Ezaya 21:1-17
21 Vii i vilacitikila ulwanga ulwayela kuli yemba:
Kuli cimwi icikwiza icili wa cimuza icikalamba icikupita uku kaeya,Kufuma uku lwanga uku mpanga ino antu yakatiina.
2 Iiyandanga icilolwa cimwi iciipisye sana:
Umucenjezi akucenjezya,Na konona nawe akonona.
Mwe Ina Elamu! Na mwe Ina Medya, yangini mukazanze!
Indi nu kulenga ukucula konsi kuno waleeta ukusila.
3 Ali mulandu uno nkuvwa sana ukuwaika.
Nkuzakaza,Wa mwanaci aakupaapa.
Insakamikwa sana icakuti ntanga nuvwe;Incula sana icakuti nkufilwa ukulola.
4 Mwenzo ukukulukunta; nkuzakaza pa mulandu ni ntete.
Manguzi yano inkulondesya yandenga ukuya ni ntete.
5 Pekanyini tebo nu kwika ningo ivilimba!
Mulye nu kumwa!
Mwe ya cilolo, katukini nu kupaka mafuta uku cisyangu!
6 Pano Yeova watanena ati:
“Yanga ukatume umwi uwakuti akalole ivikucitika alino aize akunene vino walola.”
7 Nawe wali walola imfwalasi ziili zikutinta iceleta lya nkondo,Ya punda yaili yakutinta iceleta lya nkondo,Ni ngamila ziili zikutinta iceleta lya nkondo.
Wali wikako sana mano lino ali akulola ivintu vii.
8 Lyene wali wapunda wakwe cisama wati:
“We Yeova, kasanya nkwimilila pa lupungu lwa mulinzi,Nupya cila manguzi nkuya pa cifulo cane ica kulindilapo.
9 Yamwi aeya yakwiza:
Aonsi yali umwi celeta lya nkondo lino imfwalasi zikutinta!”
Lyene wali wapunda wati:
“Watawa! Babiloni watawa!
Ya leza yakwe yonsi iyavungolwa!”
10 Mwe yantu yane, mwe yano mwaya wa ngaano zino yapuula,Mwe yana ya pa lwano lwane,Imunena vino inuvwa ukufuma kuli Yeova wa maumba, Leza wa Ina Izlaeli.
11 Vii i vilacitikila umusumba wa Duma:
Umwi akumpundilila ukufuma uku Seili ati:
“We mulinzi we, uzye kumaca nsita ci?
A lilaci lino kumaca?”
12 Umulinzi nawe wati:
“Ukuca kumaca, nu kufita kufite.
Ndi cakuti mukulonda, uzyini.
Uzyini nupya kwene!”
13 Vii i vilacitikila ulwanga:
Mulaalala umupiipi ni miti imwi iya mu lwanga,Mwe yalendo aakapita ni vinyama mwe ya ku Dedani.
14 Sendini manzi mukakomenkanye aali nu lusala,Mwe ikazi ya mu mpanga ya Tema,Nupya peelini ivyakulya uku yantu aakuutuka.
15 Pano yakuutuka ulupanga ulwatilusomolwa muno lukaikala,Nu ulapwa uuli umupiipi nu kulasa, nu unkalwe uwa mu nkondo.
16 Yeova watanena ati: “Mu mwaka sile onga, ukwaula ukucilapo nanti sile uwanda onga,* lulumbi lonsi lwakwe Kedali lulasila.
17 Asilika aakaomvya maulapwa aalasyalapo pa yasilika ya ku Kedali yalaya anono, pano avino Yeova Leza wa Ina Izlaeli watalanda.”
Mafutunoti
^ Mu Ciebele: “Wakwe vino imyaka ya muomvi yaya.”
