2 Yoani 1:1-13
1 Ne mukalamba, nalembela nkazi uwasoololwa, nupya nalembela na ana yakwe, yano natemwa sana nupya asi nene sile nenga nayatemwa lelo na yonsi amanya icumi yayatemwa,
2 pa mulandu wa cumi icaya muli sweswe nupya cilatwalilila ukuya muli sweswe manda pe.
3 Tulapokelela icikuuku cikulu, uluse nu mutende ukufuma kuli Leza Tata nu kufuma kuli Yesu Klistu, Umwana wakwe Tata, pamwi ni cumi nu kutemwa.
4 Indi sana ni nsansa pa kuzana ana yako yamwi yali umu cumi, wakwe vino Tata watunenyile.
5 Fwandi nkukulenga nkazi ukuti tutemwane. (Isunde lino nkukulembela asi lipya, lelo twaya nalyo ukufuma na mpiti.)
6 Nupya vii avino ukutemwa kukapiliula, ukuti twalondela masunde yakwe. Likwene ali sunde lino muvwile ukufuma pa kutandika, lino mulinzile ukulondela.
7 Pano asomvi aingi yaya umu nsi, yayo aatazumila ukuti Yesu Klistu wizile aya umuntu. Umuntu wa musango uu ali musomvi nupya umulwani wakwe Klistu.
8 Cenjelini pakuti mutaponzya ivintu vino twaombiile pa kuvikwata, pakuti muce mupeelwe icilambu icikumanile.
9 Ali wensi aakapitilila mu cisambilizyo cakwe Klistu nu kukanacilondela, atamanya Leza. Lelo aakalondela icisambilizyo cii ali wino wamanya Tata nu Mwana.
10 Ndi cakuti umwi wiza kuli mwemwe ni cisambilizyo icipusaneko, mutalinzile ukumupokelela umu mang’anda inu nanti ukumulamuka.
11 Pano wensi uwalamuka umuntu wiyo ala akutungilila iviipe vyakwe.
12 Nanti cakuti inkwata ivingi ivya kumulembela, nsikulonda ukumulembela, lelo nkwenekela ukwiza kuli mwemwe nu kwizalanda namwe, pakuti mukaye sana ni nsansa.
13 Ana yakwe kaci muzo uwasoololwa, yakulamuka.
