda wa nsansa! Nga twatwalilila ukuwayawaya twaleka cafika na katondo ale twizafululwa. Lekini tukafisye ilyasi lii lisuma ukwi sano.”
10 Fwandi yapisile nu kuyapundilila alinzi ya pa mpongolo ya musumba iyati: “Itwaya umu nkambi ya Ina Silya, nomba mutali muli umuntu ali wensi, tutali tuvwamo ali wensi. Itwazanamo sile imfwalasi na ya punda ala ivinyepwa, na matenti ala iyasyala sile vivyo kwene.”
11 Lilyo kwene sile alinzi ya pa mpongolo yanenyile akwi sano ilyasi lilyo.
12 Lyene lilyo kwene umwene wakatwike usiku nu kunena aomvi yakwe ati: “Lekini munene vino Aina Silya iyacita. Iyamanya ukuti tuli ni nzala, fwandi iyafuma umu nkambi nu kuyafisama umu mpanga, pano yakwelenganya ukuti tumafuma umu musumba, nupya yamatulema nu kwingila umu musumba witu.”
13 Lyene umuomvi wenga walanzile ati: “Lekini tutume aonsi yamwi yapite ni mfwalasi 5 izisiile umu musumba. Pano yapite nanti yatapita yamafwa, wakwe vino Aina Izlaeli yonsi asyala yamafwa. Nupya yamalowa wakwe vino Aina Izlaeli yonsi kwene yalowa. Alino swensi kwene tumafwa. Fwandi lekini tuyatume sile nu kulola ivimacitika.”
14 Fwandi yasenzile maceleta yaili ni mfwalasi, nupya umwene wayatumile uku nkambi ya Ina Silya nu kuyanena ati: “Yangini mukalole.”
15 Yakonsile muno Aina Silya yapisile kufika nu ku Yodani, nupya umu nzila monsi mwali ivyakuzwala ni vintu vino Aina Silya yasumvile lino yutukanga pa mulandu ni ntete. Lyene antu yano yatumile yaswilile nu kuyanena umwene.
16 Fwandi antu yaile umu nkambi ya Ina Silya nu kusenda ivintu ivyalimo, icakuti makilogilamu yakwe fulaulo umusuma yatandike ukukalwa pali syekele wenga, na makilogilamu 8 yakwe baale yatandike ukukalwa pali syekele wenga wakwe viivi kwene vino Yeova walanzile.
17 Walanga umwene wasonta umusilika wino wataaile kuti aangalila impongolo, lelo yamulyatozile pa mpongolo mpaka afwa, wakwe viivi kwene vino umuntu wakwe Leza wa cumi wanenyile umwene.
18 Fwandi cali wakwe viivi kwene vino umuntu wakwe Leza wa cumi wanenyile umwene ati: “Mutondo pa nsita ndi ikwene pa mpongolo ya musumba wa Samaliya makilogilamu 8 yakwe baale yalaakalwa pali syekele wenga na makilogilamu 4 yakwe fulaulo musuma yalaakalwa pali syekele wenga.”
19 Lelo umusilika wino umwene wataile wanenyile umuntu wakwe Leza ati: “Cico citanga cicitike nanti Yeova wayuzile mayulu nu kulenga ukuti ingano ziitike.” Elisya nawe wamunenyile ati: “Ulalolako na manso yako, lelo utalalyako.”
20 Vivyo kwene i vyamucitikiile pano antu yamulyatozile pa mpongolo mpaka afwa.
Mafutunoti
^ Mu Ciebele: “Siya wenga.” Lolini Ivyeo na Vyuze pa B14.
^ Syekele wenga angalingana na magilamu 11.4. Lolini Ivyeo na Vyuze pa B14.
