2 Yamwene 8:1-29
8 Elisya wanenyile umwanaci wino watuutulwilile umwana ati: “Katuka uwapita pamwi na amu ng’anda yako, nupya mukikale wa enyi konsi kuno mukulonda, pano Yeova watalanda ukuti kulaya icipowe, nupya cilaya umu mpanga pa myaka 7.”
2 Fwandi umwanaci wacisile viivi kwene vino umuntu wakwe Leza wa cumi wamunenyile. Wapisile pamwi na amu ng’anda yakwe nu kuyaikala umu mpanga ya Ina Filisti pa myaka 7.
3 Lino imyaka 7 yasizile, umwanaci wafumile uku mpanga ya Ina Filisti aya uku mwene nu kumunena ukuti amuwezezye ing’anda yakwe ni mpanga yakwe.
4 Lyene umwene wanenyile Geazi umuomvi wa muntu wakwe Leza wa cumi, ati: “Napaapata, nene ivizungusyo vyonsi vino Elisya wacita.”
5 Walanga acili akumunena vino watuutulwile umwi, umwanaci wino yatuutulwilile umwana wizile uku mwene mu kumulenga kuti amuwezezye ing’anda yakwe ni mpanga yakwe. Lilyo kwene Geazi walanzile ati: “Musambazi, mwanaci aali wii nupya wii aali mwanakwe wino Elisya watuutulwile.”
6 Lyene umwene uzizye umwanaci, nawe wamusimikile ilyasi lilyo. Umwene wamupeezile umuomvi wa kwi sano nu kumunena ati: “Muwezezye ivintu vyakwe vyonsi, nupya umupeele impiya zino wali nu kukwata umu vilimwa kufuma pano wasiliile impanga yakwe.”
7 Elisya waile uku Damasika lino Beni-hadadi umwene wa ku Silya walwile. Fwandi yanenyile umwene iyati: “Umuntu wakwe Leza wa cumi wataiza.”
8 Lyene umwene wanenyile Hazaeli ati: “Senda ivya upe nu kuyakomenkanya umuntu wakwe Leza wa cumi. Uleke atuzizyeko kuli Yeova ndi cakuti ndapola ulwale uu.”
9 Hazaeli waile umu kumukomenkanya ala watasenda ivya upe, kuli kuti vintu visuma ivya mu Damasika ivyasenzilwe pa ngamali 40. Waile aimilila pa nkoleelo yakwe Elisya nu kumunena ati: “Beni-hadadi umwanako nupya umwene wa ku Silya watantuma uku kuzya ndi cakuti alapola ulwale wakwe.”
10 Elisya wamunenyile ati: “Pitanga ukamunene uti, ‘Ulapola,’ lelo Yeova watanena ati alafwa.”
11 Nupya Elisya watwalilile ukulolekesya Hazaeli asuka auvwa insonyi. Lyene umuntu wakwe Leza wa cumi watandike ukulila.
12 Hazaeli uzizye ati: “Musambazi, i cani cino ukulila?” Nawe waswike ati: “A pa mulandu ni viipe vino ulacita uku Ina Izlaeli. Uloca imisumba yao iya malinga nu kukoma aonsi ya maka uku lupanga, nupya ulaputola ana yao, nu kulepula inda zya yanaci aali pa ukulu.”
13 Hazaeli waswike ati: “Uzye ne muomvi wako, ne simbwa nene ningacita ica musango uwo?” Lelo Elisya wamunenyile ati: “Yeova watanena ukuti ulaya umwene umu Silya.”
14 Lyene Hazaeli wafumile kuli Elisya nu kuswilila uku musambazi wakwe uwaile amuzya ati: “Uzye Elisya wali wakunena watuli?” Nawe wamwaswike ati: “Wali wati ulapola.”
15 Lelo uwanda uwalondelilepo, Hazaeli watozile bulanketi amutimpika umu manzi alino avimba umwene pa manso nu kumutitila mpaka afwa. Nupya Hazaeli wamupyanyile pa wene.
16 Mu mwaka uwalenga 5 uwa kuteeka kwakwe Yeolamu mwana Ahabu umwene wa mu Izlaeli, lino Yeosyafati wali umwene umu Yuda, Yeolamu mwana Yeosyafati umwene wa ku Yuda wizile aya umwene.
17 Wali ni myaka 32 lino wizile aya umwene, nupya wateesile imyaka 8 mu Yelusalemu.
18 Nawe kwene wacitanga wakwe vino ya mwene ya mu Izlaeli yacitanga, wakwe vino amu ng’anda yakwe Ahabu yacisile, pano watwazile mwana Ahabu nupya watwalilile ukusosya Yeova.
19 Lelo Yeova atalondanga ukulovya Ayuda pa mulandu na Devedi umuomvi wakwe, pano walanga wamulaya ukuti lyonsi umu lupwa lwakwe mulaafuma uwa kuteeka* umu Yelusalemu.
20 Mu manda yakwe Yeolamu, Aina Edomu yapondokile Ayuda nupya yaisontiile umwene.
21 Fwandi Yeolamu waile uku Zaili na maceleta yakwe yonsi, nupya wakatwike usiku nu kucimvya Aina Edomu aamuzingulwike kumwi na angalilanga asilika ya pa maceleta; nupya asilika yutukiile umu matenti yao.
22 Lelo Aina Edomu yatwalilila ukupondokela Ayuda ukufika na ndakai. Aina Libina nayo kwene yapondwike.
23 Nupya ilyasi lyonsi ilyasyala ilikalanda pali Yeolamu na pali vyonsi vino wacisile, lyalembwa umwi buku lya mpiti ilikalanda pali ya mwene ya mu Yuda.
24 Lyene Yeolamu wafwile nupya waziisilwe ukwaziisilwe ivikolwe vyakwe mu Musumba Wakwe Devedi. Nupya Ahaziya umwanakwe uwamupyanyile pa wene.
25 Mu mwaka uwalenga 12 uwa kuteeka kwakwe Yeolamu mwana Ahabu umwene wa mu Izlaeli, Ahaziya mwana Yeolamu umwene wa mu Yuda wizile aya umwene.
26 Ahaziya wali ni myaka 22 lino wizile aya umwene, nupya wateesile umwaka onga umu Yelusalemu. Nyina wali a Ataliya umwizikulu wakwe Omuli umwene wa mu Izlaeli.
27 Wacitanga wakwe viivi kwene vino amu ng’anda yakwe Ahabu yacitanga, nupya watwalilile ukusosya Yeova wakwe aliyo, pano wali a lupwa ku ya mu ng’anda yakwe Ahabu.
28 Fwandi wapisile na Yeolamu mwana Ahabu mu kulwisya Hazaeli umwene wa ku Silya ku Lamoti-gilyadi, lelo Aina Silya yacisile Yeolamu.
29 Lyene Umwene Yeolamu waswilile uku Yezileele pakuti akapole ivilonda vino Aina Silya yamucisile uku Lama lino walwisyanga Hazaeli umwene wa ku Silya. Ahaziya mwana Yeolamu umwene wa ku Yuda waile uku Yezileele mu kulola Yeolamu mwana Ahabu pano wacisike.
Mafutunoti
^ Mu Ciebele: “Wamupeezile lampi.”
