2 Yamwene 9:1-37
9 Lyene kasesema Elisya wamile kasesema umwi nu kumunena ati: “Nyepa icakuzwala umu musana, nupya utole zuwa zuwa mafuta nu kuya uku Lamoti-gilyadi.
2 Nga waya wafika ukalonde Yeu mwana Yeosyafati mwana Nimisyi; ukamufumye pa ina yakwe nu kumutwala umu muputule wa mukasi sana.
3 Lyene ukatole mafuta nu kumwitulwila pa mutwe alino ulande uti, ‘Yeova watalanda ati: “Nakusonta ukuya umwene umu Izlaeli.’” Lyene lilyo kwene sile ukayule icisaasa nu kuutuka.”
4 Fwandi umuomvi wakwe kasesema wakatwike nu kuya uku Lamoti-gilyadi.
5 Lino wafisile, wazanyile akalamba ya yasilika yatenzi. Lyene walanzile ati: “Inkukwatila ilyasi musambazi.” Yeu uzizye ati: “A weni pali sweswe?” Nawe waswike ati: “A wewe kwene musambazi.”
6 Fwandi Yeu wakatwike nu kwingila umu ng’anda; umuomvi waile amwitulwila mafuta pa mutwe nu kumunena ati, “Yeova Leza wa Ina Izlaeli watalanda ati: ‘Nakusonta ukuya umwene pa yantu yakwe Yeova, kuli kuti Aina Izlaeli.
7 Ulinzile ukukoma amu ng’anda yakwe Ahabu umusambazi wako, nupya ndalandula pa wazi wa yaomvi yane ya kasesema nu wa yaomvi yakwe Yeova yonsi yano Yezebele wakoma.
8 Amu ng’anda yakwe Ahabu yonsi yalalowa; nupya ndalovya aonsi yakwe yonsi, kumwi na atakwata uwa kuyazwa na atonte amu Izlaeli.
9 Nupya ndaleka amu ng’anda yakwe Ahabu kuya wa ya mu ng’anda yakwe Yeloboamu mwana Nebati nu kuya wa ya mu ng’anda yakwe Baasya mwana Ahiya.
10 Lelo Yezebele wene ya simbwa yalamuliila umu ncende ya mu mpanga ya Yezileele, nupya kusi alamuziika.’” Lino walanzile vivyo wayuzile icisaasa nu kuutuka.
11 Lino Yeu waswilile uku yaomvi ya musambazi wakwe, yamuzizye iyati: “Uzye vyonsi vili ningo? U mulandu ci uno cipena wiya ali wizila kuli wewe?” Nawe waswike ati: “Mwamanya vino umuntu wiya waya ni milandile yakwe.”
12 Lelo yalanzile iyati: “Vivyo asi ivya cumi! Tunene twapaapata.” Lyene wayanenyile vino umuntu wiyo walanzile. Nupya watiile: “Wali walanda nu kuti, ‘Yeova watalanda ati: “Nakusonta ukuya umwene umu Izlaeli.”’”
13 Lyene lilyo kwene cila muntu watozile icakuzwala cakwe nu kucika pa masitepu pakuti Yeu alyatepo, nupya yalizizye mapenga nu kulanda iyati: “Yeu wataya umwene!”
14 Lyene Yeu mwana Yeosyafati mwana Nimisyi wapangiile Yeolamu.
Yeolamu na asilika Aina Izlaeli yaali uku Lamoti-gilyadi ala yakucingilila Aina Izlaeli kuli Hazaeli umwene wa ku Silya.
15 Pa cisila Umwene Yeolamu waswilile uku Yezileele pakuti akapole vilonda vino Aina Silya yamucisile lino walwisyanga Hazaeli umwene wa ku Silya.
Lyene Yeu walanzile ati: “Ndi cakuti muli uku lusansa lwane mutaleka ali wensi autuke ukufuma umu musumba nu kuyanena amu Yezileele api lyasi lii.”
16 Lyene Yeu wakwezile iceleta lyakwe nu kuya uku Yezileele, pano walanga Yeolamu ali kuuku kwene pa mulandu wakuti wacisike, nupya Umwene Ahaziya uwa ku Yuda waile umu kumupempula.
17 Lino umulinzi waimi pa lupungu lwa mu Yezileele, waweni iumba lya yonsi yakwe Yeu yakwiza. Lilyo kwene sile wapunzile ati: “Nkulola iumba lya yonsi.” Yeolamu walanzile ati: “Tuma umonsi uwa kukwela pa mfwalasi pakuti akayakomenkanye nu kuyuzya ukuti, ‘Uzye imwiza umu mutende?’”
18 Lyene uwakwezile pa mfwalasi waile amukomenkanya mu kumunena ati: “Umwene akuzya ukuti, ‘Uzye imwiza umu mutende?’” Lelo Yeu walanzile ati: “Twize umu ‘mutende’ nanti foo citafwile ukukusakamika. Nkonke sile!”
