Ezaya 41:1-29
41 “Mwe vilila, kutikini kuli nene ukwaula ukupanga icongo;Lekini inko zikwate maka nupya.
Lekini zipalame; nupya lekini zivwange.
Izini kuno uku upinguzi.
2 A weni uwamile umuntu umwi ukufuma kuno ilanzi likatunkila,Kuli kuti ukumwama umu ulungami kuti aomba umulimo wakwe,Kupeela inko kuli aliweNu kuleka kuti acimvye ya mwene?
A weni uwayasyunozile ukuomvya ulupanga lwakwe suka yaya wa lukungu?Nupya a weni uwayasalanginye nu ulapwa wakwe kwati avino umuza ukasalanganya isote?
3 Watwalilile ukuyakonka ukwaula ica kumulesyaAla akupita umu nzila zino ataatala wapitamo.
4 A weni uwacita ivintu vii?Nupya a weni akaama inkulo ukufuma pa kutandika?
Ne Yeova nene indi wa kutandikilako;Nupya uku yantu ya kusyalikizya naya icili cimwi.”
5 Ivilila vyalola ivikacitika nu kuvwa intete.
Insi yaatandika ukuzakaza.
Antu yakolongana pamwi.
6 Cila muntu akaazwilizya umuzenu kumunena ati: “Komeleka.”
7 Uwamanya ivya kupangapanga akakomelezya aakapanga ivintu ukuomvya ivyela;Aakapapaatanika ivyela ukuomvya inondoAkakomelezya akasula ivyela pa ca kusulilapo.
Akalanda pali cino icipangwa ati: “Iicipangwa ningo.”
Lyene yakacipoopelela ni nsunga pakuti citaca cononeke.
8 Lelo wemo we Izlaeli, wewe muomvi wane,We Yakobo, wewe nasoolola,We mwana wakwe Abulahamu cuza wane,
9 Nakusenzile ukufuma uku mpela ya nsi,Nupya nakwamile ukufuma uku ncende ya kutali sana.
Nakunenyile inti, ‘Wewe muomvi wane;Nakusoolola; ntakukana.
10 Utuvwa intete, pano indi naawe.
Utasakamala, pano nene Leza wako.
Ndakukomya, nupya ndakwazwa,Ndakulemelela ni ikasa lyane lya kwi lunji ilya ulungami.’
11 Yonsi aakakusokela yaluvwa insonyi nupya yalazewana.
Yonsi aakakulwisya yalacimviwa nu kuloviwa.
12 Ulalonda antu aakakulwisya, lelo utalayazana;Antu yano ukalwa nayo inkondo yalaya wa cintu icitayako, icitayako nanti apanono.
13 Pano ne Yeova Leza wako nkukulema ikasa lyako ilya kwi lunji,Nupya nene kwene nkukunena inti, ‘Utuvwa intete. Nimakwazwanga.’
14 Utuvwa intete we Yakobo, we muno utacindama,*Mwe yantu ya mu Izlaeli, ndamwazwa,” vikwene avino ne Yeova Kakulula winu, uwa muzilo wakwe Izlaeli nalanda.
15 Lola! Inkulenga ukuya ica kupuulilako,Ica kupuulilako icipya ica mino akalipe.
Ulalyatola imyamba nu kuivungolaNupya ulalenga utumyamba ukuya wa vipumbu.
16 Ulayulusya,Nupya umuza ulaisenda;Cimuza cilaisalanganya.
Ulaazangila muli Yeova,Nupya ulaayuvwila mu wa Muzilo Wakwe Izlaeli.”
17 “Aakacuziwa alino na apiina yakulonda manzi, lelo yasikuyazana.
Indimi zyao izyuma pa mulandu nu lusala.
Ne Yeova nimayavwa,
Ne Leza wakwe Izlaeli ntalayatazyela.
18 Ndalenga inguzi ukulakonkoloka umu tumyamba umutaaya icili consi,Nu mu mikonko umutaaya cimwi mulaya utufukoka.
Ndalenga ulwanga luye a yemba wa manziNi ncende umutaya manzi iye utufukoka.
19 Mu lwanga ndalemamo imiti ya mikedali,Miti ya akasya, miti ikaamwa ukuti malito ni miti ikaamwa ukuti paini.
Mu lwanga umutaya icili consi ndalemamo imiti ya yunipa,Kumwi ni miti ikaamwa ukuti asyi ni milemo,
20 Pakuti antu yonsi yalole nu kumanyaNupya iikeko mano nu kwiluka ukutiYeova u watacita vii,Nupya Uwa Muzilo Wakwe Izlaeli u watalenga kuti ciye vii.”
21 Yeova walanda wati: “Letini umulandu winu,”
Umwene wakwe Yakobo wati: “Letini ivisinka.”
22 “Letini usininkizyo nupya tunenini ivilacitika.
Tunenini ivyacitike mpiti pakutiTwelenganyepo nu kumanya ivyafumilemo.
Nanti tumanyisyini ivilacitika.
23 Tunenini ivilacitika uku nkoleelo,Pakuti tumanye ukuti mwemwe ya leza.
Citiniko cimwi, cisuma nanti ciipe,Pakuti tuzunguke nga twacilola.
24 Mwemwe ya sile sile,Nupya kusi vino mwacita.
Yonsi aakamusoolola yaaya aawinyi.
25 Nasoolola umwi ukufuma uku katutu nupya aliza,Kuli kuti aalafuma ukukatunkila ilanzi alaama api zina lyane.
Alalyatola ya kateeka kwati ivu,Wakwe vino nakamata akalyatola ivu ilitipate.
26 A weni uwalanzile pali vii ukufuma pa kutandika pakuti tumanye,Nanti ukufuma mpiti pakuti tulande tuti, ‘Vino akulanda ivya cumi’?
Cumi kwene kusi uwamanyisizye pali vii!
Kusi uwalanzilepo!
Kusi uuvwile icili consi kuli wewe!”
27 Nene natandikilepo ukunena Zioni inti: “Lola! Vii i vilacitika!”
Nupya ndatuma uwa kusimikila ilyasi lisuma uku Yelusalemu.
28 Lelo natwalilile ukulolekesya, nomba kutaali nanti aumwi,Kutaali nanti aumwi pali aliyo aangapanda auze amano.
Nupya natwalilile ukuyuzya pakuti yasuke, lelo kutaali uwa kwasuka.
29 Yonsi kwene aasile sile.
Kusi vino yangacita.
Vilubi vyao ivya cela vyaya wa muza nupya asi vya cumi.
Mafutunoti
^ Mu Ciebele: “We lyambi.”
