Ezaya 49:1-26
49 Kutikini kuli nene, mwe vilila,Ikiniko mano, mwe nko izyaya ukutali.
Yeova wangamile lino ntatala navyalwa.
Wangamile izina ala ncili umunda muli mayo.
2 Wanyozile akanwa kane wa lupanga ulukalipe;Wamfisile umu cinzingwa ci kasa lyakwe.
Wanyozile wa luceto;Wamfisile umu kacola kakwe aka kwikamo inceto.
3 Wanenyile ati: “We Izlaeli, wewe umuomvi wane,Wino ndalangilamo ucindami wane.”
4 Lelo natiile: “Naombiisye apa sile sile.
Maka yane yaile sile umu manzi pa vintu ivisi vya cumi.
Lelo umu cumi Yeova aliwe akampingula,Nupya Leza wane aliwe alampeela icilambu.”
5 Lyene Yeova uwampanzile umunda muli mayo ukuti inje umuomvi wakwe,Wanena ukuti mbwezye Yakobo kuli aliwe,Pakuti Aina Izlaeli yakolongane kuli aliwe.
Ndacindamikwa kuli Yeova,Nupya Leza wane alaya ali maka yane.
6 Nupya walanzile ati: “Utalapelela sile pa kuya umuomvi waneAalawezya imitundu yakwe YakoboNa Ina Izlaeli asyalapo,
Lelo ndakulenga nu kuya uluswepo lwa nko,Pakuti ince mpususye na antu ya ku mpela ya nsi.”
7 Yeova Kapususya wakwe Izlaeli, nupya Uwa Muzilo wakwe, walanda kuli wino wasuulwa wino inko zyapata sana, umuomvi wakwe ya kateeka, wati:
“Ya mwene yalakatuka,Na ya cilolo yalafukamaPa mulandu na Yeova uwaya uwa cumi,Uwa Muzilo Wakwe Izlaeli uwa kusoolola.”
8 Yeova walanda wati:
“Mu nsita ya kulanga icikuuku nakwaswike,Nupya pa wanda wa kupusuka nakwavwile;Natwalilile uku kucingilila pakuti nkulenge ukuya wa upangano uku yantu,Kuzifya impanga,Nu kulenga ukuti antu yane yaswilile uku mpanga yao iyasiile umwaula cimwi.
9 Pakuti ndande uku yafungwa inti, ‘Fumini!’
Na kuli yano yali umu mfinzi inti, ‘Lolekini!’
Yalaalya umu mbali ya nzila,Mu nzila zyonsi mulaya umulemvwe.
10 Yataluvwa inzala nanti ukuvwa ulusala,Yataluvwa icikaye icipisye nanti ukupya na kasanya.
Pano uwaya nu luse aliwe alaayatungulula,Nupya alayatwala uku tufukoka twa manzi.
11 Ndalenga imyamba yane yonsi ukuya imiseo,Miseo yane yonsi ilatumpuka.
12 Lolini! Antu yakufuma uku mpanga ya kutali,Yamwi yakufuma uku katutu, yamwi uku uwondaka,Yauze nayo uku mpanga ya Sinimu.”
13 Pundini ni nsansa mwe mayulu, sansamuka we nsi.
Lekini myamba ipunde ni nsansa.
Pano Yeova watateekezya antu yakwe,Nupya watauvwila antu yakwe aakacula uluse.
14 Lelo Zioni watwalilile ukulanda ati:
Yeova watandekelezya, nupya Yeova watanjilila.”
15 Uzye umwanaci angilila umwanakwe aakonkaNanti ukukanaya ni cikuuku ku mwanakwe?
Nanti cakuti anaci yaa yangilila, nemo ntalatala nkwilile.
16 Lola! Nakulemba umu minwe yane.
Iviumba vyako vyaya pa nkoleelo yane insita zyonsi.
17 Ana yako yalawela zuwa zuwa.
Yonsi aakuwisizye nu kukonona yalafuma kuli wewe.
18 Katusya manso nu kulola monsi monsi.
Yonsi kwene yakukolongana,
Yakwiza kuli wewe.
Yeova walanda wati, “Nkulapa,Yonsi kwene yalaya wa viyembelo vino ukazwala,Nupya wa musipi wa nsalu uno nawinga akazwala.
19 Nanti cakuti incende zyako zyononike nu kusyala umwaula icili consi, nupya impanga yako yononike,Lyene ilacepa pa mulandu wakuti antu yalavulaNupya aakakonona yalaya ukutali.
20 Ana aavilwe lino waponzizye ana yalalanda ala ukuvwako yati,‘Incende yii yatitucepela.
Tulondelini apa kwikala.’
21 Nupya ulalanda umu mwenzo uti,‘Uzye isi wa yana yaa atiyapeelwa kuli nene a weni,Vino nemo naponzya ana nupya nene ing’umba,Nene umuzya nupya umufungwa?
A weni uwayakuzya?
Lolini! Nasiile sile nenga,Nga fwandi ana yaa yafuma kwi?’”
22 Umwene wa Papelapela Yeova walanda wati:
“Lola! Ndakatusya ikasa lyane pakuti inko zililole,Ndimika icimanyililo uku yantu.
Yalaleeta ana yako aonsi ala iyayasendela pa visaoNupya yalasendela ana yako akazyana pa viye.
23 Ya mwene yalakuombela,Na ana yao akazyana yalaakusakamala.
Yalakufukamila ala ivinso vyao ivisimpa pansiNu kukuvwila,Nupya ulamanya ukuti nene Yeova;Yayo aakantaila yatalatala yazewane.”
24 Uzye aasendwa umu uzya uku muntu wa maka,Nanti uku muntu wa unkalwe yangakululwa?
25 Lelo Yeova walanda wati:
“Nanti sile azya ya muntu wa maka yalapokwa kuli aliwe,Na yayo aasendwa umu uzya uku yantu aaya nu unkalwe yalakululwa.
Ndalwisya aakakulwisya.Nupya ndapususya ana yako.
26 Ndaleka aakakucuzya yalye imili yao,Nupya yalakoleka uwazi wao kwati a waini umupya.
Nupya antu yonsi yalamanya ukuti nene Yeova,Kapususya wako,Nupya Kakulula wako Uwa Maka wakwe Yakobo.”
