Ezaya 40:1-31
40 Leza winu walanda wati, “Teekezyini, teekezyini antu yane.”
2 Landini cikuuku cikuuku kuli Yelusalemu,Nupya mumumanyisye ukuti insita yakwe iya kucula yatisila,Nu kuti imembu zyakwe izilipilwa.
Yeova watamufulula ukulingana ni membu zyakwe zyonsi.
3 Izwi lyakwe umwi likupunda umu lwanga likuti:
“Pekanyini inzila yakwe Yeova!
Pangini umuseo uwololoke wakwe Leza witu muupisye umu lwanga.
4 Muziike imikonko yonsi,Mupase ni myamba ni milundu yonsi.
Mulinganye na monsi umulundumale,Nu muli amawe.
5 Lulumbi lwakwe Yeova lulasokololwa,Nupya antu yonsi yalalulola,Pano avino Yeova watalanda.”
6 Uvwini! Umwi akulanda akuti: “Manyisya!”
Muze nawe akuuzya ati: “Manyisye vyani?”
Nawe wamunena wati, uti: “Antu yonsi yaaya wi sote iliteku.
Nu kutemwa kwao ukwa cumi kwaya wa maluwa ya mu mpanga.
7 Isote likauma,Na maluwa yakafootaNdi cakuti Yeova wapuutapo.
I cumi kwene antu yaya wi sote iliteku.
8 Isote likauma,Na maluwa yakanyala,Lelo izwi lyakwe Leza witu likaikalilila manda pe.”
9 Yanga pa mwamba utali,We mwanaci, wemuno ukutwala ilyasi lisuma uku Zioni.
Punda na makaWe mwanaci wemuno ukutwala ilyasi lisuma uku Yelusalemu.
Punda, utuvwa intete.
Manyisya uku misumba ya mu Yuda uti: “Leza winu aewi.”
10 Umwene wa Papelapela Yeova aliza na maka,Nupya alateeka ukuomvya ikasa lyakwe.
Leza wataipekanya ukupeela icilambu uku yantu yakwe.Nu kuyalipila.
11 Alasakamala imfwele zyakwe wakwe vino kacema akacita.
Alakolonganika utwana twa mfwele ukuomvya ikasa lyakwe,Nupya alatusendela pa cisao cakwe.
Alatungulula izikonsya ala wataziteekelela.
12 A weni angafumbata manzi yonsi amuli yemba ukuomvya ikufi lyakwe?A weni uwapimapo iyulu kuomvya icizanza cakwe?
A weni uwatala wakolonganikapo ulukungu lwa pano nsi pakuti alupimeNanti ukupima imyamba ukuomvya ivya kupimilakoAlino nu kupima utu myamba ukomvya masikelo?
13 A weni uwatala wapima umupasi wakwe Yeova,Nupya a weni aangamupandako mano?
14 A weni wino akauzya pakuti amanye ivintu,Nanti aakamusambilizya ivya kuya nu mulinganya,Nanti ukumusambilizya ukuya na mano,Nanti ukumulanga ukwiluka kwa cumi cumi?
15 Lolini! Kuli aliwe inko zyaya wa kalitoni ka manzi kufuma umu mbeketi,Nupya akazilola sile wa lukungu ululi pali sikelo.
Akanyemula ivilila vya pali ya yemba wa lukungu.
16 Nanti sile umu Lebanoni mutanga mufume inkwi zikumanile izya kuomvya pa ulambo,Nanti sile inyama izyayamo zitanga zikumane ilambo lyakwe ilya koca.
17 Kuli aliwe inko zonsi zyaya kwati icintu icitayako;Akazilola kwati izya sile sile, kwati zisi zya cumi.
18 A kuli weni kuno mungalinganya Leza?
Nupya i cani cino mungamukolanyako?
19 Uwamanya ivya kupangapanga akapanga icilubi,Aakasula nawe acipaka na goldi,Nu kwikako maceni yakwe siuva.
20 Muntu akasoolola icimuti kuti ciye ica upe,Cimuti icisiola.
Akalonda uwamanya ivya kupangapangaKuti apangemo icilubi icitanga cononeke.
21 Uzye mutamanya?
Uzye mutuvwa?
Uzye yatamunena ukufuma pa kutandika?
Uzye mutiluka ukufuma pano insi yapangiilwe?
22 Kwaya umwi aakaikala papela ya nsi iizinguluke,Nupya aakaikalamo yaya wa vipaso.
Akakonzolola iyulu wa nsalu iyangupale,Nupya akalivungulula wi tenti lya kwikalamo.
23 Akalenga antu acindame ukuya aasile sileNu kulenga ya kapingula* kuya kwati yatayako.
24 Yaya wa vimelwa ivyacilemwaNa wa mbezu izyacikomelwa,Lino imisisi itatala yatamba,Umuza ukapungilapo iyumaNupya umuza ukayasenda wi sote.
25 Uwa Muzilo akuti, “A weni wino mungandinganyako?”
26 “Lingamilini umwi yulu nu kulola.
A weni uwapanzile intanda zyonsi zii?
A wiyo aakazitungulula umu maumba nu kuzipenda;Zyonsi akazyama mazina.
Pa mulandu na maka yakwe aingi nupya aakuzungusya,Kutaaya nanti alumwi ulukaponga.
27 We Yakobo, na we Izlaeli,U mulandu ci uno mukalandila ukuti, ‘Yeova asilola ivikancitikila,Nupya Leza ataaya nu mulinganya kuli nene’?
28 Uzye utamanya? Uzye utuvwa?
Yeova Kaumba wa nsi, a Leza manda pe.
Asitonta nanti ukusila maka.
Kusi aangamanya mano yakwe.
29 Akapeela maka kuli yano yatiyatontaNu kukomya sana aatakweti maka.
30 Alumendo yalatonta nu kusila maka,Nupya aonsi yalapumika nu kupona.
31 Lelo aakataila Yeova yalakwata maka nupya.
Yalapapuka ukuya umupela wakwe lyang’anda.
Yalasimula lelo maka yatalasila;Yalapita lelo yatalatonta.”
Mafutunoti
^ Nanti aakatungulula aapano nsi.
