Ezaya 24:1-23
24 Lolini! Yeova amalenga impanga ukusyala umwaula cimwi nu kuya itongwa.
Amayonona nu kusalanganya antu aikalamo.
2 Yonsi ivilayacitikila vilaya ivili vimwi:
Kuli kuti ya simapepo na asi ya simapepo,Muomvi nu musambazi wakwe,Muomvi nu mwanaci wino akaombela,Aakukala na aakukazya,Aakwazima na aakwazimisya,Aakukongwesya na aakukongola.
3 Impanga ilasyala umwaula cimwiIvyayamo vyonsi vilasendwa,Pano Yeova watalanda.
4 Insi ikuloosya; ikononeka.
Impanga ivunde ikuuma; ikufusuka.
Antu alumbuke aaya umu mpanga yakusila.
5 Impanga yatikoweziwa uku yantu aakaikalamo,Pano iyasuula masunde,Iyasenula masunde,Nu kutama upangano wa manda pe.
6 Ali mulandu uno icitiipu icononela impanga,Na aakaikalamo yali nu mulandu.
Nupya ali mulandu uno antu aakaikala umu mpanga iyacepela,Na aonsi anono sile atiyasyalamo.
7 Waini umupya akuloosya,* imyangazi yatiuma,Nupya yonsi aakasansamuka yakuloosya.
8 Ciunda ca tungoma twa nsansa icisila;Congo ca yantu aakuzevya icisila;Ciunda ca mazeeze ica nsansa icisila.
9 Yakumwa waini ukwaula ukuvwa inyimboNupya uwengwa ukuvwika ukalipe kuli yano yakumwa.
10 Musumba uno antu yafumamo iononeka;Mang’anda yonsi iyayalwa pakuti kutaya uwa kwingilamo.
11 Yakulilila waini umu miseo.
Insansa zyonsi izisila;Insansa zya mu mpanga izisila.
12 Musumba wationoneka;Impongolo yatiyononeka.
13 Pano vii avino cilaya uku yantu ya mu mpanga:
Cilaya wakwe vino yakakunta umuti wa miolivi,Wakwe vino yakatolelezya imyangazi lino yamala ukuzombola.
14 Yalapunda,Yalapunda ni nsansa.
Yalalanda pa ukulu wakwe Yeova ukufuma kuli yemba.*
15 Nupya yalalumbanya Yeova kufuma uku ncende ya ku ufumondaka;Yalalumbanya izina lyakwe Yeova Leza wa Ina Izlaeli kufuma uku vilila vya pali yemba.
16 Tukuvwa inyimbo ukufuma uku mpela ya nsi izikuti:
“Acindikwe Leza wa Ulungami!”
Lelo nkuti: “Nkusila maka, nkusila maka!
Kalanda kuli nene! Antu yakufutuka auze nu kuyaponzya.Icumi kwene yakufutuka auze nu kuyaponzya.”
17 Intete, viwina ni viteyo vikumuloleela mwe yantu ya mu mpanga.
18 Wensi aalutuka icongo ca kutiinya alaponela umu ciwina,Nupya wensi aalafuma umu ciwina alalemya umu citeyo.
Pano ivipongo vya mwi yulu vilayulika,Nu mufula wa nsi ulasunkaana.
19 Impanga yatilepuka;Impanga yatisunkaana;Impanga yatisunkaana sana.
20 Insi ikupempezyoka wa muntu uwatakoleka,Nupya ikuya monsi monsi wa kamusakuta kano umuza ukutenkanya,
Yaya sana nu luyembu,Nupya ilapona icakuti italakatuka nu kukatuka.
21 Mu wanda uuwa Yeova alaleta upinguzi wakwe pa yasilika ya mwi yuluNa pali ya mwene ya mu nsi.
22 YalakolonganikwaWa yafungwa yano iyakolonganika umu ciwina,Nupya yalayalilwa umu cifungo;Pa cisila ca manda aingi yalapingulwa.
23 Yeova wa maumba wataya Umwene mu Mwamba wa Zioni nu mu Yelusalemu,Alateeka nu ucindami pa nkoleelo ya yakalamba ya mu yantu yakwe,Mu uteeko wakwe nanti sile umwezi upuma ulafitaNi lanzi ilyatiliwala lilazima.