Lyene umulinzi walanzile ati: “Wino inatuma atayafika nomba atawezile.”
19 Fwandi watumile na muze uwakwezile pa mfwalasi, lino wafisile waile ayanena ati: “Umwene akuzya ukuti, ‘Uzye imwiza umu mutende?’” Lelo Yeu walanzile ati: “Twize umu ‘mutende’ nanti foo citafwile ukukusakamika. Nkonke sile!”
20 Lyene umulinzi walanzile ati: “Nawe kwene watayafika nomba atawezile, nupya imipisizye ya mukalamba wao uwa yasilika ikuloleka wa mipisizye yakwe Yeu umwizikulu wakwe Nimisyi, pano akapisya wakwe cipena.”
21 Yeolamu walanzile ati: “Nyepa imfwalasi!” Fwandi wanyepelile imfwalasi ukwi celeta lya nkondo, nupya Yeolamu umwene wa ku Izlaeli na Ahaziya umwene wa ku Yuda yakwezile umu maceleta yao nu kuya umu kukomenkanya Yeu. Yaile iyamukomenkanya umu calo cakwe Naboti Umwina Yezileele.
22 Lino Yeolamu wamuweni sile, wamuzizye ati: “Uzye watuwiza umu mutende?” Nawe wamwaswike ati: “Kungaya uli umutende lino Yezebele mayo wako akucita uzelele ni vya maleele ivingi?”
23 Lilyo kwene sile Yeolamu wakonike ni celeta lyakwe kuti autuke, nupya wanenyile Ahaziya ati: “Ahaziya iyatupita pa mano!”
24 Yeu watozile ulapwa nu kulasa Yeolamu pa cisao, nupya uluceto lwapuzinkinye umu mwenzo aponela nu mwi celeta lyakwe.
25 Lyene wanenyile Bidikali umusilika wakwe ati: “Munyemule nu kumusumbila umu calo cakwe Naboti Umwina Yezileele. Uzye ukwiusya vino Yeova walanzile lino wewe nani twali umu maceleta ala tukukonka Ahabu isi wakwe Yeolamu?
26 Yeova wanenyile Ahabu ati: ‘Mutondo naweni uwazi wakwe Naboti nu wazi wa yana yakwe, fwandi ne Yeova nkukunena ukuti, ndakufulwila umu calo kwene cii cakwe Naboti.’ Acino, nyemula icitumbi cakwe nu kucisumbila mu calo ukulingana na mazwi yakwe Yeova.”
27 Lino Ahaziya umwene wa ku Yuda waweni ivyacitikanga, utwike alungama uku ng’anda iyaali umu calo. (Pa cisila Yeu wamukonsile nupya walanzile ati: “Mulasini nawe kwene!” Fwandi yamulasile umwi celeta ala akuya uku Guli incende iyaya umupiipi nu ku Ibeleamu. Lelo watwalilile ukuutuka ukuya uku Megido nupya waile afwila kuuku kwene.
28 Lyene aomvi yakwe yamusenzile umwi celeta iyamutwala uku Yelusalemu, nupya yaile iyamuziika umwi lindi lyakwe, umu Musumba Wakwe Devedi umwalaala ivikolwe vyakwe.
29 Ahaziya wizile aya umwene umu Yuda mu mwaka uwalenga 11 uwa kuteeka kwakwe Yeolamu mwana Ahabu.
30 Lino Yeu wafisile uku Yezileele, Yezebele uvwile ukuti watafika. Fwandi waipensile umu manso na penti yakwe bulaki aiyemvya nu ku mutwe. Nupya watandike ukusungamila api windo.
31 Lino Yeu wingile pa mpongolo, Yezebele uzizye ati: “Uzye ivintu vyazipiile Zimuli uwakomile umusambazi wakwe?”
32 Lyene Yeu walingamile api windo nu kuzya ati: “A weni aali uku lusansa lwane? A weni?” Lilyo kwene sile aomvi yaili nanti yatatu akwi sano yamusungamile.
33 Walanzile ati: “Musumbilini pansi!” Fwandi yasumvile Yezebele nupya uwazi wasanukile uku ciumba nu ku mfwalasi nupya imfwalasi zyamulyatozile.
34 Pa cisila wingile aya alya nu kumwa. Lyene walanzile ati: “Kasendini umwanaci wiya umutiipwe nu kuyamuziika, pano u mwana wa mwene.”
35 Lelo lino yaile ukuti yamuziike, yazanyile sile icipanga, ingazo ni vizanza.
36 Lino yaswilile kuli Yeu nu kumunena ivyacitike, walanzile ati: “Mazwi yano Yeova walanzile ukupitila muli Eliya Umwina Tisyibe umuomvi wakwe iyafikiliziwa, aakuti, ‘Ya simbwa yalalya Yezebele mu mpanga ya Yezileele.
37 Nupya icitumbi cakwe Yezebele cilaya umuvundo mu calo ca mu mpanga iya Yezileele, pakuti yatace yalande yati: “Wii a Yezebele.”’”
