Aina Levi 9:1-24
-
Aloni wapeela malambo (1-24)
9 Pa wanda uwalenga 8, Mose wamile Aloni na ana yakwe na akalamba ya mu Izlaeli.
2 Wanenyile Aloni ati: “Tola ing’ombe ya pa luyembu iisuma na suuku wa pi lambo lya koca umusuma, nupya uvipeele pa nkoleelo yakwe Yeova.
3 Lelo uce unene Aina Izlaeli uti, ‘Tolini sawe uwa kupeela pi lambo lya pa luyembu ni ng’ombe na suuku ivya mwaka onga nupya ivisuma, kuti viye ilambo lya koca,
4 nupya mutole cipambasi na suuku kuti viye amalambo ya mutende, pakuti muvipeele kuli Yeova, alino nu upe wa ngano uusakaanye na mafuta, pano ilelo Yeova amalolekela kuli mwemwe.’”
5 Fwandi yatwazile ivintu vivyo pa nkoleelo yi tenti lya kupepelapo, wakwe vino Mose walanzile. Lyene antu yonsi yaile iimilila pa nkoleelo yakwe Yeova.
6 Nupya Mose walanzile ati: “Vii avino Yeova watamunena kuti mucite, pakuti ululumbi lwakwe Yeova lungaloleka kuli mwemwe.”
7 Lyene Mose wanenyile Aloni ati: “Yanga pa ulambo nu kuyapeela ilambo lyako ilya pa luyembu alino ni lambo lyako ilya koca, nupya uifuutile uluyembu lwako nu kufuutilako amu ng’anda yako; nupya upeeleleko na antu malambo nu kuyafuutilako imembu zyao, wakwe vino Yeova watalanda.”
8 Papo kwene sile Aloni waile pa ulambo nu kuyakoma ing’ombe iya kupeela ilambo lyakwe ilya pa luyembu.
9 Lyene ya mwana Aloni aonsi yamutwaliile uwazi, nawe watimpike umunwe umu wazi nu kuupaka uku mpembe zya ulambo, nupya uwasyala wawitiile umwisika lya ulambo.
10 Lyene mafuta ni mfyo na mafuta ya kwi tima ivya kwi lambo lya pa luyembu wavyosile pa ulambo, wakwe vino Yeova wanenyile Mose.
11 Nupya waile aocela inyama iyasyala kumwi ni mpapa ukunzi ya nkambi.
12 Lyene Aloni wakomile ilambo lya koca, nupya anakwe yamupeezile uwazi, nawe wausansile umu mbali zyonsi izya ulambo.
13 Yamupeezile ivimpilinsya vi lambo lya koca pamwi nu mutwe, nawe wavyosile pa ulambo.
14 Nupya wafuzile mala ni vimbombo nu kuvyocela pamwi ni lambo lya koca pa ulambo.
15 Lyene wapeezile malambo ya yantu nu kutola imbuzi iyi lambo lya pa luyembu iya yantu, nupya waikomile nu kupeela ilambo lya pa luyembu wakwe vino wacisile ukwi lambo lya kutandikilako.
16 Nupya wapeezile ilambo lya koca ukulingana na vino yalondelanga pa kupeela ilambo lilyo.
17 Lyene wapeezile upe wa ngano, watapwilepo zimwi ukuzuuzya ikufi nu kuzyoca pa ulambo, ukulunda pi lambo lya koca ilya katondo.
18 Pa cisila wakomile cipambasi na suuku vino antu yasangwile ukuti viye ilambo lya mutende. Nupya anakwe yamupeezile uwazi, nawe wausansile umu mbali zyonsi izya ulambo.
19 Lelo mafuta yakwe cipambasi, mafuta ya ku musinda wakwe suuku, mafuta aavimba ivya munda, imfyo na mafuta ya kwi tima,
20 yaisile yonsi pa cisao cakwe cipambasi na cakwe suuku, lyene pa cisila wizile aoca mafuta yayo pa ulambo.
21 Lelo visao na makulu ya kwi lunji, Aloni wavizulunzizye kuti viye upe wa kuzulunzya kuli Yeova, wakwe vino Mose walanzile.
22 Lyene Aloni walozizye makasa uku yantu nu kuyapaala, nupya wafumile pano wapeelelanga ilambo lya pa luyembu ni lambo lya koca na malambo ya mutende.
23 Nupya pa cisila Mose na Aloni iingile umwi tenti lya kupepelapo, nupya iizile iyafumamo nu kupaala antu.
Lyene ululumbi lwakwe Yeova lwalolekiile uku yantu yonsi,
24 nupya umoto wafumile kuli Yeova nu koca malambo na mafuta ivyali pa ulambo. Lino antu yonsi yaweni vivyo, yatandike ukupunda nupya yaponyile ale iyalozya ivinso vyao pansi.
